ކ. ގުރައިދޫ ކައިރިން 6 ފޫޓުގެ ކިނބުލެއް ހިފައި ސިފައިންގެ ބެލުމުގެ ދަށަށް ގެންގޮސްފި
ކ. ގުރައިދޫގެ ހުޅަނގު ދެކުނުން 1.5 ނޯޓިކަލް މޭލު ބޭރުން 6 ފޫޓުގެ ބޮޑު ކިނބުލެއް ހިފައި، އެ ކިނބޫ މިހާރު ސިފައިންގެ ބެލުމުގެ ދަށަށް ގެންގޮސްފައިވާ ކަމަށް އެމްއެންޑީއެފްއިން ހާމަކޮށްފިއެވެ.
މަސްބާނަން ދިޔަ "ރަންމުތް" ނަމަކަށް ކިޔާ ދޯންޏަކުން ފުރަތަމަ ފެނުނު މި ކިނބޫ، ސިފައިންނާ ހަވާލުކޮށްފައިވަނީ ރާއްޖޭގެ ސަރަހައްދުން އެފަދަ ދިރުމެއް ފެނުން ނާދިރު ކަމަށްވާތީއެވެ.
މި ކިނބޫ ފެނިފައިވަނީ ގުރައިދޫއާ ކައިރިން މަސްބާނަން ދިޔަ ދޯންޏަކަށް ކަމަށާއި، ދޯނީގެ ފަޅުވެރިން ވަނީ ބޮޑު ސަމާލުކަމަކާއެކު މި ކިނބޫ ހިފާ ސަލާމަތްކޮށްފައެވެ. އާންމުކޮށް ރާއްޖޭގެ ކަނޑުތަކުން ނުފެންނަ މިފަދަ ދިރުމެއް ފެނުމާއެކު، ސިފައިންނަށް ވަނީ ހަބަރު ދީފައެވެ. ސިފައިން ވަގުތުން އެ ސަރަހައްދަށް ގޮސް ކިނބޫ ވަނީ އެމީހުންގެ ބެލުމުގެ ދަށަށް ގެނެސްފައެވެ.
Ads by BMLއެމްއެންޑީއެފްއިން ބުނި ގޮތުގައި، މި ކިނބޫ މިހާރު އޮތީ ސިފައިންގެ ބެލުމުގެ ދަށުގައި ކަމަށާއި، ރާއްޖެއަށް ނާދެވޭ ގޮތަށް، ރާއްޖޭގެ އިގްތިސާދީ ސަރަހައްދުން ބޭރަށް ދޫކޮށްލުމުގެ މަސައްކަތް އަންނަނީ ކުރަމުންނެވެ. މިގޮތަށް އަމަލުކުރުމުގެ ބޭނުމަކީ ކިނބޫގެ ސަލާމަތް ކަށަވަރުކުރުމުގެ އިތުރުން، އާންމުންނަށް އެހެން ކަމެއް ދިމާވިޔަ ނުދިނުމަށް އަޅާ ފިޔަވަޅެކެވެ.
ކިނބުލަކީ ރާއްޖޭގައި އާންމުކޮށް އުޅޭ ދިރުމެއް ނޫން ކަމަށްވިޔަސް، ދޭތެރެދޭތެރެއިން ރާއްޖޭގެ ސަރަހައްދަށް ކިނބޫ ވަދެ އުޅޭތަން ފެނެއެވެ. މީގެކުރިން ވެސް ރާއްޖޭގެ އެކި ސަރަހައްދުތަކުން ކިނބޫ ފެނިފައިވާ އިރު، މިފަދަ ކޮންމެ ފަހަރަކު ވެސް ސިފައިން ދަނީ އެއަށް ހައްގު ސަމާލުކަން ދީ، އެއަށް އެކަށީގެންވާ ގޮތަށް ކަންތައްތައް ކުރަމުންނެވެ. މިފަދަ ދިރުންތައް ރާއްޖޭގެ ކައިރިއަށް އަންނަ ސަބަބުތަކަކީ އަދި ސާފު ނުވާ ކަންކަމެވެ.
Ads by MACL
