ބުދަ، 18 ނޮވެމްބަރު 2026
ޚަބަރު

ރައީސް ތިން އިންތިހާބުގައި ވޯޓު ލައްވައިފި، އެދިވަޑައިގަތީ ރައްޔިތުން ވޯޓުގެ ހައްގު އަދާކުރުމަށް

ރައީސް ވޯޓު ލައްވަނީ. ފޮޓޯ: މިހާރު
ރައީސް ވޯޓު ލައްވަނީ. ފޮޓޯ: މިހާރު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިއަދު ކުރިއަށްދާ ލޯކަލް ކައުންސިލު އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ އިތުރުން، އިންތިހާބުތައް އެއް ދުވަހެއްގައި ބޭއްވުމާ ގުޅޭގޮތުން ނަގާ އާއްމު ހިޔާލު ހޯދުމުގެ ވޯޓުގައި ބައިވެރިވެވަޑައިގެން ވޯޓު ދެއްވައިފި އެވެ.

ރައީސް ޑރ. މުޢިއްޒު ވޯޓުލައްވާފައިވަނީ ތާޖުއްދީން ސުކޫލުގައި ހުރި މާފަންނު ދެކުނު ދާއިރާގެ ވޯޓު ފޮއްޓަށެވެ. ވޯޓު ދެއްވުމަށް ރައީސް ވަޑައިގެންނެވިއިރު، އެމަނިކުފާނުގެ އަރިހުގައި ދަރިކަނބަލުންވެސް ވޯޓު ލެއްވުމަށް ވަޑައިގަތެވެ.

ވޯޓުލެއްވުމަށްފަހު ނޫސްވެރިންނާ ބައްދަލުކުރައްވައި ރައީސުލްޖުމްހޫރިއްޔާ ވަނީ ހުރިހާ ރައްޔިތުންވެސް ވޯޓުލުމުގެ ހައްގު އަދާކުރުމަށް ބޭރަށް ނުކުތުމަށް އިލްތިމާސްކުރައްވާފައެވެ.

"ރައްޔިތުންގެ ގާނޫނީ ހައްގު އަދާކުރެއްވުމަށް، މިއަދުގެ ވޯޓުގައި ހުރިހާ ރައްޔިތުން ބައިވެރިވެވަޑައިގަތުމަށް އިލްތިމާސްކުރަން،" ރައީސް ވިދާޅުވިއެވެ.

މިއަދު ހެނދުނު 8:00 ގައި ފެށުނު މި ވޯޓުލުމަކީ ލޯކަލް ކައުންސިލުތަކުގެ އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ އިތުރުން، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމާމެދު ރައްޔިތުން ދެކޭ ގޮތް ބެލުމަށް ނަގާ އާއްމު ހިޔާލު ހޯދުމުގެ ވޯޓެކެވެ.

އިލެކްޝަންސް ކޮމިޝަނުން ހާމަކޮށްފައިވާ ގޮތުގައި، މި އިންތިހާބުތަކުގައި ޖުމްލަ 299,876 މީހަކަށް ވޯޓުލުމުގެ ހައްގު ލިބިގެންވެއެވެ. އޭގެ ތެރޭގައި ހިމެނެނީ 144,506 އަންހެނުންނާއި 150,370 ފިރިހެނުންނެވެ. ލޯކަލް ކައުންސިލު އިންތިހާބުގައި 1,592 ކެނޑިޑޭޓުން ވާދަކުރާއިރު، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި 1,368 ކެންޑިޑޭޓުން ވާދަކުރެއެވެ.

މި އިންތިހާބަށްޓަކައި އިލެކްޝަންސް ކޮމިޝަނުން ވަނީ ޖުމްލަ 888,845 ވޯޓު ކަރުދާސް ޗާޕުކޮށްފައެވެ. މީގެ ތެރޭގައި ލޯކަލް ކައުންސިލް އިންތިހާބަށް 297,959 ކަރުދާހާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 292,706 ކަރުދާހުގެ އިތުރުން، އާއްމު ހިޔާލު ހޯދުމުގެ ވޯޓަށް 298,180 ވޯޓު ކަރުދާސް ހިމެނެއެވެ.