ބުދަ، 18 ނޮވެމްބަރު 2026
ޚަބަރު

ހަނގުރާމައިން ކާމިޔާބު ނުލިބޭތީ ރުޅި ގަދަވެ އަނެއްކާ ވެސް އިތުރު ދެ ޖެނެރަލުން މަގާމުން ވަކިކޮށްފި

ހަނގުރާމައިން ކާމިޔާބު ނުލިބޭތީ ރުޅި ގަދަވެ އަނެއްކާ ވެސް އިތުރު ދެ ޖެނެރަލުން މަގާމުން ވަކިކޮށްފި

އީރާނާ ދެކޮޅަށް ކުރަމުންދާ ހަނގުރާމައިގެ ތެރޭގައި ހަނގުރާމައިގެ އަމާޒުތައް މަދުވުމާއި ގުޅިގެން، އެމެރިކާގެ ދިފާއީ ވަޒީރު ހެގްސެތު އެމެރިކާ ސިފައިންގެ އިސް ދެ ޖެނެރަލަކު މަގާމުން ވަކިކުރައްވައިފި އެވެ.

މި ނިންމުމުގެ ދަށުން މަގާމުން ވަކިކުރެވުނު ދެ ބޭފުޅުންނަކީ ޓްރާންސްފޯމޭޝަން އެންޑް ޓްރެއިނިންގ ކޮމާންޑުގެ ކޮމާންޑަރު ބްރިގޭޑިއަރ ޖެނެރަލް ޑޭވިޑް ހޮޑްން އާއި، ޗެޕްލައިންސް ކޯޕްސްގެ ކޮމާންޑަރު ބްރިގޭޑިއަރ ޖެނެރަލް ވިލިއަމް ގްރީން ޖޫނިއަރ އެވެ.

މި ބަދަލުތަކަކީ އީރާނާ ދެކޮޅަށް ކުރިއަށްދާ އަސްކަރީ ހަރަކާތްތަކުގެ ތެރެއިން، ހަނގުރާމައިގެ އަމާޒުތައް ހާސިލުކުރުމުގައި ހުރި ދަތިތަކާ ގުޅިގެން ގެނެވުނު ބަދަލުތަކެއް ކަމަށް ރިޕޯޓުތައް ބުނެއެވެ. ދިފާއީ ވަޒީރު ހެގްސެތު މި ފިޔަވަޅު އަޅުއްވާފައިވަނީ އަސްކަރިއްޔާގެ އިސް ސަފަށް ބަދަލުތަކެއް ގެނައުމުގެ މަގްސަދުގައެވެ.

މި ދެ ޖެނެރަލުން މަގާމުން ވަކިކުރުމާ ގުޅޭގޮތުން އެމެރިކާގެ ދިފާއީ ވުޒާރާއިން އިތުރު ތަފްސީލެއް އަދި ހާމަކޮށްފައެއް ނުވެއެވެ. ނަމަވެސް މިއީ މިފަހަކަށް އައިސް އެމެރިކާގެ އަސްކަރިއްޔާގެ އިސް މަގާމުތަކަށް އަންނަމުންދާ ބަދަލުތަކުގެ ތެރޭގައި ހިމެނޭ މުހިންމު ފިޔަވަޅެއްގެ ގޮތުގައި ބެލެވެއެވެ.