އަދާލަތު ޕާޓީގެ ހަތަރުވަނަ ދައުރުގެ ރައީސްކަމަށް ކުރިމަތިލުމުގެ ފުރުސަތު ހުޅުވާލައިފި
އަދާލަތު ޕާޓީގެ ހަތަރުވަނަ ދައުރުގެ ރައީސްގެ މަޤާމަށް ކުރިމަތިލުމުގެ ފުރުސަތު ހުޅުވާލައިފި އެވެ.
މި މަޤާމަކީ މިހާރު ޝެއިޚް އިމްރާން އަބްދުﷲ ފުރުއްވަމުން ގެންދަވާ މަޤާމެވެ. މިކަން އެ ޕާޓީން އާދިއްތަ ދުވަހު އިއުލާންކުރިއިރު، ކުރިމަތިލުމުގެ ސުންގަޑިއަކީ 2026 ވަނަ އަހަރުގެ ޖެނުއަރީ މަހުގެ 8 ވަނަ ދުވަހުގެ 16:00 ކަމަށް ބުނެފައި ވެއެވެ. އިންތިޚާބު 2025 ވަނަ އަހަރުގެ ޖެނުއަރީ މަހުގެ 31 ވަނަ ދުވަހު ބޭއްވުމަށް ވަނީ ހަމަޖެހިފައެވެ.
އަދާލަތު ޕާޓީން ނެރުނު ބަޔާނެއްގައި ބުނެފައިވަނީ، އެ ޕާޓީގެ ދުސްތޫރުގެ 38.1 (މ) ވަނަ މާއްދާގެ ދަށުން މި މަޤާމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ. މި އިންތިޚާބުގައި ވާދަކުރެވޭނީ 2025 ވަނަ އަހަރުގެ ޑިސެންބަރު މަހުގެ 28 ވަނަ ދުވަހާ ހަމައަށް އަދާލަތު ޕާޓީގެ ދަފްތަރުގައި ރަޖިސްޓްރީ ވެފައިވާ ފަރާތްތަކަށް ކަމަށް ވެސް އެ ޕާޓީން ހާމަކުރިއެވެ. މި މަޤާމަށް ކުރިމަތިލާ ފަރާތްތަކުގެ ކިބައިގައި ވަކި ޝަރުތުތަކެއް ފުރިހަމަވާން ޖެހެއެވެ.
Ads by BMLއެގޮތުން، އެފަރާތަކީ މުސްލިމަކު ކަމުގައިވުމާއި، ސުންނަތް ޖަމާޢަތުގެ މީހަކު ކަމުގައިވުމާއި، ދިވެހި ރައްޔިތެއް ކަމުގައިވުމާއި، ބޭރު ޤައުމެއްގެ ނެޝަނެލިޓީ ނެތް މީހަކު ކަމުގައި ވުމަކީ މަޖުބޫރު ޝަރުތުތަކެކެވެ. މީގެ އިތުރުން ބުއްދި ސަލާމަތުން ހުރި މީހަކު ކަމުގައިވުމާއި، މީލާދީ ސަނަތުން 30 އަހަރު ފުރިފައިވާ މީހަކު ކަމުގައިވުން ވެސް ޝަރުތުތަކުގެ ތެރޭގައި ހިމެނެއެވެ.
އަދި، ދީނުގައި ޙައްދެއް ކަނޑައެޅިފައިވާ ކުށެއް ކޮށްފައިވާކަން ޝަރީޢަތަށް ސާބިތުވެފައިވާ މީހަކު ކަމުގައި ނުވުމާއި، ޚިޔާނަތުގެ މައްސަލައެއް ނުވަތަ ބަދުއަޚްލާޤީ މައްސަލައެއް އޭނާގެ މައްޗަށް ޝަރީޢަތުން ސާބިތުވެފައިވާ މީހަކު ކަމުގައި ނުވުން ވެސް ޝަރުތުތަކުގެ ތެރޭގައި ހިމެނެއެވެ. އަދި ޕާޓީގެ މެންބަރެއް ކަމުގައި ވުމުގެ އިތުރުން، މި ޕާޓީގެ މަޖިލިސްތަކުގެ ތެރެއިން މަޖިލީހެއްގައި މަދުވެގެން ދެ އަހަރު އުޅެ، ޕާޓީގެ އުޞޫލުތަކާއި ހަމަތަކަށް ހޭނިފައިވާ މީހަކު ކަމުގައި ވުން ވެސް ވަނީ ކަނޑައަޅާފައެވެ. ތަޢުލީމީ ގޮތުން، ދައުލަތުގެ ކަމާބެހޭ އިދާރާއިން ޤަބޫލުކުރާ ޔުނިވަރސިޓީއަކުން ނުވަތަ މުއައްސަސާއަކުން ދަށްވެގެން ޑިޕްލޮމާ ހާސިލުކޮށްފައިވުމާއި، މަދުވެގެން ތިން އަހަރު ދުވަހުގެ ޢަމަލީ ތަޖުރިބާ ލިބިފައިވުން ވެސް ރައީސްކަމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި ހިމެނެއެވެ.
އަދާލަތު ޕާޓީން ބުނީ ރައީސްގެ މަޤާމަށް އެންމެ މީހަކު ކުރިމަތިލައިފި ނަމަ އާންމުންގެ މެދުގައި ފެންނަ ނުފެންނަ ވޯޓެއް ނަގާނެ ކަމަށެވެ. ނަމަވެސް، ޕާޓީގެ ރައީސްކަމަށް އެކަކަށް ވުރެ ގިނަ މީހުން ވާދަކުރާ ނަމަ، ޕާޓީގެ މެންބަރުންގެ މެދުގައި ސިއްރު ވޯޓެއް، 2025 ވަނަ އަހަރުގެ ޖެނުއަރީ މަހުގެ 31 ވަނަ ދުވަހު، އިލެކްޓްރޯނިކް ވޯޓިންގ މެދުވެރިކޮށް ނަގާނެ ކަމަށް ވެސް އެ ބަޔާނުގައި ބުނެފައިވެއެވެ. ރައީސްކަމަށް ޝައުގުވެރިވާ ފަރާތްތަކުން ފޯމް ހުށަހަޅަން ޖެހޭ އެންމެ ފަހު ތާރީޚަކީ 2026 ވަނަ އަހަރުގެ ޖެނުއަރީ މަހުގެ 8 ވަނަ ދުވަހުގެ 16:00 އެވެ.
Ads by MACL
