ބުދަ، 18 ނޮވެމްބަރު 2026
ޚަބަރު

ހޮރްމޫޒް ކަނޑުއޮޅީގައި އިންޑިއާގެ ދެ އާގުބޯޓަކަށް އީރާނުން ހަމަލާދީފި

ހޮރްމޫޒް ކަނޑުއޮޅީގައި އިންޑިއާގެ ދެ އާގުބޯޓަކަށް އީރާނުން ހަމަލާދީފި

އިންޑިއާގެ ދެ އާގުބޯޓަކަށް ހޮރްމޫޒް ކަނޑުއޮޅީގައި އީރާނުން މިއަދު ބަޑީގެ ހަމަލާދީފިއެވެ.

މި ހާދިސާގައި އެއްވެސް މީހަކަށް އަނިޔާއެއް ނުލިބޭ ކަމަށާއި ބޯޓުތަކަށް ގެއްލުމެއް ނުލިބޭ ކަމަށް މަސްދަރުތަކާ ހަވާލާދީ އެންޑީޓީވީން ރިޕޯޓުކޮށްފައިވެއެވެ. ނަމަވެސް މި ހާދިސާއާ ގުޅިގެން އެ ދެ ބޯޓު ވަނީ އޮމާނުގެ އިރުއުތުރުން އަނބުރާ ދާން މަޖުބޫރުވެފައެވެ.

ހަމަލާ އެރި އެއް ބޯޓަކީ ވީއެލްސީސީ ކެޓަގަރީގެ ބިޔަ ތެޔޮ ޓޭންކަރެކެވެ. އެ ޓޭންކަރުގައި ޢިރާޤުގެ ދެ މިލިއަން ފީފާ ތެޔޮ ހުރި ކަމަށް މަސްދަރުތަކުން ބުނެއެވެ.

މި ހާދިސާއާ ގުޅިގެން ނިއު ދިއްލީން ވަނީ އީރާނުގެ ސަފީރު ހާޒިރުކޮށްފައެވެ. އިންޑިއާގެ ޚާރިޖީ ވުޒާރާއިން ބުނީ އީރާނުގެ ސަފީރު ހާޒިރުކޮށްފައިވާ ކަމަށެވެ.

އީރާނުން އިއްޔެ ހޮރްމޫޒް ކަނޑުއޮޅި ބޯޓުފަހަރު ދަތުރުކުރުމަށް ހުޅުވާލާފައިވާ ކަމަށް އިޢުލާނުކުރުމާ ގުޅިގެން ގިނަ އަދަދެއްގެ ބޯޓުފަހަރު އެ ކަނޑުއޮޅިން ދަތުރުކުރަން މަސައްކަތްކުރަމުން ދިޔައެވެ. ނަމަވެސް އެމެރިކާގެ ކަނޑުގެ ސިފައިން އީރާނުގެ ބަނދަރުތައް ބަންދުކުރުމާ ގުޅިގެން، ރައްދެއްގެ ގޮތުން އީރާނުން މިއަދު ވަނީ އެ ކަނޑުއޮޅި އަލުން ބަންދުކޮށްފައެވެ.

މީގެ ސަބަބުން ގިނަ ވިޔަފާރި ބޯޓުފަހަރަށް އެ ކަނޑުއޮޅިން ދަތުރުކުރުން ހުއްޓާލަން މަޖުބޫރުވެފައިވެއެވެ.