ނަލަހިޔާ ރެޒިޑެންސްއިން 4 މިލިއަން ރުފިޔާ ވަގަށް ނެގި މައްސަލައިގައި 4 މީހަކު ހައްޔަރުކޮށްފި
މާލޭގެ މަޖީދީމަގުގައި ހުންނަ ނަލަހިޔާ ރެޒިޑެންސްގެ އެޕާޓްމަންޓަކުން ހަތަރު މިލިއަން ރުފިޔާ ވަގަށް ނެގި މައްސަލައިގެ ތުހުމަތުގައި ހަތަރު މީހަކު ފުލުހުންގެ ބަންދަށް ގެންގޮސްފިއެވެ. މި ބޮޑު ވައްކަމާ ގުޅިގެން ފުލުހުން ހިންގި ތަހުގީގުގައި މިހާތަނަށް ފެނިފައިވަނީ ވަގަށް ނެގި ފައިސާގެ ތެރެއިން އެންމެ 50،000 (ފަންސާސް ހާސް) ރުފިޔާ ކަމަށް ފުލުހުން މައުލޫމާތުދެއެވެ.
މި ހާދިސާ ފުލުހުންނަށް ރިޕޯޓްކޮށްފައިވަނީ 2026 މާރޗް 16 ވަނަ ދުވަހުގެ އިރުއޮއްސި 17:49 އެހައިކަންހާއިރުއެވެ. ފުލުހުން ބުނިގޮތުގައި މި ވައްކަމުގެ އަމަލުގައި ޖުމލަ ފަސް މީހަކު ބައިވެރިވެފައިވާ ކަމަށް ތުހުމަތު ކުރެވެއެވެ. އޭގެ ތެރެއިން ހަތަރު މީހަކު މިހާރު ވަނީ ހައްޔަރުކޮށްފައެވެ. ނަމަވެސް މި މައްސަލައިގައި ހިމެނޭ ފަސްވަނަ މީހާ އަދިވެސް ފިލައިގެން އުޅޭތީ، އޭނާ ހޯދުމުގެ މަސައްކަތް ފުލުހުން ދަނީ ހުއްޓުމެއްނެތި ކުރަމުންނެވެ.
މި މައްސަލައިގައި ހައްޔަރުކޮށްފައިވާ ހަތަރު މީހުންނަކީ:
Ads by BML-
މުޙައްމަދު ނޫރު އަޙްމަދު (40އ)، ކަސްތޫރިމާގެ / ޅ.ނައިފަރު
-
މުޙައްމަދު އަފްރާޙް (40އ)، މޫންލައިޓްވިލާ / ސ.މީދޫ
-
އިސްމާޢީލް ޢާޞިފް (36އ)، ދާރުލް އައްވަލް / ރ.މަޑުއްވަރި
-
އަޙްމަދު ފާރިސް (39އ)، މ. އޭސިއާ / މާލެ
ފުލުހުން ހާމަކޮށްފައިވާ ގޮތުގައި، މި މައްސަލައިގެ ތަހުގީގުގެ ބޮޑު ބައެއް މިހާރު ވަނީ ނިމިފައެވެ. އަދި ތަހުގީގު މަރުހަލާގެ އެންމެ ފަހުގެ މަސައްކަތްތައް ނިންމުމަށްފަހު، މި ހަތަރު މީހުންގެ މައްޗަށް ދައުވާ ކުރުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް ފޮނުވުމުގެ ތައްޔާރީތައް ވަމުންދާ ކަމަށްވެސް ފުލުހުން ބުނެފައިވެއެވެ.
Ads by MACL
