ހަނގުރާމަ ހުއްޓާލަން އީރާނުން އެމެރިކާއަށް ހުށަހެޅި ޝަރުތުތައް ހާމަކޮށްފި
ސަރަހައްދީ ހަމަނުޖެހުންތަކާއި ހަނގުރާމަތައް ހުއްޓާލުމަށްޓަކައި އެމެރިކާއިން އެއްބަސްވާންޖެހޭ މުހިންމު ޝަރުތުތަކެއް އީރާނުން ހާމަކޮށްފި އެވެ. މި ޝަރުތުތަކުގެ ތެރޭގައި ސަރަހައްދީ ރައްކާތެރިކަމާއި، އިގްތިސާދީ ދަތިކުރުމުގެ ފިޔަވަޅުތަކާ ގުޅޭ މުހިންމު ނުކުތާތަކެއް ހިމެނެއެވެ.
އިގްތިސާދީ އަދި ސިޔާސީ ޝަރުތުތައް
އީރާނުން ހުށަހަޅާފައިވާ އެންމެ މުހިންމު އެއް ކަމަކީ އެ ގައުމާ ދެކޮޅަށް އަޅާފައިވާ ޕްރައިމަރީ އަދި ސެކަންޑަރީ ހުރިހާ ދަތިކުރުމުގެ ފިޔަވަޅުތަކެއް އުވާލުމެވެ. މީގެ އިތުރުން އދ. ގެ ސަލާމަތީ މަޖިލީހުންނާއި އައި.އޭ.އީ.އޭ ގެ ބޯޑް އޮފް ގަވަރްނާސް އިން އީރާނާ ދެކޮޅަށް ނެރެފައިވާ ހުރިހާ ގަރާރުތަކެއް ބާތިލްކުރުމަށް ވެސް ވަނީ ގޮވާލާފައެވެ. އަދި މިހާތަނަށް ލިބުނު ގެއްލުންތަކުގެ ބަދަލު އީރާނަށް ދިނުމަށް ވެސް ވަނީ ޝަރުތުކޮށްފައެވެ.
އިސްތިރާޖީ އަދި އަސްކަރީ ކަންކަން
އަސްކަރީ ގޮތުން އީރާނުން އެދިފައިވަނީ އެމެރިކާގެ ހަނގުރާމަވެރި ސިފައިން މި ސަރަހައްދުން ބޭރުކުރުމަށެވެ. އަދި ހޯރްމޫޒް ކަނޑުއޮޅީގެ ފުރިހަމަ ކޮންޓްރޯލް އީރާނަށް އޮންނާނެކަން ގަބޫލުކުރުމާއި، އީރާނުން ޔުރޭނިއަމް މުއްސަނދިކުރުން ބަލައިގަތުމަށް ވެސް ވަނީ ހުށަހަޅާފައެވެ.
ހަނގުރާމަ ހުއްޓާލުމާއި ސަރަހައްދީ މަސްލަހަތު
މި ހުށަހެޅުމުގައި ލުބުނާނުގެ ހިޒްބުالله އާ ދެކޮޅަށް ކުރާ ހަނގުރާމަ ހިމެނޭހެން، ހުރިހާ ފްރަންޓެއްގައި ކުރިއަށްދާ ހަނގުރާމަތައް ހުއްޓާލުމަށް ވަނީ ގޮވާލާފައެވެ. އަދި އެއް ގައުމުން އަނެއް ގައުމަށް ހަމަލާނުދިނުމުގެ އިލްތިޒާމެއްގައި އެމެރިކާއިން ސޮއިކުރަންޖެހޭނެ ކަމަށް ވެސް އީރާނުން ބުނެއެވެ.
މި ޝަރުތުތަކަކީ ސަރަހައްދީ ސުލްހައަށްޓަކައި ކޮންމެހެން ފުރިހަމަވާންޖެހޭ ކަންކަން ކަމަށް އީރާނުން ދެކޭއިރު، މިއީ އެމެރިކާއިން އެއްބަސްވެފައިވާ ކަންތައްތަކެއް ކަމަށް އީރާނުން ވަނީ ހާމަކޮށްފައެވެ.
Ads by MACL
