ބުދަ، 18 ނޮވެމްބަރު 2026
ޚަބަރު

ތަޖުރިބާއާއިއެކު ލަމްއާން އެމްޕީއެލްގެ ބޯޑު ޑިރެކްޓަރަކަށް

ތަޖުރިބާއާއިއެކު ލަމްއާން އެމްޕީއެލްގެ ބޯޑު ޑިރެކްޓަރަކަށް

ކުންފުނިތައް ހިންގުމުގެ ދާއިރާގައި ހުރި ތަޖުރިބާއާއެކު، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުން އިސްތިއުފާ ދެއްވި މުހައްމަދު ލަމްއާން، މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޑިރެކްޓަރުންގެ ބޯޑުގެ އެގްޒެކްޓިވް މެންބަރުކަމަށް މިއަދު އައްޔަނުކޮށްފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ، އެމްޕީއެލްގެ ޑިރެކްޓަރުންގެ ބޯޑުގެ އެގްޒެކްޓިވް މެންބަރުކަމުގައި ކުރިން ހުންނެވި އިބްރާހިމް ޒިޔަތު އެ މަގާމުން ވަކިކޮށް، އެ މަގާމަށް މ. ހަޒާރީވިލާ، މުހައްމަދު ލަމްއާން މިއަދު އައްޔަނު ކުރަން ނިންމާފައިވާ ކަމަށެވެ.

ލަމްއާން އައްޔަނުކުރި މި މަގާމަކީ ކުންފުނީގެ އޮޕަރޭޝަނަލް ލެވެލްގެ މަސައްކަތްތަކުގައި ޢަމަލީގޮތުން ބައިވެރިވާނެ މަގާމެކެވެ.

ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލްގެ އިސް މަގާމަކަށް ލަމްއާން އައްޔަންކުރެއްވީ ފެބްރުއަރީ 1، 2024 ގައެވެ. ނަމަވެސް، އެހެން އެސްއޯއީއަކަށް ބަދަލުވުމަށްޓަކައި އޭނާ ވަނީ އިއްޔެ އެ ކުންފުނިން އިސްތިއުފާ ދެއްވާފައެވެ.

ލަމްއާނަކީ މީގެ ކުރިން ވެސް ސަރުކާރުގެ ބޮޑެތި ކުންފުނިތަކުގައި އިސް މަގާމުތައް ފުރުއްވާފައިވާ ބޭފުޅެކެވެ. އެގޮތުން، ކުރީގެ ރައީސް އަބްދުﷲ ޔާމީންގެ ސަރުކާރުގެ ފަހު ދުވަސްކޮޅު ފެނަކަ ކޯޕަރޭޝަންގެ މެނޭޖިން ޑިރެކްޓަރުކަން އޭނާ ކުރައްވާފައިވެއެވެ.

މި މަހުގެ 4 ވަނަ ދުވަހު ބޭއްވި ކައުންސިލް އިންތިހާބަށް ފަހު، ސަރުކާރުން ވަނީ ކުންފުނިތަކުގެ ހިންގުން ހަރުދަނާކުރުމަށްޓަކައި ބޮޑެތި ބަދަލުތަކެއް ގެންނަން ފަށާފައެވެ.

އެމްޕީއެލްގެ އިތުރުން މިފްކޯ، ފެނަކަ އަދި އެމްޑަބްލިއުއެސްސީ ފަދަ ކުންފުނިތަކުގެ ބޯޑުތަކަށް ވެސް މި ފަހުން ވަނީ ބަދަލުތައް ގެނެސްފައެވެ.