ބުދަ، 18 ނޮވެމްބަރު 2026
ޚަބަރު

ސިޔާސީ ނުފޫޒުން އެއްކިބާވެފައިވާ ޖުޑީޝަލް ކައުންސިލެއް އަލުން އެކުލަވާލަނީ

ޖޭއެސްސީގެ ރަސްމިޔާތެއްގައި ރައީސް މުހައްމަދު މުއިއްޒު، އެމަނިކުފާނުގެ އަރިހުގައި އުއްތަމަފަނޑިޔާރު (މ) އަދި ޖޭއެސްސީގެ ރައީސް ހުސްނީ މުބާރަކް (ވ). (ފޮޓޯ/ރައީސް އޮފީސް)
ޖޭއެސްސީގެ ރަސްމިޔާތެއްގައި ރައީސް މުހައްމަދު މުއިއްޒު، އެމަނިކުފާނުގެ އަރިހުގައި އުއްތަމަފަނޑިޔާރު (މ) އަދި ޖޭއެސްސީގެ ރައީސް ހުސްނީ މުބާރަކް (ވ). (ފޮޓޯ/ރައީސް އޮފީސް)

ސިޔާސީ އެއްވެސް ނުފޫޒެއް ނޯންނާނެ ގޮތެއްގެ މަތިން، ޝަރުއީ ދާއިރާގެ އިދާރީ ކަންކަން ބެލެހެއްޓުމަށްޓަކައި "ޖުޑީޝަލް ކައުންސިލް" އަލުން އުފެއްދުމަށް ނިންމައި، އެކަމުގެ މަޝްވަރާތައް ފެށުމަށް ތައްޔާރުވެއްޖެއެވެ.

ޖުޑީޝަލް ސާވިސް ކޮމިޝަން (ޖޭއެސްސީ) ގެ ރައީސް ހުސްނީ މުބާރަކު ވިދާޅުވީ، މި ކައުންސިލް އަލުން އެކުލަވާލާނީ ޝަރުއީ ދާއިރާގެ ކަމާބެހޭ ފަރާތްތަކުގެ ލަފަޔާއި އިރުޝާދާ އެކު، ފަނޑިޔާރުގެއަށް ސިޔާސީ ބާރުވެރިކަން ނުވަދެވޭނެ ފަދަ ވަރުގަދަ އުސޫލުތަކެއްގެ ދަށުން ކަމަށެވެ.

މި ކައުންސިލަކީ ރާއްޖޭގެ ކޯޓުތަކުން ހަދަންޖެހޭ ގަވާއިދުތައް އެއްގޮތްކޮށް، ހުރިހާ ކޯޓުތަކެއްގެ ހިންގުން އެއް މިންގަނޑެއްގައި ހިފެހެއްޓުމަށް 2010 ވަނަ އަހަރު އުފެއްދި ތަނެކެވެ. ނަމަވެސް 2011 ވަނަ އަހަރު ސުޕްރީމް ކޯޓުގެ ހުކުމަކުން އެ ކައުންސިލް ވަނީ އުވާލާފައެވެ. އޭގެ ފަހުން ޝަރުއީ ދާއިރާގެ އިދާރީ ކަންކަން ބަލަހައްޓާ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އޮންނަނީ ޖޭއެސްސީގެ ބެލުމުގެ ދަށުގައެވެ.

ހުސްނީ ފާހަގަކުރެއްވި ގޮތުގައި، މިހާރު ޑީޖޭއޭ އޮތް ގޮތުން ޖޭއެސްސީގެ ނުފޫޒު ޝަރުއީ ދާއިރާގެ ހިންގުމަށް ފޯރުމުގެ ފުރުސަތު އޮވެއެވެ. ނަމަވެސް ޖުޑީޝަލް ކައުންސިލް އަލުން އުފެދި، އުއްތަމަ ފަނޑިޔާރުގެ ބެލުމުގެ ދަށުން ކޯޓުތަކުގެ އިސް ފަނޑިޔާރުން ހިމެނޭ ގޮތަށް އެތަން ހިންގަން ފެށުމުން، ޝަރުއީ ދާއިރާގެ މިނިވަންކަން އިތުރަށް ކަށަވަރުވެގެންދާނެއެވެ.

މިކަމާ ގުޅޭގޮތުން ޖޭއެސްސީގެ ކުރީގެ ރައީސް ހުސެއިން ރިޒާ ވިދާޅުވީ، މިހާރު ޝަރުއީ ދާއިރާގެ ބާރުތައް ހުރީ އެކި ތަންތަނަށް ބެހިފައި ކަމަށާއި، އޭގެ ސަބަބުން ކަންކަން ނިންމުމުގައި ލަސްތަކެއް ކުރިމަތިވާ ކަމަށެވެ. ޖުޑީޝަލް ކައުންސިލެއް އޮތުމުން އިދާރީ ޒިންމާތައް ސާފުވެ، ފަނޑިޔާރުންގެ ބައިވެރިވުމާ އެކު ކޯޓުތަކުގެ މައްސަލަތަކަށް އެންމެ އެދެވޭ ހައްލު ލިބިގެންދާނެ ކަމަށް އޭނާ ވިދާޅުވިއެވެ.

މި ކައުންސިލް އަލުން އެކުލަވާލުމަކީ ޝަރުއީ ދާއިރާ އިސްލާހުކުރުމަށް ސަރުކާރުން ގެންގުޅޭ ތަސައްވުރުގެ ތެރޭގައި ހިމެނޭ މުހިންމު ފިޔަވަޅެކެވެ.