އިތުރު ދަރަންޏެއް ނުނަގައި ސުކޫކް ދެއްކުމުން ނަޝީދުގެ ތައުރީފު ސަރުކާރަށް
ސޯޝަލް މީޑިއާ ޕްލެޓްފޯމް "އެކްސް" ގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، އިތުރު ދަރަންޏެއް ނުނަގައި ސުކޫކް ބޮންޑު އެއްކޮށް ދައްކައި ހަލާސްކުރުމަކީ ވަރަށް ބޮޑު ހިތްވަރެއް ލިބިގެންދިޔަ ކަމެއް ކަމަށެވެ. މި ކާމިޔާބީއަށްޓަކައި އެމަނިކުފާނު ވަނީ ސަރުކާރަށް މަރުހަބާ ދަންނަވާފައެވެ.
ފިނޭންސް މިނިސްޓްރީން ހާމަކޮށްފައިވާ ތަފާސްހިސާބުތަކަށް ބަލާއިރު، ސުކޫކަށް ދައްކަންޖެހޭ އަސްލު އަދަދު ކަމަށްވާ 500 މިލިއަން ޑޮލަރާއި، އޭގެ ފައިދާގެ ރޭޓަށްވާ 24.68 މިލިއަން ޑޮލަރާއެކު ޖުމްލަ 524.68 މިލިއަން އެމެރިކާ ޑޮލަރު ސަރުކާރުން މިހާރު ވަނީ ދައްކައި ޚަލާސްކޮށްފަ އެވެ. މި ސުކޫކަކީ 2021 ވަނަ އަހަރު އޭރުގެ ސަރުކާރުން "ސަނީ ސައިޑް" ބޮންޑު އަދާކުރުމަށް ނަގާފައިވާ ދަރަންޏެކެވެ.
ފިނޭންސް މިނިސްޓްރީން ފާހަގަކުރި ގޮތުގައި، މި ސުކޫކު ކުރިން ވިއްކާފައިވަނީ ދުނިޔޭގެ އިގުތިސާދަށް ހީނަރުކަން ކުރިމަތިވެފައި އޮތް ދަނޑިވަޅެއްގައި، އަނބުރާ ދެއްކުމުގެ ހަރުދަނާ ސިޔާސަތެއް ނެތި ވަރަށް ބޮޑު އަގެއްގައެވެ. ނަމަވެސް 2023 ވަނަ އަހަރުން ފެށިގެން މި ސަރުކާރުން ވަނީ ދަރަނި އަދާކުރުމުގެ ހަރުދަނާ މަސައްކަތްތަކެއް ފަށާފައެވެ.
މި މަސައްކަތުގެ ދަށުން އެޅުނު އެންމެ މުހިންމު އެއް ފިޔަވަޅަކީ ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް ޖަމާކުރާ އެއާޕޯޓް ޑިވެލޮޕްމަންޓް ފީ (އޭޑީއެފް) ބޭރު ފައިސާއިން ޖަމާކުރަން ފެށުމެވެ. މި ބަދަލާއެކު އެސްޑީއެފްގެ ބޭރު ފައިސާގެ ބެލެންސް ވަނީ ތާރީހުގައި ފުރަތަމަ ފަހަރަށް 350 މިލިއަން ޑޮލަރަށްވުރެ އިތުރުވެފައެވެ.
އިތުރު ދަރަންޏެއް ނުނަގައި މިފަދަ ބޮޑު އަދަދެއް ދެއްކުމަކީ ރާއްޖޭގެ މާލީ އިތުބާރު ބައިނަލްއަގުވާމީ މައިދާނުގައި އިތުރުވެގެންދާނެ ކަމެއް ކަމަށް އިގުތިސާދީ މާހިރުން ފާހަގަކުރެއެވެ.
Ads by MACL
