ބުދަ، 18 ނޮވެމްބަރު 2026
ޚަބަރު

ރައީސްގެ ވައުދުފުޅާ އެއްގޮތަށް އުނގޫފާރާއި ދުވާފަރު މާދަމާ ހާއްސަ ފެރީއަކުން ގުޅާލަނީ

ރައީސްގެ ވައުދުފުޅާ އެއްގޮތަށް އުނގޫފާރާއި ދުވާފަރު މާދަމާ ހާއްސަ ފެރީއަކުން ގުޅާލަނީ

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެވަޑައިގެންފައިވާ ވައުދުފުޅާ އެއްގޮތަށް، ރ. އުނގޫފާރާއި އެ އަތޮޅު ދުވާފަރާ ދެމެދު ހާއްސަ ފެރީގެ ނިޒާމަކުން މާދަމާ ގުޅާލުމަށް ވަނީ ނިންމާފައެވެ. މިއީ މި ދެ ރަށުގެ ދެމެދުގައި އޮންނަ އިޖުތިމާއީ އަދި އިގްތިސާދީ ގުޅުން އިތުރަށް ބަދަހިކުރުމަށް ރައީސުލްޖުމްހޫރިއްޔާ ނިންމެވި މުހިންމު ނިންމެވުމެކެވެ.

މާދަމާ ފެށުމަށް ހަމަޖެހިފައިވާ މި ފެރީގެ ހިދުމަތަކީ، މިހާރުވެސް އެ ސަރަހައްދުގައި ދެމުންދާ އާރްޓީއެލް ފެރީގެ ހިދުމަތުގެ އިތުރަށް ތައާރަފްކުރެވުނު ހާއްސަ ހިދުމަތެކެވެ. މި އާ އިންތިޒާމުގެ ދަށުން ކޮންމެ ދުވަހަކު ވެސް އުނގޫފާރާއި ދުވާފަރާ ދެމެދު ތިން ދަތުރު ކުރުމަށް ވަނީ ތާވަލުކުރެވިފައެވެ.

މި މަޝްރޫއަކީ ރައީސުލްޖުމްހޫރިއްޔާ އެ އަތޮޅަށް ކުރެއްވި ޒިޔާރަތުގައި ރައްޔިތުންގެ ފަރާތުން ހުށަހެޅި އެދުމަކަށް ބިނާކޮށް، އެމަނިކުފާނު ވެވަޑައިގެންނެވި ވައުދުފުޅެކެވެ. މި ހިދުމަތުގެ ސަބަބުން ދެ ރަށުގެ ރައްޔިތުންނަށް ލުއިފަސޭހަކަމާއެކު ދަތުރުފަތުރު ކުރެވޭނެ މަގު ތަނަވަސްވެ، ވަގުތާއި ހަރަދު ސަލާމަތްވެގެންދާނެއެވެ.

މީގެ ހަގީގީ މަންފާ މުޅި ރ. އަތޮޅުގެ އިގްތިސާދަށް ކުރާނެއެވެ. އަތޮޅުގެ މައި ދެ މަރުކަޒެއް މިފަދަ ގާތް ގުޅުމަކުން ގުޅާލުމަކީ މުޅި އަތޮޅުގެ ވިޔަފާރިއާއި، ސިއްހީ ހިދުމަތް ހޯދުމުގައާއި، އަދި އެހެނިހެން ހިދުމަތްތައް ހޯދުމުގައި މުޅި އަތޮޅަށް ލިބިގެންދާނެ ބޮޑު ކުރިއެރުމެކެވެ. ހާއްސަކޮށް އުނގޫފާރުގައި ހުންނަ ރީޖަނަލް ހޮސްޕިޓަލުން ހިދުމަތް ހޯދާ ރައްޔިތުންނަށް މިއީ ލިބިގެންދާނެ ވަރަށް ބޮޑު ތަސައްލީއެކެވެ.

ސަރުކާރުގެ މި ނިންމެވުމަކީ ރާއްޖޭގެ ރަށްތައް އެކި ދަތުރުފަތުރުގެ ނިޒާމުތަކުން ގުޅާލައި، ރައްޔިތުންނަށް ބޭނުންވާ އަސާސީ ހިދުމަތްތައް ފަސޭހައިން ލިބޭނެ މަގު ފަހިކޮށްދިނުމަށް ކުރަމުންދާ މަސައްކަތުގެ ތެރެއިން ކުރެވުނު ވަރަށް މުހިންމު މަސައްކަތެކެވެ.