"އަބޫ މޫސާ"އިން ޔޫއޭއީގެ ރައްޔިތުން ބޭރުކޮށް އީރާނުގެ ދިދަ އެ ތަނުގައި ނަގަން ގޮވާލައިފި
"އަބޫ މޫސާ" ގައި ދިރިއުޅޭ ޔުނައިޓެޑް އަރަބް އެމިރޭޓްސް (ޔޫއޭއީ) ގެ ރައްޔިތުން އެ ރަށުން ދާއިމީކޮށް ބޭރުކުރުމަށް އީރާނުގެ ދިދަ އެ ރަށުގައި ނެގުމަށް އީރާނުގެ މަޖިލީހުގެ ނޭޝަނަލް ސެކިއުރިޓީ ކޮމިޓީގެ ތަރުޖަމާނު އިބްރާހިމް ރެޒާއީ ގޮވާލައްވައިފި އެވެ.
އަބޫ މޫސާއަކީ ފާރިސީ ކަނޑުއޮޅީގެ އިރުމަތީގައި، ހޮރްމުޒް ކަނޑުއޮޅީގެ ދޮރުމަތީގައި އޮންނަ 12.8 އަކަކިލޯމީޓަރުގެ ރަށެކެވެ. މި ރަށް މިހާރު ބަލަހައްޓަމުން ގެންދަނީ އީރާނުން ކަމަށް ވީނަމަވެސް، އެ ރަށުގެ މިލްކުވެރިކަމާ މެދު ޔުނައިޓެޑް އަރަބް އެމިރޭޓްސްއިން އިއުތިރާޒު ކުރެ އެވެ.
ރެޒާއީ ވިދާޅުވީ އެ ރަށަކީ އަބަދަށްޓަކައި އީރާނުގެ ތަނެއްގެ ގޮތުގައި ބޭއްވުމަށްޓަކައި މުޅި ރަށުގައި އީރާނުގެ ދިދަ ނަގަންޖެހޭ ވަގުތު ޖެހިއްޖެ ކަމަށެވެ.
Ads by BML"އަބޫ މޫސާ ރަށުން އެމިރޭޓްސްގެ ރައްޔިތުން ދާއިމީކޮށް ބޭރުކޮށް، މުޅި ރަށުގައި އީރާނުގެ ދިދަ އުފުލައި، އެއީ އީރާނުގެ ތަނެއްގެ ގޮތުގައި އަބަދަށް ބޭއްވުމަށް މިއީ އެންމެ އެކަށީގެންވާ ވަގުތު" ރެޒާއީ ވިދާޅުވި އެވެ. އޭނާ މިފަދައިން ގޮވާލައްވާފައި މިވަނީ އެ ސަރަހައްދުގެ މިލްކުވެރިކަމާ މެދު އުފެދިފައިވާ ދިގު މުއްދަތުގެ ހިޔާލުތަފާތުވުންތަކާ ގުޅިގެންނެވެ.
މީގެ އިތުރުން، އެ ރަށުން ބޭރުކުރެވޭ ޔޫއޭއީގެ ރައްޔިތުން ދިރިއުޅޭ ގެތައް، މީނާބް ސްކޫލް ހާދިސާގައި މަރުވި ކުދިންގެ އާއިލާތަކަށް ދިނުމަށް ވެސް ރެޒާއީ ވަނީ ހުށަހަޅުއްވާފަ އެވެ. އޭނާ ވިދާޅުވީ މިއީ އެ އާއިލާތަކަށް ދެވޭ އިހުތިރާމެއްގެ ގޮތުގައި ކުރެވިދާނެ ކަމެއް ކަމަށެވެ.
އަބޫ މޫސާ ރަށަކީ ގަލްފުގެ ސަރަހައްދުގައި އޮންނަ، އީރާނާއި ޔޫއޭއީއާ ދެމެދު މިލްކުވެރިކަމުގެ މައްސަލައިގައި ބޮޑެތި ދެބަސްވުންތަކެއް އުފެދިފައިވާ ތިން ރަށުގެ ތެރެއިން އެއް ރަށެވެ.
އީރާނުގެ މަޖިލީހުގެ އިސް މެންބަރެއްގެ ފަރާތުން މިފަދަ ގޮވާލުމެއް އައުމަކީ ދެ ގައުމުގެ ދެމެދުގައި އޮތް ސިޔާސީ ނުތަނަވަސްކަން އިތުރަށް ބޮޑުވެގެންދާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.
Ads by MACL
