ބުދަ، 18 ނޮވެމްބަރު 2026
ޚަބަރު

ރައީސް މުޢިއްޒު ބުދަ ދުވަހުގެރޭ ދިވެހި ވިޔަފާރިވެރިންނާ ބައްދަލުކުރައްވަނީ

ރައީސް މުޢިއްޒު ބުދަ ދުވަހުގެރޭ ދިވެހި ވިޔަފާރިވެރިންނާ ބައްދަލުކުރައްވަނީ

ރައީސް ޑރ. މުހައްމަދު މުޢިއްޒު ދިވެހި ވިޔަފާރިވެރިންނާ ބައްދަލުކުރެއްވުމަށް ހަމަޖެހިފައިވާ ކަމަށް ސަރުކާރުގެ ތަރުޖަމާން ހީނާ ވަލީދު މިއަދު ވިދާޅުވެއްޖެއެވެ.

އަންނަ ބުދަ ދުވަހުގެރޭ 8:30 ގައި ސޯޝަލް ސެންޓަރުގައި ބޭއްވުމަށް ހަމަޖެހިފައިވާ މި ބައްދަލުކުރެއްވުމަކީ، ރައްޔިތުންނާ ގާތުން ބައްދަލުކުރައްވައި، އެފަރާތްތަކުގެ ހިޔާލާއި ކަންބޮޑުވުންތައް ސީދާ އަޑުއެއްސެވުމަށް ރައީސް ކުރިއަށް ގެންދަވާ ސިލްސިލާ ބައްދަލުކުރެއްވުންތަކުގެ ތެރެއިން ބޭއްވޭ ބައްދަލުކުރެއްވުމެކެވެ.

ސަރުކާރުގެ ތަރުޖަމާން ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، މި ބައްދަލުކުރެއްވުމަކީ ރައްޔިތުންނާ ގާތުން ބައްދަލުކުރައްވައި، ޚިޔާލާއި މަޝްވަރާ ހޯއްދަވާ، ރައްޔިތުން ކަންބޮޑުވާ ކަންކަން ޙިއްސާ ކުރައްވާ، ބޭނުންފުޅުވާ ކަންކަން ސީދާ އަޑުއެއްސެވުމަށް ރައީސް ޑރ. މުޢިއްޒު ބާއްވަވާ ސިލްސިލާ ބައްދަލު ކުރެއްވުންތަކުގެ ތެރެއިން ކުރިއަށް ގެންދަވާ ބައްދަލުކުރެއްވުމެއް ކަމަށެވެ. މި ބައްދަލުވުމުގައި ބައިވެރިވުމަށް ދިވެހި ވިޔަފާރިވެރިންނަށް ދައުވަތު އެރުވުމަށްވެސް އެކަމަނާ ވަނީ ފާހަގަކުރައްވާފައެވެ.

މީގެ ކުރިން ރައީސް މުޢިއްޒު ވަނީ މާލޭގެ އެކި އަވަށްތަކުގެ ރައްޔިތުންނާ ބައްދަލުކުރައްވާފައެވެ. މިގޮތުން، ވިލިމާލެ، މާފަންނު، މައްޗަންގޯޅީ އަދި ހެންވޭރުގެ ރައްޔިތުންނާ މިހާތަނަށް އެމަނިކުފާނު ބައްދަލުކުރައްވާފައިވެއެވެ. މި ބައްދަލުކުރެއްވުންތަކުގައި ރައްޔިތުންގެ ސުވާލުތަކަށް ޖަވާބު ދެއްވައި، އެފަރާތްތަކުގެ ޝަކުވާތައް ރައީސް ވަނީ ވަރަށް ގާތުން އަޑުއައްސަވާފައެވެ. މި ސިލްސިލާ ބައްދަލުވުންތަކުގެ ބޭނުމަކީ ސީދާ ރައްޔިތުންގެ އަޑުއެހުމާއި، މައްސަލަތަކަށް ހައްލު ހޯއްދެވުމެވެ.

ރައީސް ޑރ. މުއިއްޒު ވެރިކަމުގެ ހުވާ ކުރެއްވުމަށް ފަހު، ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެންނެވުމުގެ ވައުދު ފުއްދަވާފައިވެއެވެ. އެފަދަ ދަތުރުފުޅުތަކުގައި، އެ ރަށްރަށުގެ ރައްޔިތުންނާއި ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއި މުއައްސަސާތަކުގެ ވެރިންނާ ބައްދަލުކުރައްވައި، ރަށު ތަރައްގީގެ ކަންކަމާއި ރައްޔިތުންގެ ދިރިއުޅުމާ ގުޅުންހުރި މުހިންމު މަޝްވަރާތައް އެމަނިކުފާނު ކުރައްވާފައިވެއެވެ. މިކަމުގެ ސަބަބުން ދެފަރާތުންވެސް ވަރަށް ފައިދާވާނެ ކަމަށް ބެލެވެއެވެ.

ވިޔަފާރިވެރިންނާ ބައްދަލުކުރެއްވުމަކީ ދިވެހި އިޤްތިޞާދަށް ކުރިމަތިވެފައިވާ ގޮންޖެހުންތަކާއި، އާ ފުރުޞަތުތަކާ ގުޅޭގޮތުން ސީދާ މައުލޫމާތު ހޯއްދަވައި، ސަރުކާރުން އަޅަންޖެހޭ ފިޔަވަޅުތަކަށް މަޝްވަރާ ދެއްވުމަށް ލިބިގެންދާނެ މުހިންމު ފުރުޞަތެކެވެ. މި ބައްދަލުކުރެއްވުމުގެ ސަބަބުން ވިޔަފާރީގެ މާހައުލު ރަނގަޅުކުރުމަށް ސަރުކާރުން ކުރާ މަސައްކަތަށް އިތުރު ބާރެއް ލިބިގެންދާނެ ކަމަށް ބެލެވެއެވެ.