"މައިންބަފައިންނަށް އޯގާތެރިވެ، ކަމޭހިތުމަކީ ސުވަރުގެ ވަނުމަށް އޮތް އެންމެ ފަސޭހަ މަގު"
މައިންބަފައިންނަށް ކަމޭހިތުމާއި އެމީހުންނަށް އިޙުސާންތެރިވުމަކީ އިސްލާމްދީނުގައި ކިހާ މަތިވެރި ދަރަޖައެއް ދެވިފައިވާ ކަމެއްކަން މިއަދުގެ ހުކުރު ނަމާދުގެ ޚުޠުބާގައި ހަނދާންކޮށްދީފިއެވެ.
"މައިންބަފައިންނަށް ކަމޭހިތުން" މި މައުޟޫޢުއަށް ރާއްޖޭގެ އެކި ކަންކޮޅުތަކުގައި މިއަދު އިއްވި ޚުޠުބާގައި ބުނެފައިވަނީ، މައިންބަފައިންނަކީ އިންސާނާ ދުނިޔެއަށް އައުމުގެ ސަބަބު ކަމަށާއި، އެ ދެމީހުންގެ ޤުރުބާނީގެ އަގު ނުހަނު ބޮޑު ކަމަށެވެ.
ޚުޠުބާގައި ފާހަގަކުރި ގޮތުގައި، ކީރިތި ޤުރުއާނުގެ ހަތް ތަނެއްގައި މާތް ﷲ މައިންބަފައިންގެ ވާހަކަ ބަޔާންކުރައްވާފައިވާއިރު، އޭގެ ތެރެއިން ހަތަރު ތަނެއްގައި އެކަލާނގެއަށް އަޅުކަންކުރުމަށް އެންގެވުމާއެކު މައިންބަފައިންނަށް ކިޔަމަންތެރިވުމަށް ވަނީ އަންގަވާފައެވެ.
ޚާއްޞަކޮށް މުސްކުޅި އުމުރަށް އެޅުމުން އެ މީހުންނަށް ނުރުހުމުގެ ކިތަންމެ ކުޑަ ބަހެއްވިޔަސް ނުބުނުމަށާއި، އޯގާތެރިކަމާއެކު މުޢާމަލާތްކުރުމަށް އަންގަވާފައިވާކަން ހަނދާންކޮށްދެމުން، މައިންބަފައިންނަށް ކަމޭހިތުމަކީ ސުވަރުގެ ވަނުމަށް އޮތް އެންމެ ފަސޭހަ މަގުކަން ބަޔާންކޮށްދެއްވިއެވެ.
ޖިހާދަށްވުރެ މަތިވެރި ޢަމަލެއް
މާތް ﷲ ގެ ޙަޟުރަތުގައި އެންމެ ލޮބުވެތިކަން ބޮޑުވެގެންވާ ޢަމަލުތަކުގެ ތެރޭގައި، ނަމާދު އޭގެ ވަގުތުގައި އަދާކުރުމަށްފަހު ދެން އެންމެ އިސްކަމެއް ދެވިފައިވަނީ މައިންބަފައިންނަށް ހެޔޮކޮށް ހިތުމަށްކަން ޚުޠުބާގައި ތަފްޞީލުކޮށްދިނެވެ. މިއީ ﷲ ގެ މަގުގައި ޖިހާދުކުރުމަށްވުރެ ވެސް މަތިވެރިވެގެންވާ ކަމެއްކަން ސާބިތުކޮށްދިނުމުގެ ގޮތުން، ޖިހާދުކުރުމަށް ދިއުމުގެ ހުއްދައަށް އެދިވަޑައިގެންނެވި ޞަޙާބީއަކަށް، އެކަލޭގެފާނުގެ މައިންބަފައިންނަށް ޚިދުމަތްކުރުމުގައި ޖިހާދުކުރުމަށް ނަބިއްޔާ ﷺ އިރުޝާދުދެއްވި ހާދިސާ ޚުޠުބާގައި ގެނެސްދީފައިވެއެވެ.
ސަލަފުއްޞާލިޙުންގެ ނަމޫނާ
މައިންބަފައިންނަށް ހެޔޮކޮށް ހިތުމުގައި އިސްލާމީ އުންމަތުގެ ސަލަފުއްޞާލިޙުން ދައްކަވާފައިވާ ލާމަސީލު ނަމޫނާތަކަށް ވެސް ޚުޠުބާގައި އަލިއަޅުވާލިއެވެ. އެގޮތުން، ޔަމަނުގެ މީހަކު އޭނާގެ މަންމަ ބުރަކަށިމަތީގައި އުފުލައިގެން ހުރެ ކަޢުބާގެ ވަށައިގެން ޠަވާފުކުރި ނަމަވެސް، މަންމަ ވިހެއުމުގެ ތެރޭގައި އުފުލި ވޭންތަކުގެ ތެރެއިން އެންމެ ވޭނެއްގެ ޙައްޤުވެސް އަދާނުކުރެވޭނެ ކަމަށް ޢަބްދުﷲ ބިން ޢުމަރު ރަޟިޔަﷲ ޢަންހުމާ ވިދާޅުވި ބަސްފުޅު ފާހަގަކުރިއެވެ. އަދި އުވައިސް އަލްޤަރްނީ ރަޙިމަހުﷲ އަށް މަތިވެރި ދަރަޖަ ލިބިވަޑައިގަތީ މަންމައަށް ކުރެއްވި ޚިދުމަތުގެ ސަބަބުންކަން ބަޔާންކުރިއެވެ.
ޚުޠުބާ ނިންމާލަމުން، މިއަދުގެ މުޖުތަމަޢުގައި ބައެއް މީހުންނަށް، މައިންބަފައިންނަށް ފައިސާކޮޅެއް ދިނުމުން އެ މީހުންގެ ޙައްޤު އަދާކުރެވުނީކަމަށް ހީކުރެވޭ ކުށްހީ އިޞްލާޙުކޮށްދިނެވެ. މައިންބަފައިން ބޭނުންވަނީ ފައިސާއަށްވުރެ ބޮޑަށް ދަރިންގެ ލޯތްބާއި، އަޅާލުމާއި، އެކުގައި ހޭދަކުރާ ވަގުތުކަން ޚުޠުބާގައި ނަޞޭޙަތްތެރިވިއެވެ.
Ads by MACL
