ބުދަ، 18 ނޮވެމްބަރު 2026
ޚަބަރު

ތުރުކީން ހަނގުރާމައަށް ނުކުންނާނެ ކަމުގެ އިންޒާރު އުރުދުޣާން ދެއްވައިފި

ތުރުކީން ހަނގުރާމައަށް ނުކުންނާނެ ކަމުގެ އިންޒާރު އުރުދުޣާން ދެއްވައިފި

އީރާނާ ދެކޮޅަށް ހިންގާ އެއްވެސް އަސްކަރީ އޮޕަރޭޝަނެއްގައި ކުރުދީ ޖަމާއަތްތައް ބައިވެރިކޮށްފިނަމަ، ތުރުކީން ސީދާ އަސްކަރީ ފިޔަވަޅު އަޅާނެ ކަމުގެ އިންޒާރު އެގައުމުގެ ރައީސް ރަޖަބް ތައްޔިބް އުރުދުޣާން އެމެރިކާއަށާއި އިރާގަށް ދެއްވައިފި އެވެ.

ތުރުކީގެ ނޫސް އޭޖެންސީ "ތުރުކިޔޭ" އިން ރިޕޯޓްކޮށްފައިވާ ގޮތުގައި، މި އިންޒާރު އަމާޒުކޮށްފައިވަނީ އެމެރިކާގެ އިތުރުން އިރާގު ސަރުކާރަށާއި ކުރުދީ ބާރުތަކަށެވެ.

އަންކާރާއަށް ލިބިފައިވާ މައުލޫމާތުތަކަށް ބަލާއިރު، އިޒްރޭލުގެ ޖާސޫސީ އިދާރާ މޮސާޑުން ދަނީ ކުރުދިސްތާން ވޯކާސް ޕާޓީ (ޕީކޭކޭ) އާއި އޭގެ އީރާން ގޯފް ކަމަށްވާ ޕީވައިއޭކޭ އާއެކު މަޝްވަރާތައް ބާއްވަމުންނެވެ. މި މަޝްވަރާތަކުގެ ބޭނުމަކީ އީރާނާ ދެކޮޅަށް ކުރާ ހަނގުރާމައިގައި، ތުރުކީން ޓެރަރިސްޓް ޖަމާއަތްތަކެއްގެ ގޮތުގައި ކަނޑައަޅާފައިވާ މި ގްރޫޕްތައް ބޭނުންކުރުމެވެ.

އެމެރިކާގެ ރައީސް ޑޮނަލްޑް ޓްރަމްޕާއެކު ފޯނުން ވާހަކަދައްކަވަމުން ރައީސް އުރުދުޣާން ވަނީ މިފަދަ ކަމަކަށް ތުރުކީން ދެކޮޅު ހަދާކަން ސާފުކޮށްދެއްވާފައެވެ. އީރާނުގެ ސަރަހައްދީ ނުގުޑާ ފުރިހަމަކަން ދެމެހެއްޓުމަކީ ތުރުކީގެ ސާފު ސިޔާސަތެއްކަން ފާހަގަކުރައްވައި، އުރުދުޣާން ވިދާޅުވީ ސީރިއާގައިވެސް އަމަލުކުރި ފަދައިން، ކޮންމެ ހާލަތެއްގައިވެސް ތުރުކީން އަސްކަރީ ގޮތުން ތަދައްހުލުވާނެ ކަމަށެވެ.

"އަޅުގަނޑުމެން އެއްވެސް ބަހަނާއެއް އަޑު ނާހާނަން. އަޅުގަނޑުމެން ހަމަލާދޭނަން. ސީރިއާގައި ވީގޮތް ތިޔަބޭފުޅުންނަށް ފެނިވަޑައިގަންނަވާނެ، މިތަނުގައިވެސް އަޅުގަނޑުމެން އަމަލުކުރާނީ އެގޮތަށް،" އުރުދުޣާން ވިދާޅުވިއެވެ.

މީގެ އިތުރުން ސަރަހައްދީ ހަނގުރާމައިގެ އަލިފާންގަނޑު ފެތުރުމަށް ކުރާ ކިތަންމެ ކުޑަ މަސައްކަތަކާ ދެކޮޅަށްވެސް ބޭނުންވާ ފިޔަވަޅުތައް އަޅާނެ ކަމުގެ ޔަގީންކަން އޭނާ ދެއްވިއެވެ.

މި ނިންމުމާއެކު މެދުއިރުމަތީގެ މަސްރަހު އިތުރަށް ނުތަނަވަސްވެފައިވާއިރު، ތުރުކީން ބުނަމުންދަނީ އެގައުމުގެ ސަލާމަތަށް ނުރައްކާވާ ފަދަ އެއްވެސް ހަރަކާތަކަށް ފުރުސަތު ނުދޭނެ ކަމަށެވެ. މިއީ އީރާނާ ގުޅޭ މައްސަލައިގައި ތުރުކީން މިހާތަނަށް ދިން އެންމެ ވަރުގަދަ އެއް އިންޒާރެވެ.