އާ ކައުންސިލަރުން ހުވައިކުރުން އަންނަ މެއި މަހުގެ 17 ގައި ބޭއްވުމަށް ނިންމައިފި
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބުގައި ގޮނޑިތައް ކާމިޔާބު ކުރެއްވި އައު ކައުންސިލަރުން މަގާމުގެ ހުވައިކުރުމުގެ ރަސްމިއްޔާތު އަންނަ މެއި މަހުގެ 17 ވާ އާދީއްތަ ދުވަހު ބޭއްވުމަށް ލޯކަލް ގަވަންމެންޓް އޮތޯރިޓީ (އެލްޖީއޭ) އިން ހަމަޖައްސައިފިއެވެ.
ލާމަރުކަޒީ ގާނޫނުގައިވާ ގޮތުގެ މަތިން ކައުންސިލްތަކުގެ ދައުރަކީ ފަސް އަހަރު ދުވަސް ކަމަށްވާއިރު، މިހާރު ހިނގަމުންދާ ދައުރުގެ ކައުންސިލަރުން ހުވައިކުރައްވާފައިވަނީ 2021 ވަނަ އަހަރުގެ މެއި މަހުގެ 17 ވަނަ ދުވަހުއެވެ. އެހެންކަމުން، މިހާރު ތިއްބެވި ކައުންސިލަރުންގެ ދައުރު ހަމަވެ، އަލަށް އިންތިޚާބުވި މެންބަރުން އެ ދުވަހު މަގާމާ ހަވާލުވެވަޑައިގަންނަވަން ޖެހެއެވެ. ކައުންސިލަރުންގެ އިތުރުން، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް (ޑަބްލިޔުޑީސީ) އަލަށް އިންތިޚާބުވި މެންބަރުން ހުވައިކުރުންވެސް އެ ދުވަހު ކުރިއަށްދާނެ ކަމަށް އެލްޖީއޭއިން ބުނެއެވެ.
ހުވައިކުރުމުގެ ރަސްމިއްޔާތުތައް ބާއްވާނެ ސީދާ ގަޑިތައް އަދި ކަނޑަނާޅާ ކަމަށާއި، އެކަން ނިންމާނީ އެކި ރަށްރަށުގައި ހުވައިލައިދެއްވުމަށް ތިއްބަވާ ފަނޑިޔާރުން ލިބެންހުރި ވަގުތުތަކަށް ބަލައިގެން ކަމަށްވެސް އެލްޖީއޭއިން ފާހަގަކުރެއެވެ.
Ads by BMLނިމިދިޔަ އިންތިޚާބުގައި ކައުންސިލްތަކަށް 681 މެންބަރުން އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 681 މެންބަރުންނާއެކު، ޖުމްލަ 1,362 މެންބަރުން ވަނީ އިންތިޚާބުކޮށްފައެވެ.
Ads by MACL
