ކުޅުދުއްފުށި ސިޓީއަށް 2000 ހައުސިން ޔުނިޓް! އިފްތިތާހު ކުރުމުގެ ރަސްމިއްޔާތުގައި ޕީއެންސީގެ ކެންޑިޑޭޓުން ބައިވެރި ނުކުރޭ
ކުޅުދުއްފުށި ސިޓީގައި ތަރައްގީކުރުމަށް ހަމަޖެހިފައިވާ 2000 ހައުސިން ޔުނިޓްގެ ބިންގާ އެޅުމުގެ ރަސްމިއްޔާތު ބުދަ ދުވަހުގެ ރޭ ބާއްވައިފިއެވެ.
މި މަޝްރޫއަކީ އެ ސިޓީގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ބޮޑު ހައްލެއް ލިބިގެންދާނެ އުފާވެރި މަޝްރޫއެކެވެ.
ކައުންސިލް އިންތިޚާބަށް އެންމެ ތިން ދުވަހަށް ވެފައި ވަނިކޮށް ބޭއްވި މި ރަސްމިއްޔާތުގައި، އިންތިޚާބުގައި ވާދަކުރައްވާ އެއްވެސް ކެންޑިޑޭޓަކު ބައިވެރި ނުކުރުމަށް ވަނީ ނިންމާފައެވެ. މި ނިންމުމަކީ އިންތިޚާބުގައި ވާދަކުރާ އެއްވެސް ކެންޑިޑޭޓަކަށް މި އިވެންޓުގެ ނުސީދާ މަންފާއެއް ނުދިނުމަށްޓަކައި އެޅި މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.
މިކަމާ ގުޅޭގޮތުން އެޗްޑީސީއިން މައުލޫމާތު ދީފައިވާ ގޮތުގައި، ޕީއެންސީގެ ކައުންސިލް މެންބަރުންނަށް ފުރަތަމަ ދައުވަތު އެރުވި ނަމަވެސް، ފަހުން ވަނީ އެ ދައުވަތު ކެންސަލްކޮށްފައެވެ. މިކަން ޕީއެންސީގެ ކައުންސިލް މެންބަރު އިބްރާހިމް އަހުމަދު ވެސް ވަނީ ކަށަވަރުކޮށްދެއްވާފައެވެ.
ކައުންސިލްގެ ގިނަ މެންބަރުންނަކީ ކުރިއަށް އޮތް އިންތިޚާބުގައި ވާދަކުރައްވާ ކެންޑިޑޭޓުންނަށް ވާތީ، މިފަދަ ބޮޑު މަޝްރޫއެއް އިފްތިތާހުކުރުމުގެ ތެރެއިން ވަކި ބަޔަކަށް ސިޔާސީ ފައިދާ ހޯދުމުގެ ފުރުސަތު ނުދިނުމަށް ނިންމި ނިންމުމަށް ގިނަ ބައެއްގެ ތަރުހީބު ވަނީ ލިބިފައެވެ.
ކުޅުދުއްފުށި ސިޓީގެ ބޯހިޔާވަހިކަމުގެ މި ބޮޑު މަޝްރޫއު ފެށިގެން ދިއުމަކީ ރަށުގެ ރައްޔިތުންނަށް ލިބުނު ވަރަށް ބޮޑު ހިތްހަމަޖެހުމެކެވެ. މި މަޝްރޫއު ނިމުމުން ސިޓީގެ އާބާދީއަށް ބޭނުންވާ ބޯހިޔާވަހިކަމުގެ ދަތިކަމަށް ބޮޑު ލުޔެއް ލިބިގެންދާނެއެވެ.
Ads by MACL
