ބުދަ، 18 ނޮވެމްބަރު 2026
ޚަބަރު

ދެ އިންތިހާބު ދެމެދު އޮންނަނީ ސަރުކާރަށް ޖެއްސުންކުރާ ހަނގުރާމައިގެ 6 މަސް، އިންތިޚާބުތައް އެއްކޮށްލަންވީ އެ މައްސަލަ ހައްލުކުރަން: ފުއާދު

ރައީސް ޑރ. މުޙައްމަދު މުއިއްޒާއި އިލެކްޝަންސް ކޮމިޝަނުގެ ކުރީގެ ރައީސް ފުއާދު ތައުފީގު - ފޮޓޯ: ރައީސް އޮފީސް
ރައީސް ޑރ. މުޙައްމަދު މުއިއްޒާއި އިލެކްޝަންސް ކޮމިޝަނުގެ ކުރީގެ ރައީސް ފުއާދު ތައުފީގު - ފޮޓޯ: ރައީސް އޮފީސް

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށް ސަރުކާރުން ގެންގުޅުއްވާ ވިސްނުމަށް އިލެކްޝަންސް ކޮމިޝަނުގެ ކުރީގެ ރައީސް ފުއާދު ތައުފީގު ތާއީދު ކުރައްވައިފިއެވެ. ފުއާދު ވިދާޅުވީ ރިޔާސީ އިންތިހާބާއި މަޖިލިސް އިންތިހާބުގެ އިތުރުން ލޯކަލް ކައުންސިލް އިންތިހާބު ވެސް އެއް ދުވަހެއްގައި ބޭއްވުމަކީ އެންމެ ރަނގަޅު ގޮތް ކަމަށެވެ.

އެމްއެމްޓީވީ އާއި ވާހަކަދައްކަވަމުން ފުއާދު ވިދާޅުވީ، ރިޔާސީ އިންތިހާބާއި މަޖިލިސް އިންތިހާބާ ދެމެދު އޮންނަ ހަ މަސް ދުވަހުގެ މުއްދަތަކީ މިހާރު ސިޔާސީ ގޮތުން ހަނގުރާމައެއްގެ ގޮތުގައި ފެންނަ ދުވަސްތަކެއް ކަމަށެވެ.

"ދެ އިންތިހާބު ދެމެދު އޮންނަ ހަ މަސް މިހާރު ވެފައި މި އޮތީ ހަނގުރާމައިގެ ހަ މަހަށް. ސަރުކާރަށް ޖެއްސުން ކުރުމުގެ ހަ މަހަށް. ދެ އިންތިހާބު އެއް ދުވަހެއްގައި ބާއްވަންވީ އެ ހަ މަސް ދުވަހު ސަރުކާރަކަށް މަޖިލީހުގެ އެއްބާރުލުން ނުލިބޭތީ އެ މައްސަލަ ހައްލުކުރަން،" ފުއާދު ވިދާޅުވިއެވެ.

ސަރުކާރުގެ މަސައްކަތްތަކަށް ހުރަސްއެޅުން


ފުއާދު ފާހަގަކުރެއްވި ގޮތުގައި، ތާރީހަށް ބަލާއިރު ދެ އިންތިހާބު ދެމެދު ހޭދަވާ މުއްދަތުގައި އޭރަކު އޮންނަ ސަރުކާރަކަށް އިދިކޮޅު މަޖިލީސްތަކުން ދުއްތުރާކޮށް، ސަރުކާރުން ކުރިއަށްގެންދަން ބޭނުންވާ ތަރައްގީގެ މަޝްރޫއުތަކަށް ހުރަސްއަޅައެވެ. އަދި ރިޔާސީ ނިޒާމަކުން ވެރިކަން ކުރާ ގިނަ ގައުމުތަކުގައި މި ދެ އިންތިހާބު ބާއްވަނީ އެއް ދުވަހެއްގައި ކަން އޭނާ ފާހަގަކުރެއްވިއެވެ.

މީގެ ކުރިން އެމްޑީޕީ ސަރުކާރުގައި ވެސް މިކަމާ ގުޅޭ ނުރަސްމީ މަޝްވަރާތަކެއް ކުރެވުނު ކަމަށް ފުއާދު ވިދާޅުވިއެވެ. ނަމަވެސް، މަޖިލީހުގެ ސުޕަ މެޖޯރިޓީ ލިބުމުން އެކަން ހަނދާން ނައްތާލީ ކަމަށް އޭނާ ތުހުމަތު ކުރެއްވިއެވެ. "އޭރުވެސް ދަންނަވާފައިވާނެ ދެ އިންތިހާބު އެއް ދުވަހެއްގައި ބޭއްވުމުގެ ކަންކަން އަވަސްކުރަންވީ ނޫންތޯއޭ. ދެން އަންނަ ސަރުކާރަކަށް ވެސް ފަސޭހަވާނެ ނޫންތޯއޭ މިގޮތަށް ކަން ކުރެއްވީމަ،" އޭނާ ވިދާޅުވިއެވެ.

އެއްކޮށް ބޭއްވުމުން ލިބޭނެ ފައިދާތައް


ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީން މިކަމާ ގުޅޭގޮތުން ދެއްކެވި ވާހަކަފުޅުތަކަށް ތާއީދު ކުރައްވަމުން ފުއާދު ވަނީ އިންތިހާބުތައް އެއްކޮށްލުމުން ލިބޭނެ ފައިދާތައް ފާހަގަކުރައްވާފައެވެ. އޭގެ ތެރޭގައި:

  • ވެރިކަމަށް ކުރިމަތިލާ ފަރާތުން މަޖިލިސް ހޯދުމަށް ކުރާ ފޯކަސް ކުޑަވެ، ނުފޫޒުން އެއްކިބާވެފައިވާ މަޖިލީހެއް އިންތިހާބު ކުރުމަށް މަގުފަހިވުން.

  • ވޯޓުދޭ މީހާއަށް، ވެރިކަމަށް އަންނާނީ ކޮން ޕާޓީއެއްކަން ނޭނގި ހުރެ، ގާބިލު ކެންޑިޑޭޓުން ހިޔާރުކުރުމަށް ފަސޭހަވުން.

  • އިންތިހާބުގެ ޕްރެޝަރާ ހެދި ސަރުކާރުގެ މައިގަނޑު އަމާޒުތައް ބަދަލުކުރަން ނުޖެހި، މަސައްކަތް ކުރާނެ މާހައުލެއް ގާއިމުވުން.


ދެ އިންތިހާބު އެއްކޮށްލުމަކީ ދައުރުގެ ބޮޑުބައެއް އިންތިހާބުތަކުގައި ހޭދަވާ ހޭދަވުން ކުޑަކޮށް، ގައުމުގެ ހިންގުން ހަރުދަނާ ކުރުމަށް އެޅޭނެ މުހިންމު ފިޔަވަޅެއްގެ ގޮތުގައި ފުއާދު ތައުފީގު ވަނީ ސިފަކުރައްވާފައެވެ.