ބުދަ، 18 ނޮވެމްބަރު 2026
ޚަބަރު

އީރާނުން ދަނީ، އެމެރިކާ އާއި އިޒްރޭލުގެ އަމާޒުތަކަށް ހަމަލާ ދިނުމުގައި ބޮޑެތި ކާމިޔާބީތަކެއް ހޯދަމުން: ޗީފްސް އޮފް ސްޓާފް މާކް މިލީ

އެމެރިކާގެ ޖޮއިންޓް ޗީފްސް އޮފް ސްޓާފްގެ ކުރީގެ ޗެއާމަން ޖެނެރަލް މާކް މިލީ
އެމެރިކާގެ ޖޮއިންޓް ޗީފްސް އޮފް ސްޓާފްގެ ކުރީގެ ޗެއާމަން ޖެނެރަލް މާކް މިލީ

އީރާނާ ކައިރީގައި ހުރި އެމެރިކާގެ ހުރިހާ އަސްކަރީ މަރުކަޒުތަކާއި އައްސޭރިފަށުގެ ވަސީލަތްތައް ވަނީ ސުންނާފަތިވެފައިވާ ކަމަށާއި އީރާނުން އެމެރިކާ އާއި އިސްރާއީލުގެ އަމާޒުތަކަށް ދެމުންދާ ހަމަލާތަކުގައި ބޮޑެތި ކާމިޔާބީތަކެއް ހޯދަމުންދާކަމަށް އެމެރިކާގެ ޖޮއިންޓް ޗީފްސް އޮފް ސްޓާފްގެ ކުރީގެ ޗެއާމަން ޖެނެރަލް މާކް މިލީ ވިދާޅުވެއްޖެ އެވެ.

އަސްކަރީ ހާލަތާއި ލޮޖިސްޓިކްސް


ޖެނެރަލް މިލީ ވިދާޅުވީ، ހީކުރި ވަރަށް ވުރެ މާ ފުރިހަމައަށް އީރާނުން ހަމަލާތައް ރާވާފައިވާ ކަމަށާއި، މިހާރު އެމެރިކާގެ ސަޕްލައި އަދި ލޮޖިސްޓިކްސްއަށް ބަރޯސާވާން ޖެހިފައިވަނީ އިންޑިއާގެ ބަނދަރުތަކަށް ކަމަށެވެ.
"އީރާނުން ވަނީ އަހަރެމެން ހީކުރި ވަރަށް ވުރެ މާ ވަރުގަދަ އަށް ހަނގުރާމައަށް ތައްޔާރުވެފަ. އެމީހުންގެ ރޭވުންތައް ރާވާފައިވަނީ ވެސް މާ ފުރިހަމަ އަށް. މިހާރު އަހަރެމެން މިތިބީ ވަރަށް ވެސް ނާޒުކު ހާލަތެއްގައި،" މިލީ ވިދާޅުވިއެވެ.

އީރާނުގެ ހުރިހާ ޕްރޮވިންސްތަކެއްގެ އަޑީގައި ބިނާކޮށްފައިވާ މިސައިލް ސިޓީތަކަށް އެއްވެސް ގެއްލުމެއް ލިބިފައި ނުވާކަމަށާއި، އެ ގައުމުގައި ހުސްނުވާނެހާ ގިނަ މިސައިލް ރިޒާވް އެބަހުރި ކަމަށް އޭނާ ވިދާޅުވިއެވެ. މީގެ އިތުރުން، ރަޝިޔާ އާއި ޗައިނާއިން މި ހަނގުރާމަ ވަރަށް ގާތުން ބަލަމުންދާ ކަމަށާއި، ތެހެރާނަށް ބޭނުންވާ ޖާސޫސީ މައުލޫމާތު ފޯރުކޮށްދެމުންދާ ކަމަށްވެސް އޭނާ ހާމަކުރެއްވިއެވެ.

ސިޔާސީ ނިންމުންތަކަށް ފާޑުކިޔުން


މި ހަނގުރާމައަކީ އެކަށީގެންވާ ޕްލޭނެއް ނެތި ކުރިއަށްގެންދާ ހަނގުރާމައެއްގެ ގޮތުގައި ފާހަގަކުރައްވަމުން، މިލީ ވިދާޅުވީ މިއީ ހަމައެކަނި މައްސަލަތައް އިތުރުވާނެ ކަމެއް ކަމަށެވެ. މި ނިންމުމުގެ ފަހަތުގައި ވަނީ އެމެރިކާގެ ސެކްރެޓަރީ އޮފް ވޯ ޕީޓް ހެގްސެތް އާއި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަދި ރައީސް ޓްރަމްޕްގެ ވަށައިގެން ތިބި ލޮބީ ގްރޫޕްތައް ކަމަށް އޭނާ ތުހުމަތު ކުރެއްވިއެވެ.

ކުރިމަގުގެ ނުރައްކާ


މި ހަނގުރާމަ ދިގުލައިގެން ދިއުމަކީ އެމެރިކާ އިތުރަށް ބަލިކަށިވެ، ޗައިނާ އާއި ރަޝިޔާއަށް ލިބޭނެ ބޮޑު ފުރުސަތެއް ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ. އެމެރިކާގެ އަސްކަރީ ވަސީލަތްތައް އެހެން ސަރަހައްދުތަކުން އީރާނާ ދިމާލަށް ބަދަލުކުރުމަކީ ޓައިވާން، ޔޫކްރެއިން އަދި ދެކުނު ކޮރެއާ ފަދަ ސަރަހައްދުތަކުގައި ރަޝިޔާ އާއި ޗައިނާގެ ބާރު ގަދަވުމަށް ހުޅުވޭ ދޮރެކެވެ.

މި ނާޒުކު ދަނޑިވަޅުގައި، ދެ ފަރާތް މަޝްވަރާގެ މޭޒަށް ގެނައުމަށް ތިންވަނަ ގައުމެއްގެ މެދުވެރިވުން މުހިންމު ކަމަށް ބެލެވެއެވެ. އެހެންނޫންނަމަ، މި ހަނގުރާމައިގެ ސަބަބުން މުޅި ދުނިޔޭގެ މަސްލަހަތު ގެއްލިގެން ހިނގައިދާނެ ކަމުގެ ބިރު ވަނީ ހީވެފައެވެ.