ބުދަ، 18 ނޮވެމްބަރު 2026
ޚަބަރު

އޮސްޓްރިއާގައި ކުޑަކުދިންގެ ކާނާ ފުޅިއަކުން މީދާ މަރާ ބޭސް ފެނިއްޖެ

އޮސްޓްރިއާގައި ކުޑަކުދިންގެ ކާނާ ފުޅިއަކުން މީދާ މަރާ ބޭސް ފެނިއްޖެ

އޮސްޓްރިއާގެ ފުލުހުން ކުރިއަށްގެންދާ ތަހުގީގެއްގެ ތެރެއިން، ކުޑަކުދިންގެ ކާނާ އުފައްދާ މަޝްހޫރު ކުންފުނި ހިޕް ގެ ފުޅިއަކުން މީދާ މަރާ ބޭސް ފެނިއްޖެއެވެ.

މި ހާދިސާއާ ގުޅިގެން އެ ކުންފުނީގެ ވަކި ބާވަތެއްގެ އުފެއްދުންތައް މިހާރު ވަނީ ބާޒާރުން ނަގަން ފަށާފައެވެ. ނަމަވެސް، އެ ކުންފުނިން އާދީއްތަ ދުވަހު ބުނެފައިވަނީ މިއީ އުފެއްދުމުގެ މަރުހަލާގައި ދިމާވި ކަމެއް ނޫން ކަމަށެވެ.

ޖަރުމަނުގެ ހިޕް ބްރޭންޑުން ހުކުރު ދުވަހުގެ ރޭ އިއުލާންކޮށްފައިވަނީ، އޮސްޓްރިއާގެ ސްޕާ ސުޕަމާކެޓްތަކުގައި ވިއްކަން ހުރި "ކެރެޓް ވިތް ޕޮޓޭޓޯ" ޕިއުރޭ ފުޅިތަކަށް ބަޔަކު ގަސްތުގައި ނުރައްކާތެރި މާއްދާއެއް އަޅާފައިވާ ކަމަށް ބެލެވޭތީ އެ ތަކެތި އަނބުރާ ގެންދާ ކަމަށެވެ.

އޮސްޓްރިއާގެ ބާގަންލޭންޑް ޕްރޮވިންސްގެ ފުލުހުން ހާމަކުރި ގޮތުގައި، ޖަރުމަނާއި ޗެކް ރިޕަބްލިކް އަދި ސްލޮވާކިއާގައި ކުރިއަށްދާ ތަހުގީގުތަކުގެ ތެރެއިން އަތުލައިގަނެވުނު ސާމްޕަލްތައް ޓެސްޓްކުރިއިރު މީދާ މަރާ ބޭހަށް ވަނީ ޕޮޒިޓިވް ވެފައެވެ.

އުފެއްދުމުގެ ފެންވަރާ މެދު ސުވާލެއް ނެތް ކަމަށް ކުންފުނިން ބުނޭ


ހިޕް ކުންފުނީގެ ތަރުޖަމާނަކު އޭއެފްޕީ ނިއުސް އެޖެންސީއަށް މައުލޫމާތު ދެމުން ވިދާޅުވީ، ކުންފުނީގެ އުފެއްދުމާއި، ކޮލިޓީ ކޮންޓްރޯލް ކުރުމުގެ ނިޒާމު އޮތީ ވަރަށް ފުރިހަމައަށް ކަމަށާއި، މި ހާދިސާއަކީ އުފެއްދުމުގެ ފެންވަރާ ގުޅުންހުރި ކަމެއް ނޫން ކަމަށެވެ. އަދި މިކަމުގެ އަސަރު ކޮށްފައިވަނީ ހަމައެކަނި ކަނޑައެޅިފައިވާ ވަކި ސަރަހައްދުތަކަކަށް ކަމަށާއި، ޖަރުމަނާއި ވިލާތުގެ އެހެން ގައުމުތަކަށް މިކަމުގެ ނުރައްކަލެއް ނެތް ކަމަށްވެސް އޭނާ ވިދާޅުވިއެވެ.

އޮސްޓްރިއާގެ ފުޑް ޕްރޮޓެކްޝަން އެޖެންސީން ބުނާ ގޮތުގައި، މިއީ ބަޔަކު މީހުން ކުންފުނީގެ އަތުން ފައިސާ ހޯދުމަށް ހިންގާފައިވާ އަމަލެއް ކަމަށް ބެލެވެއެވެ. ކަސްޓަމަރުންނަށް އިލްތިމާސްކޮށްފައިވަނީ، ފުޅީގެ ފުލުގައި ރަތް ބުރެއްގެ ތެރޭގައި ހުދު ލޭބަލެއް ޖަހާފައިވާ މި އުފެއްދުން ބޭނުން ނުކުރުމަށާއި، ގަތް ފިހާރައަކަށް އެތަކެތި އަނބުރާ ރައްދުކުރުމަށެވެ.

ކުޑަކުދިންގެ ކާނާގެ ބާޒާރަށް ކުރިމަތިވެފައިވާ ގޮންޖެހުންތައް


މިއީ ފަހަކަށް އައިސް ކުޑަކުދިންގެ ކާނާގެ ބާޒާރަށް ކުރިމަތިވި މިފަދަ ފުރަތަމަ ހާދިސާއެއް ނޫނެވެ. މިދިޔަ ޑިސެމްބަރު މަހުން ފެށިގެން ނެސްލޭ، ޑެނޯން އަދި ލެކްޓާލިސް ފަދަ ބޮޑެތި ކުންފުނިތަކުން ވަނީ 60 އަށްވުރެ ގިނަ ގައުމުތަކުން އެކުންފުނިތަކުގެ އުފެއްދުންތައް އަނބުރާ ގެންގޮސްފައެވެ. އެއީ ސެރެއުލައިޑް ނަމަކަށް ކިޔާ ވިހަ މާއްދާއަކުން ތަޣައްޔަރުވެފައިވާ ކަމަށް ޝައްކު ކުރެވިގެންނެވެ.

ފްރާންސްގެ ކަމާބެހޭ ފަރާތްތަކުން ބުނާ ގޮތުގައި، މި ވިހަ މާއްދާ އެކުލެވޭ ކުޑަކުދިންގެ ކާނާ ބޭނުންކުރުމުގެ ސަބަބުން ބައެއް ކުދިން ވަނީ މަރުވެފައެވެ. ނަމަވެސް، މިދިޔަ ޖެނުއަރީ މަހު މަރުވި ތުއްތު ކުއްޖެއްގެ މަރަކީ މި ކާނާއާ ގުޅުންހުރި ކަމެއް ނޫން ކަމަށް މިދިޔަ މާރިޗު މަހު ޕްރޮސެކިއުޓަރުން ވަނީ ވިދާޅުވެފައެވެ.