މާދަމާގެ ނިޔަލަށް ރާއްޖެއަށް ވިއްސާރަ، ނަމަވެސް އިހުސާސް ކުރެވޭ ހޫނުމިން ހުންނާނީ މަތީގައި
މޫސުމާބެހޭ ގައުމީ އިދާރާ (މެޓް އޮފީސް) އިން ލަފާކުރާ ގޮތުގައި މާދަމާގެ ނިޔަލަށް ރާއްޖޭގެ ބޮޑު ބަޔަކަށް ވިއްސާރަ ކުރާނެއެވެ. ނަމަވެސް މިއީ އަހަރުގެ އެންމެ ހޫނުގަދަ ދުވަސްވަރު ކަމަށްވުމުން، ވާރޭ ވެހުނު ކަމުގައި ވިޔަސް އާންމުންނަށް އިހުސާސް ކުރެވޭ ފިނިހޫނުމިން ހުންނާނީ މަތީގައި ކަމަށް އެ އިދާރާއިން މައުލޫމާތުދެއެވެ.
މި ދުވަސްވަރު ރާއްޖެއަށް ވިއްސާރަ ކުރަމުންދަނީ ރާއްޖޭގެ ސަރަހައްދުގައި އުފެދިފައިވާ ވިލާގަނޑެއްގެ ސަބަބުންނެވެ. މެޓް އޮފީހުން ބުނި ގޮތުގައި މިއަދު އުތުރާއި މެދުރާއްޖެތެރޭގެ އެކި ހިސާބުތަކަށް ގުގުރުމާއެކު ބޯކޮށް ވާރޭވެހުން އެކަށީގެންވެއެވެ. އަދި ދެކުނުގެ ބައެއް ރަށްތަކަށްވެސް ގުގުރުމާއެކު ކެރީގެ އަސަރު ކުރާނެކަމަށް ވަނީ ލަފާކޮށްފައެވެ. މާދަމާގެ ފަހުންވެސް ރާއްޖޭގެ އެކި ހިސާބުތަކަށް ކެރީގެ އަސަރު ކުރާނެއެވެ.
ވައި ޖެހޭނެ ގޮތަށް ބަލާއިރު، އުތުރުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 3 މޭލާއި 10 މޭލާ ދެމެދުގެ ބާރުމިނުގައި ވައިޖެހޭނެއެވެ. މެދުރާއްޖެތެރެއާއި ދެކުނުގެ އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު 7 މޭލާއި 15 މޭލާ ދެމެދުގެ ބާރުމިނުގައި ވައިޖެހޭއިރު، ވިލާގަނޑުގައި ގަޑިއަކު 30 މޭލަށް ވައި ގަދަވުން އެކަށީގެންވެއެވެ.
Ads by BMLރާއްޖޭގެ ކަނޑުތައް އާންމު ގޮތެއްގައި އާދައިގެ ވަރަކަށް މަޑުވި ނަމަވެސް ވިލާގަނޑުގައި ގަދަވާނެއެވެ. އަދި މެދުރާއްޖެތެރެއާއި ދެކުނުގައި ރާޅުގެ އުސްމިން 2 ފޫޓާއި 5 ފޫޓާ ދެމެދުގައި ހުންނާނެ ކަމަށްވެސް މެޓް އޮފީހުން ލަފާކުރެއެވެ.
ކުރިއަށް އޮތް މަހުގެ ކުރީކޮޅު ރާއްޖެއަށް ހުޅަނގު މޫސުން ފެށޭނެކަމަށް ބެލެވޭއިރު، މެޓް އޮފީހުން ވަނީ މި ދުވަސްވަރު ވާރޭވެހުމާއެކު ގަދައަށް ވިދާ ގުގުރައި، ހޮނުއެޅުމުގެ ނުރައްކާތެރި ހާދިސާތައް ހިނގުން އެކަށީގެންވާތީ އެކަމަށް އާންމުން ސަމާލުވުމަށް މީގެ ކުރިން އިލްތިމާސްކޮށްފައެވެ.
Ads by MACL
