ކިއުބާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށް ބްރެޒިލްގެ ރައީސް ގޮވާލައްވައިފި
ބްރެޒިލްގެ ރައީސް ލޫލާ ޑަ ސިލްވާ، ކިއުބާއާ ދެކޮޅަށް އެމެރިކާއިން އަޅާފައިވާ އިގްތިސާދީ ދަތިކުރުމުގެ ފިޔަވަޅުތަކާއި ބްލޮކޭޑް ވަގުތުން ހުއްޓާލުމަށް ބައިނަލްއަގުވާމީ މުޖުތަމައަށް ގޮވާލައްވައިފިއެވެ. ރައީސް ލޫލާ ވިދާޅުވީ ކިއުބާގެ ރައްޔިތުންނަށް އެމީހުންގެ އަމިއްލަ ދިރިއުޅުން ކުރިއަށް ގެންދިއުމުގެ ފުރުސަތު ދޭންޖެހޭ ކަމަށެވެ.
ރައީސް ލޫލާގެ ވާހަކަފުޅުގައި ފާހަގަކުރެއްވި ގޮތުގައި ކިއުބާއަށް ދިމާވެފައިވާ މައްސަލަތަކަކީ އެ ގައުމުގެ އަމިއްލަ މައްސަލަތަކެކެވެ. އެއީ އެހެން ގައުމުތަކުގެ ވެރިންނާއި ނުވަތަ ބޭރުގެ ބާރުތަކުން ބަސްބުނަންޖެހޭ ކަންކަން ނޫންކަމަށް އޭނާ ވިދާޅުވިއެވެ.
"ކިއުބާއާ ދެކޮޅަށް އަޅާފައިވާ މި ނުބައި ދަތިކުރުމުގެ ފިޔަވަޅުތައް އުވާލާ އެގައުމަށް ތިކުރާ އަނިޔާ ވަގުތުން ހުއްޓާލާ، ކިއުބާގެ ރައްޔިތުންނަށް މިނިވަން ކަމަށާއި އެކު އެމީހުންގެ ދިރިއުޅުން އުޅުމުގެ ފުރުސަތު ދީ،" ލޫލާ ވިދާޅުވިއެވެ.
އެމެރިކާއިން ކިއުބާއާ ދެކޮޅަށް ދަތިކުރުމުގެ ފިޔަވަޅުތައް އަޅަމުން އަންނަތާ މިހާރު އެތައް އަހަރެއް ވެފައިވާކަން ފާހަގަކުރެވެއެވެ. މީގެ ތެރޭގައި އިގްތިސާދީ ދަތިކުރުމާއި، ބްލޮކޭޑްތަކާއި، އަދި ވެރިކަން ބަދަލުކުރުމަށް ކުރެވުނު މަސައްކަތްތައް ހިމެނެއެވެ. ނަމަވެސް މި ހުރިހާ ފިއްތުންތަކާއެކުވެސް ކިއުބާގެ ރައްޔިތުން ދަނީ ސާބިތުކަމާއެކު ދިރިއުޅެމުންނެވެ.
ލޫލާ އިތުރަށް ވިދާޅުވީ މި ބްލޮކޭޑަކީ ހަމައެކަނި ސިޔާސަތެއް ނޫން ކަމަށާއި، އެއީ އިންސާނިއްޔަތާ ހިލާފު އަނިޔާވެރި އަމަލެއް ކަމަށެވެ. އަދި ދުނިޔޭގެ ގައުމުތަކުން މި މަންޒަރު ބަލާ، މިހާރު ވަރުބަލިވެފައިވާ ކަމަށްވެސް އޭނާ ފާހަގަކުރެއްވިއެވެ.
Ads by BMLމި ބަޔާނަކީ ކިއުބާގެ މިނިވަންކަމަށްޓަކައި ކުރެވޭ ވަކާލާތެއްގެ ގޮތުގައި ބެލެވެއެވެ. މިއީ އެ ގައުމުގެ ވެރިންގެ ކިބައިން މިނިވަންވުމަށްވުރެ ބޮޑަށް، ބޭރުގެ ބާރުތަކުން ކުރިމަތިކުރާ ދަތިކުރުމުގެ ފިޔަވަޅުތަކުން ސަލާމަތްވެ، ހަމަނޭވާލުމުގެ ފުރުސަތު ކިއުބާގެ ރައްޔިތުންނަށް ހޯދައިދިނުމަށް ގޮވާލި ގޮވާލުމެކެވެ.
Ads by MACL
