ބުދަ، 18 ނޮވެމްބަރު 2026
ޚަބަރު

ސަރުކާރުގެ އިސް ތަރުޖަމާނަކަށް މުޙައްމަދު ޙުސައިން ޝަރީފް ހަމަޖައްސަވައިފި

މުންދު - މުހައްމަދު ހުސެއިން ޝަރީފް
މުންދު - މުހައްމަދު ހުސެއިން ޝަރީފް

ވަޒީރުންގެ ފެންވަރުގައި ސަރުކާރުގެ އެންމެ އިސް ތަރުޖަމާނު ނުވަތަ 'ޗީފް ގަވަރންމަންޓް ސްޕޯކްސްޕާސަން' ގެ މަޤާމަށް މ. ކޮތަންމާގެ، މުޙައްމަދު ޙުސައިން ޝަރީފް މިއަދު އައްޔަންކުރައްވައިފިއެވެ. 

މުޙައްމަދު ޙުސައިން ޝަރީފަކީ މީގެ ކުރިންވެސް ސަރުކާރުގެ މުވާސަލާތީ އަދި ތަރުޖަމާނުކަމުގެ ދާއިރާގައި ގިނަ ތަޖުރިބާތަކެއް ހާސިލުކުރައްވާފައިވާ ބޭފުޅެކެވެ. އެގޮތުން 2005 ވަނަ އަހަރުން ފެށިގެން 2007 ވަނަ އަހަރާ ހަމައަށް ސަރުކާރުގެ އިސް ތަރުޖަމާނުކަން ކުރެއްވުމުގެ އިތުރުން، 2007 އިން 2008 އަށް ރައީސުލްޖުމްހޫރިއްޔާގެ ތަރުޖަމާނުގެ މަޤާމުވެސް އޭނާ ވަނީ ފުރުއްވާފައެވެ. އަދި ރައީސް އޮފީހުގައި 'ސްޓްރެޓީޖިކް ކޮމިއުނިކޭޝަންސް ޔުނިޓް' އެންމެ ފުރަތަމަ ވުޖޫދަށް ގެނައުމުގެ މަސައްކަތުގައިވެސް އޭނާ ވަނީ އިސް ދައުރެއް އަދާކުރައްވާފައެވެ.

ތަރުޖަމާނުކަމުގެ އިތުރުން، ދައުލަތުގެ އެހެނިހެން އިސް މަޤާމުތަކެއްވެސް މުޙައްމަދު ޙުސައިން ޝަރީފް ވަނީ ފުރުއްވާފައެވެ. މީގެ ތެރޭގައި ކުރީގެ ސަރުކާރުތަކުގައި ވަޒީރުންގެ މަޖިލީހުގެ މެންބަރުކަން ކުރެއްވުމާއި، ރާއްޖެއިން ބޭރުގެ އެކި ޤައުމުތަކަށް ކަނޑައަޅާފައި ތިއްބަވާ ސަފީރުކަން ހިމެނެއެވެ. މިގޮތުން އޭނާ އެންމެ ފަހުން އަދާކުރެއްވީ އެކުވެރި ޢަރަބި ޢިމާރާތް (ޔޫއޭއީ) އަށް ރާއްޖެއިން ކަނޑައަޅާފައި ހުންނަވާ ސަފީރުގެ މަޤާމެވެ.