ގޯއްޗާއި ފްލެޓަށް އެދުމުގެ މުއްދަތު މެއި މަހުގެ ނިޔަލަށް އިތުރުކޮށްފި
ސަރުކާރުން ކުރިއަށްގެންދާ "ބޯހިޔާވަހިކަން އެންމެނަށް" މަޝްރޫޢުގެ ދަށުން ގޯއްޗާއި ފްލެޓަށް އެދި ފޯމު ހުށަހެޅުމުގެ ސުންގަޑި، އުޞޫލުތަކަށް ގެނައި ބޮޑެތި ލުއިތަކަކާއެކު އަންނަ މެއި މަހުގެ ނިޔަލަށް ސަރުކާރުން އިތުރުކޮށްފިއެވެ.
ގެދޮރުވެރިކަމާ ބެހޭ ވުޒާރާއިން ހާމަކޮށްފައިވާ ގޮތުގައި، މާލެ ސަރަހައްދުން ބަންޑާރަ ގޯއްޗާއި ފްލެޓް ދޫކުރުމަށް ހުޅުވާލާފައިވާ ފުރުޞަތުގެ މުއްދަތު މިހާރު ވަނީ މެއި 31 ވަނަ ދުވަހުގެ ރޭ 23:59 އަށް ދަންމާލާފައެވެ. ކުރިން ހަމަޖެހިފައި އޮތް ގޮތުން ނަމަ، މި ފުރުޞަތު ބަންދުވާނީ މިހިނގާ އޭޕްރީލް މަހުގެ 30 ވަނަ ދުވަހަށެވެ.
މުއްދަތު އިތުރުކުރުމުގެ އިތުރުން، އާންމުންނަށް ފަސޭހަވާނެހެން ސްކީމްގެ އުޞޫލުތަކަށް މުހިންމު ބަދަލުތަކެއް ވަނީ ގެނެސްފައެވެ. އެގޮތުން ގެނައި ބަދަލުތަކުގެ ތެރޭގައި:
Ads by BML-
އަނބިމީހާ ނުވަތަ ފިރިމީހާގެ ނަމުގައި ގެދޮރު ހުރި ނަމަވެސް، އަނެކާއަށް ވަކިން ގޯއްޗަށް އެދި ހުށަހެޅޭނެ ގޮތް ހަމަޖެއްސުން.
-
އެހެން ބަޔަކާ ގުޅިގެން (ޖޮއިންޓްކޮށް) ގޯއްޗެއް ލިބިފައިވާ މީހުންނަށް، އެ ގޯއްޗެއް ދޫކޮށްލުމަށްފަހު ވަކިން އަމިއްލަ ނަމުގައި ކުރިމަތިލުމުގެ ފުރުޞަތު ދިނުން.
-
ނުކުޅެދުންތެރިކަން ހުންނަ މީހުންނަށް ފްލެޓް ދިނުމަށް ކަނޑައެޅިފައިވާ ޝަރުޠުތަކަށް ލުއިދީ، އެ ފަރާތްތަކަށް ފުރުޞަތުތައް އިތުރަށް ފުޅާކުރުން.
-
ކުރިން ހިންގި ބޯހިޔާވަހިކަމުގެ މަޝްރޫޢަކުން 1 ނުވަތަ 2 ކޮޓަރީގެ ފްލެޓެއް ލިބިފައިވާ މީހުންނަށް، އެމީހުންގެ ދަރިންގެ އަދަދަށް ބެލުމަށްފަހު 3 ކޮޓަރީގެ ފްލެޓަށް އެދުމުގެ މަގު ފަހިކޮށްދިނުން.
މި ބޮޑު މަޝްރޫޢުގެ ދަށުން މާލެ ސަރަހައްދާއި އަލަށް ތަރައްޤީކުރާ ރަސްމާލެއިން ޖުމްލަ 15,000 ގޯތި ދޫކުރުމަށް ސަރުކާރުން ވަނީ ނިންމާފައެވެ. މީގެ ތެރެއިން 10,000 ގޯތި މާލޭ ރައްޔިތުންނަށް ކަނޑައަޅާފައިވާއިރު، މާލޭގައި ދިރިއުޅޭ ރަށްރަށުގެ މީހުންނަށް 3,000 ގޯތި އަދި މައިމުޅަވެފައިވާ ފަރާތްތަކަށް 500 ގޯތި ވަނީ ޚާއްޞަކޮށްފައެވެ. ހަމައެހެންމެ، މާލޭގެ ކުދި ގޯޅިތަކުގައި ހުރި ގޯތިތައް ދޫކޮށްލާ ފަރާތްތަކަށާއި ލާޖައްސާ ފަރާތްތަކަށް ބަދަލުގެ ގޮތުގައި 1,500 ގޯތި ވަނީ ކަނޑައަޅާފައެވެ.
ގޯއްޗާއި އެއްވަރަށް ފްލެޓް ދޫކުރުމަށްވެސް ވަނީ އަމާޒުހިފާފައެވެ. އެގޮތުން ޖުމްލަ 7,900 ފްލެޓް ޔުނިޓް ދޫކުރުމަށް ހަމަޖެހިފައިވާއިރު، މި ޔުނިޓްތައް ބަހާލެވިފައިވަނީ މާލޭ މީހުންނަށް 4,000 ފްލެޓް، ރަށްރަށުން މާލެއަށް ހިޖުރަކޮށްފައިވާ މީހުންނަށް 1,500 ފްލެޓް، އަދި ޚާއްޞަ އިސްކަންދޭ ކެޓަގަރީތަކަށް 2,400 ފްލެޓް ލިބޭ ގޮތަށެވެ.
Ads by MACL
