ބުދަ، 18 ނޮވެމްބަރު 2026
ޚަބަރު

މާފަރު އެއާޕޯޓުގެ އާ އޭޕްރަން ހުޅުވައި، ޓާމިނަލް އެކްސްޓެންޝަން ބިންގާ އަޅައިފި

މާފަރު އެއާޕޯޓުގެ އާ އޭޕްރަން ހުޅުވައި، ޓާމިނަލް އެކްސްޓެންޝަން ބިންގާ އަޅައިފި

ނ. މާފަރު އިންޓަނޭޝަނަލް އެއާޕޯޓުގެ އާ އޭޕްރަން ރަސްމީކޮށް ހުޅުވައި، ޓާމިނަލް އެކްސްޓެންޝަން އިމާރާތުގެ ބިންގާ އަޅައި އަމަލީ މަސައްކަތް މިއަދު ފަށައިފިއެވެ.

ސަރަހައްދީ ގުޅުންތަކާއި އޭވިއޭޝަން ދާއިރާގެ އިންފްރާސްޓްރަކްޗާ އިތުރަށް ތަރައްގީކުރުމަށް އެޅުނު މުހިންމު ފިޔަވަޅެއްގެ ގޮތުގައި މިކަން ސިފަކުރެވޭއިރު، މީގެ ސަބަބުން އެއާޕޯޓުގެ ޚިދުމަތްތައް ފުޅާވެ، ދަތުރުފަތުރުގެ ދާއިރާއަށް ބޮޑު ކުރިއެރުމެއް ލިބިގެންދާނެއެވެ.

މިކަމާ ގުޅިގެން މިއަދު ބޭއްވި ހާއްސަ ރަސްމިއްޔާތެއްގައި އެ އެއާޕޯޓުގެ އެކްސްޓެންޝަން އިމާރާތުގެ އާ އިމާރާތުގެ ބިންގާ އަޅާފައިވެއެވެ. މި ރަސްމިއްޔާތުގައި މޯލްޑިވިއަންގެ އިސްވެރިންނާއި އެމްޓީސީސީގެ މެނޭޖިންގް ޑިރެކްޓަރު ޑީ.ސީ.ޕީ (ރޓ) އަހުމަދު ސައުދީ ބައިވެރިވެވަޑައިގެންނެވިއެވެ. މި މަސައްކަތް ފެށުމާއެކު މާފަރު އެއާޕޯޓުގެ ކެޕޭސިޓީ އިތުރުވެ، ފަތުރުވެރިންނަށާއި ދަތުރުވެރިންނަށް ފަސޭހަތަކެއް ލިބިގެންދާނެއެވެ.

އައިލެންޑް އޭވިއޭޝަނުން ހާމަކުރެއްވި ގޮތުގައި، މާފަރު އިންޓަނޭޝަނަލް އެއާޕޯޓުގެ ޓާމިނަލް 900 އަކަމީޓަރު ބޮޑުކުރުމަށް ނިންމާފައިވެއެވެ. ދެ ފަންގިފިލާއަށް ތަރައްގީކުރާ މި ޓާމިނަލްގައި ވީއައިޕީގެ އިތުރު ލައުންޖްތަކެއް ހުންނާނެއެވެ. މި މަސައްކަތް ކުރިއަށް ގެންދިއުމަށް ޗައިނާގެ ކުންފުންޏަކާ މިދިޔަ ނޮވެމްބަރު މަހު އެއްބަސްވުމުގައި ސޮއިކޮށްފައިވާއިރު، އަމަލީ މަސައްކަތް މިހާރު ވަނީ ފަށާފައެވެ.

މާފަރު އިންޓަނޭޝަނަލް އެއާޕޯޓު ހުޅުވައިފައިވަނީ 2019 ވަނަ އަހަރުގެ ޑިސެމްބަރު މަހުގައެވެ. އަދި މިތަން އިންޓަނޭޝަނަލް އެއާޕޯޓެއްގެ ގޮތުގައި ބޭނުންކުރަން ފަށާފައިވަނީ 2020 ވަނަ އަހަރުގެ ޖުލައިމަހުގެ 1ވަނަ ދުވަހުން ފެށިގެންނެވެ. މިއީ އަބޫދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން 60 މިލިއަން ޑޮލަރު ހަރަދުކޮށްގެން ތަރައްގީކުރެވުނު މުހިންމު މަޝްރޫއެކެވެ.

މިހާރު މި އެއާޕޯޓު ހިންގަނީ ސަރުކާރުގެ އެއާލައިން ހިންގާ ކުންފުނި އައިލެންޑް އޭވިއޭޝަނުންނެވެ. ޓާމިނަލް ބޮޑުކުރުމުގެ މަސައްކަތް ނިމުމުން، މި އެއާޕޯޓުގެ ޚިދުމަތްތައް އިތުރަށް ހަރުދަނާވެ، ބައިނަލްއަޤްވާމީ ދަތުރުފަތުރުގެ ދާއިރާގައި ނ. މާފަރުގެ ދައުރު އިތުރަށް ފުޅާވެގެންދާނެއެވެ. މީގެ ސަބަބުން އަތޮޅުގެ އިގްތިސާދީ ކުރިއެރުމަށް ވެސް ބޮޑު އެހީތެރިކަމެއް ލިބިގެންދާނެއެވެ.