ހޮރްމުޒް ކަނޑުއޮޅި އެމެރިކާގެ ބާރުގެ ދަށަށް ގެންނަ ހިންގާ އޮޕަރޭޝަނުގަ އެހީތެރިނުވާނެ ކަމަށް އޮސްޓްރޭލިއާއިން ބުނެފި
ސްޓްރެއިޓް އޮފް ހޯމުޒް ނުވަތަ ހޮރްމުޒް ކަނޑުއޮޅި އެމެރިކާގެ ބާރުގެ ދަށަށް ގެނައުމަށް އެމެރިކާގެ ނޭވީން ކުރިއަށްގެންދަން ރާވާފައިވާ އޮޕަރޭޝަނުގައި އޮސްޓްރޭލިއާއިން ބައިވެރިނުވާނެކަން އެ ގައުމުގެ ބޮޑުވަޒީރު އެންތަނީ އެލްބަނީޒް ހާމަކުރައްވައިފިއެވެ.
މިއީ އެމެރިކާގެ ރައީސް ޑޮނަލްޑް ޓްރަމްޕް، އެމެރިކާގެ އިއްތިހާދީ ގައުމުތަކުން މިކަމުގައި އެހީތެރިވާނެ ކަމަށް ވިދާޅުވެފައިވަނިކޮށް އޮސްޓްރޭލިއާއިން ނިންމި ނިންމުމެކެވެ.
މި މައްސަލައިގައި ވާހަކަދައްކަވަމުން ރައީސް ޓްރަމްޕް ކުރިން ވިދާޅުވެފައިވަނީ، ހޮރްމުޒް ކަނޑުއޮޅި ބްލޮކޭޑް ކުރުމަށް ނުވަތަ ބަންދުކުރުމަށް އެމެރިކާގެ ނޭވީއަށް އެހީތެރިވުމަށް އެމެރިކާގެ އިއްތިހާދީ ގައުމުތަކުން ހަނގުރާމަމަތީ އުޅަނދުތައް ފޮނުވާނެ ކަމަށެވެ. ނަމަވެސް، ޓްރަމްޕްގެ މި ވާހަކަފުޅަށް މާގިނަ އިރުތަކެއް ނުވަނީސް އޮސްޓްރޭލިއާގެ ބޮޑުވަޒީރު ވަނީ އެ ގައުމުގެ ސިޔާސަތު ސާފުކޮށްދެއްވާފައެވެ.
"ހޯމުޒް ކަނޑުއޮޅި ބަންދުކޮށް އެމެރިކާގެ ބާރުގެ ދަށަށް ގެންނަން އެމެރިކާއިން ހިންގާ އަސްކަރީ ހަރަކާތުގައި އޮސްޓްރޭލިއާއިން ބައިވެރިއެއް ނުވާނެ،" ބޮޑުވަޒީރު އެލްބަނީޒް ވިދާޅުވި އެވެ.
އޭނާ އިތުރަށް ވިދާޅުވީ އޮސްޓްރޭލިއާއިން ބޭނުންވަނީ ދެމެހެއްޓެނިވި ސުލްހަ މަސަލަސްކަން ކަމަށާއި، ދުނިޔޭގެ ބާޒާރުގައި ތެލުގެ އަގު އެއްވަރެއްގައި ހިފެހެއްޓުމަކީ މުހިންމު ކަމެއް ކަމަށެވެ.
"އަހަރެމެން ބޭނުންވަނީ ދެމެހެއްޓެނިވި ސުލްހަ. އަދި އަހަރެމެން ބޭނުންވަނީ ތެލުގެ އަގުތައް ހަމަޖެހިފައި އޮންނަން. އަހަރެމެންނަކަށް ހަނގުރާމައެއް ބޭނުމެއް ނޫން،" އެލްބަނީޒް ވިދާޅުވިއެވެ.
މި ނިންމުމާއެކު، އެމެރިކާގެ އެންމެ ގާތް އެއް އިއްތިހާދީ ގައުމުގެ އެއްބާރުލުން މިކަމުގައި ނުލިބޭނެކަން މިވަނީ ކަށަވަރުވެފައެވެ.
Ads by BMLމި ހާދިސާއަކީ ބައިނަލްއަގުވާމީ މައިދާނުގައި އެމެރިކާގެ ސިޔާސަތުތަކަށް އެ ގައުމުގެ ގާތް އެކުވެރިންގެ ފަރާތުން ކުރިމަތިވި ހައިރާންކުރުވަނިވި ރައްދެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ.
އޮސްޓްރޭލިއާގެ މި ނިންމުމުގެ ސަބަބުން މެދުއިރުމަތީގެ މަސްރަހަށް އަތުވެދާނެ ބަދަލުތަކަށް މިހާރު ގިނަ ބަޔަކު އަންނަނީ ފާރަވެރިވަމުންނެވެ.
Ads by MACL
