މަޖިލީހުގެ ރައީސް ތުރުކީވިލާތަށް ފުރާވަޑައިގެންފި
އިންޓަރ-ޕާލިމެންޓަރީ ޔުނިއަން (އައިޕީޔޫ) ގެ 152 ވަނަ އެސެމްބްލީގައި ބައިވެރިވެވަޑައިގަތުމަށް، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ތުރުކީވިލާތަށް މިއަދު ފުރާވަޑައިގެންފިއެވެ.
ރައްޔިތުންގެ މަޖިލީހުގެ އިދާރާއިން މަޢުލޫމާތު ދެއްވާފައިވާ ގޮތުގައި، ބައިނަލްއަޤްވާމީ ފެންވަރުގައި ޤާނޫނުހަދާ މަޖިލިސްތަކުގެ މެދުގައި ބާއްވާ މި މުހިންމު ބައްދަލުވުމުގައި ބައިވެރިވެވަޑައިގަންނަވާ ދިވެހި ވަފުދުގައި، މަޖިލީހުގެ ރައީސްގެ އަރިހުގައި އިތުރު 7 މެންބަރަކު ބައިވެރިވެވަޑައިގަންނަވައެވެ. މީގެ ތެރޭގައި ހިމެނެނީ ވެރިކަންކުރާ ޕީއެންސީއަށް ނިސްބަތްވެވަޑައިގަންނަވާ 6 މެންބަރުންނާއި، އިދިކޮޅު އެމްޑީޕީގެ މެންބަރެކެވެ.
މި ދަތުރުފުޅުގައި ބައިވެރިވެވަޑައިގަންނަވާ ޕީއެންސީގެ މެންބަރުންނަކީ ކުޅުދުއްފުށި އުތުރު ދާއިރާގެ މެންބަރު މުޙައްމަދު ދާއޫދު، ގައްދޫ ދާއިރާގެ މެންބަރު މުޙައްމަދު ޢަލީ، ހުޅުދޫ ދާއިރާގެ މެންބަރު މުޙައްމަދު ޝާހިދު، މާފަންނު މެދު ދާއިރާގެ މެންބަރު އަސްމާ ރަޝީދު، ނިލަންދޫ ދާއިރާގެ މެންބަރު ފާޠިމަތު ސަޢުދާ އަދި ހުރާ ދާއިރާގެ މެންބަރު އަނާރާ ނަޢީމް އެވެ.
Ads by BMLމި ބޭފުޅުންގެ އިތުރުން ދެން މި ވަފުދުގައި ހިމެނިވަޑައިގަންނަވަނީ ކެންދޫ ދާއިރާ ތަމްސީލުކުރައްވާ އެމްޑީޕީގެ މެންބަރު މައުރޫފް ޛާކިރެވެ.
Ads by MACL
