ވާދޫއިން މަސްތުވާތަކެއްޗާއެކު ހައްޔަރުކުރި ދެ މީހުން ބަންދުގައި ބޭތިއްބުމަށް އަމުރުކޮށްފި
މަސްތުވާތަކެތި ގެންގުޅެ، ބޭނުންކުރާ ކަމުގެ ތުހުމަތުގައި ގދ. ވާދޫއިން ހައްޔަރުކުރި ދެ މީހެއްގެ ބަންދުގެ މުއްދަތު ކޯޓުން އިތުރުކޮށްފިއެވެ.
މި މަހުގެ 23 ވަނަ ދުވަހު ފުލުހުން ހިންގި ހާއްސަ ހަރަކާތެއްގެ ތެރެއިން ހައްޔަރުކޮށްފައިވަނީ ޒުވާން ފިރިހެނަކާއި އަންހެނެކެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވަނީ:
-
މުޙައްމަދު އަޝްރަފް (30އ): ގދ. ގައްދޫ / ސަންދަރޯސްގެ
-
އާމިނަތު ޝާޔާ ޝުޖާޢު (18އ): ގއ. މާމެންދޫ / ހިތްވަރު
ފުލުހުން މައުލޫމާތު ދިން ގޮތުގައި މި ދެ މީހުން ހުއްޓުވައި ބަލައިފާސްކޮށްފައިވަނީ ވާދޫ ބަނދަރު ސަރަހައްދުންނެވެ. އެ މީހުން ބަލައިފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި ރަބަރު ޕެކެޓުތަކެއް ފެނިފައިވާ ކަމަށާއި، މި ތަކެތީގެ ވަގުތީ ބަރުދަނަކީ 3.28 ގުރާމު ކަމަށް ފުލުހުން ވިދާޅުވިއެވެ.
މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުޙައްމަދު އަޝްރަފް 30 ދުވަހަށް ބަންދުގައި ބެހެއްޓުމަށް ވަނީ އަމުރުކޮށްފައެވެ. އަދި އާމިނަތު ޝާޔާ ޝުޖާޢުގެ ބަންދަށް ކޯޓުން ވަނީ 60 ދުވަސް އިތުރުކޮށްދީފައެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
Ads by MACL
