ބޯހިޔާވަހިކަމުގެ މަޝްރޫޢުތަކަށް ބޮޑު ތަރުޙީބެއް: 20،000 އަށްވުރެ ގިނަ ފޯމު ހުށަހަޅައިފި
ސަރުކާރުން އަލަށް ހުޅުވާލި ބޯހިޔާވަހިކަމުގެ ސްކީމްތަކުގެ ދަށުން ގޯއްޗާއި ފްލެޓަށް އެދި މިހާތަނަށް 20،000 އަށްވުރެ ގިނަ ފޯމު ހުށަހަޅާފައިވާކަން ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބް ހާމަކުރައްވައިފިއެވެ. މި މަޝްރޫޢަކީ "ބޯހިޔާވަހިކަން އެންމެންނަށް" ސިޔާސަތުގެ ދަށުން، 15،000 ގޯއްޗާއި 7،900 ފްލެޓް ދޫކުރުމަށް އަމާޒުކޮށްގެން ކުރިއަށްގެންދާ ބޮޑު މަޝްރޫޢެކެވެ.
ވަޒީރު ވިދާޅުވި ގޮތުގައި، މިހާތަނަށް ހުށަހަޅާފައިވާ ފޯމުތަކުގެ އިތުރުން 16،000 އެއްހާ ފޯމު ޑްރާފްޓް މަރުހަލާގައި (ފުރިހަމަ ނުކޮށް) އެބައޮތެވެ. އެހެންކަމުން، ފޯމު ހުށަހެޅުމުގެ ސުންގަޑި ހަމަވާއިރު ޖުމްލަ 36،000 އެއްހާ ފޯމު ލިބޭނެ ކަމަށް މިހާރު އަންދާޒާ ކުރެވެއެވެ. ފޯމު ހުށަހެޅުމުގެ އެންމެ ފަހު ތާރީޚަކީ މިއަންނަ މެއި މަހުގެ 31 ވަނަ ދުވަހެވެ.
ސްކީމަށް ގެނެވުނު މުހިންމު ބަދަލުތައް
ރައްޔިތުންގެ ޚިޔާލާއި ދިރިއުޅުމުގެ ޙާލަތަށް ރިޢާޔަތްކޮށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން މި ސްކީމަށް ވަނީ އާ ކެޓަގަރީތަކެއް އިތުރުކޮށްފައެވެ. އޭގެ ތެރޭގައި ހިމެނެނީ:
-
ނުކުޅެދުންތެރިކަން ހުންނަ ފަރާތްތައް: ޚާއްޞަ ކެޓަގަރީއެއްގެ ދަށުން ބެލެނިވެރިޔާގެ ނަމުގައި ފޯމު ހުށަހެޅުމުގެ ފުރުޞަތު.
-
އާއިލީ ބޯހިޔާވަހިކަން: ދެ ޖިންސުގެ ދަރިން ތިބެ، 2 ކޮޓަރީގެ ފްލެޓް ލިބިފައިވާ ފަރާތްތަކަށް 3 ކޮޓަރީގެ ފްލެޓަށް އެދުމުގެ ފުރުޞަތު.
-
ގޯތި ބަދަލުކުރުން: މާލޭގެ ހަނި ގޯޅިތަކުގައި ހުރި ކުދި ގޯތިތައް ދޫކޮށްލާ ފަރާތްތަކަށް ޚާއްޞަ އިސްކަމެއް ދިނުން.
-
ދެމަފިރިންގެ ބޯހިޔާވަހިކަން: އެކަކުގެ ނަމުގައި ބޯހިޔާވަހިކަމެއް އޮތް ނަމަވެސް، "ގޯތި ގެދޮރު" ޕްރޮގްރާމްގެ ދަށުން އަނެކާއަށް ކުރިމަތިލެވޭ ގޮތް ހެދުން.
އިވެލުއޭޝަން މަރުހަލާ
ވަޒީރު އިތުރަށް ވިދާޅުވީ، ޕޮއިންޓް ދިނުމުގެ އުސޫލަށް އެއްވެސް ބަދަލެއް ނުގެންނަވާނެ ކަމަށެވެ. މެއި މަހުގެ ނިޔަލަށް ފޯމު ހުށަހެޅުމުގެ މުއްދަތު ހަމަވުމާއެކު، ހުށަހަޅާފައިވާ ފޯމުތައް އިވެލުއޭޓް ކުރުމުގެ (ވަޒަންކުރުމުގެ) މަސައްކަތް ސަރުކާރުން ފަށާނެއެވެ.
މިއީ ގިނަ ބަޔަކަށް ފުރުޞަތު ދިނުމަށްޓަކައި ފޯމު ހުށަހެޅުމުގެ މުއްދަތު އިތުރުކުރި ދެވަނަ ފަހަރެވެ. ސަރުކާރުގެ އަމާޒަކީ ދެފުށް ފެންނަ އުސޫލެއްގެ ދަށުން، އެންމެ ބޭނުންޖެހިފައިވާ ފަރާތްތަކަށް ބޯހިޔާވަހިކަން ކަށަވަރުކޮށްދިނުމެވެ.
Ads by MACL
