ރައީސް މުޢިއްޒު ކުދި އަދި މެދުފަންތީގެ ވިޔަފާރިވެރިންނާ މިރޭ ބައްދަލުކުރައްވަނީ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި ވިޔަފާރިވެރިންނާ ބައްދަލުކުރެއްވުމަށް ފަށްޓަވާ ސިލްސިލާ ބައްދަލުވުންތަކުގެ ތެރެއިން ކުދި އަދި މެދުފަންތީގެ ވިޔަފާރިވެރިންނާ މިރޭ 20:30 ގައި ސޯޝަލް ސެންޓަރުގައި ބައްދަލުކުރައްވާނެއެވެ. މި ބައްދަލުވުމުގެ މަޤްސަދަކީ އެ ވިޔަފާރިވެރިންގެ ހުރި ކަންބޮޑުވުންތަކާއި ޚިޔާލު ހޯއްދެވުމެވެ.
ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި މިރޭ ބާއްވާ ބައްދަލުވުން ޚާއްސަކޮށްފައިވަނީ ކުދި އަދި މެދުފަންތީގެ ވިޔަފާރިވެރިންނަށް ކަމަށެވެ. މި ބައްދަލުވުމުގައި ބައިވެރިވުމަށްޓަކައި ދިވެހި އެންމެހާ ކުދި އަދި މެދުފަންތީގެ ވިޔަފާރިވެރިންނަށް ވަނީ ދަޢުވަތު އެރުވިފައެވެ. ސަރުކާރުން މި ބައްދަލުވުންތަކުގެ ޒަރިއްޔާއިން ދިވެހި ވިޔަފާރިތަކަށް ކުރިމަތިވާ ގޮންޖެހުންތައް ދެނެގަނެ، ހައްލުތަކެއް ހޯއްދެވުމަށް މަސައްކަތްކުރައްވާނެއެވެ.
މި ބައްދަލުވުން އޮންނާނީ ސޯޝަލް ސެންޓަރުގައި މިރޭ 20:30 ގައެވެ. ދިވެހި ވިޔަފާރިވެރިންނާ ބައްދަލުކުރެއްވުމަށް ރައީސުލްޖުމްހޫރިއްޔާ ނިންމަވާފައިވާއިރު، އެމަނިކުފާނު ވަނީ ދާދިފަހުން ދިވެހި މަސްވެރިންނާވެސް ބައްދަލުކުރައްވައި، އެ ފަރާތްތަކުގެ ޝުޢޫރުތައް އަޑުއައްސަވާފައެވެ. މިފަދަ ބައްދަލުވުންތަކަކީ އެކިއެކި ދާއިރާތަކުގެ ފަރާތްތަކާ ސީދާ ގުޅުން ބަދަހިކުރުމަށް މުހިންމު ފުރުސަތެކެވެ.
Ads by BMLރައީސުލްޖުމްހޫރިއްޔާ މުޢިއްޒުގެ ސަރުކާރުން ރައްޔިތުންނާ ގާތުން މަސައްކަތް ކުރެއްވުމުގެ ސިޔާސަތުގެ ދަށުން، މިހާރު ސިލްސިލާކޮށް ރައްޔިތުންނާ ބައްދަލުކުރެއްވުންތައް ކުރިއަށް ގެންދަވަމުންނެވެ. އެގޮތުން ރޭ ވަނީ މާލޭގެ ގަލޮޅު އަވަށްގެ ރައްޔިތުންނާ ބައްދަލުކުރައްވާފައެވެ. މާދަމާ ރޭ ހުޅުމާލެ ދެވަނަ ފިޔަވަހީގައި ދިރިއުޅޭ ރައްޔިތުންނާ ބައްދަލުކުރެއްވުމަށްވެސް ވަނީ ހަމަޖައްސަވާފައެވެ.
ރައީސުލްޖުމްހޫރިއްޔާގެ ސިޔާސަތުތަކުގެ ތެރޭގައި ރައްޔިތުންގެ ޚިޔާލާ މަޝްވަރާ ހޯއްދެވުމަށް ބައްދަލުކުރެއްވުންތައް ބޭއްވުން ހިމެނެއެވެ. ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން ރައްޔިތުންނާ ބައްދަލުކުރައްވާފައިވާއިރު، އެކިއެކި ސިނާޢަތްތަކަށް ޚާއްސަކޮށްގެންވެސް މިފަދަ ބައްދަލުވުންތައް އެމަނިކުފާނު ދަނީ ބާއްވަވަމުންނެވެ. މީގެ މަޤްސަދަކީ ދައުލަތުގެ ސިޔާސަތުތައް ރައްޔިތުންނަށް ފައިދާވާނެހެން އެކުލަވާލުމެވެ.
Ads by MACL
