ބުދަ، 18 ނޮވެމްބަރު 2026
ޚަބަރު

އީރާނާއެކު ގުޅުން ބަދަހިކުރާ ގައުމުތަކަށް ޓްރަމްޕް ވަރުގަދަ އިންޒާރެއް

އީރާނާއެކު ގުޅުން ބަދަހިކުރާ ގައުމުތަކަށް ޓްރަމްޕް ވަރުގަދަ އިންޒާރެއް

އީރާނާއެކު އަސްކަރީ އަދި އިގްތިސާދީ ގުޅުންތައް ބަދަހިކުރަމުންދާ ގައުމުތަކާ މެދު ހަރުކަށި ފިޔަވަޅު އަޅުއްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ޓްރަމްޕް މިހެން ވިދާޅުވީ އީރާނަށް މިސައިލް ސަޕްލައިކުރުމާއި ތެލުގެ ވިޔަފާރިކުރާ ގައުމުތަކަށް އަމާޒުކުރައްވައެވެ.

ޗައިނާއިން އީރާނަށް މިސައިލް ފޯރުކޮށްދީފައިވާ ކަމަށް ބުނާ ރިޕޯޓްތަކާ ގުޅިގެން ޓްރަމްޕް ވިދާޅުވީ، ޗައިނާއިން އެތެރެކުރާ މުދަލުން 1000 އިންސައްތައިގެ ޓެރިފް ނުވަތަ އިމްޕޯޓް ޑިއުޓީ ނަގާނެ ކަމަށެވެ. މިއީ ޗައިނާގެ އިގްތިސާދަށް ބޮޑު ލޮޅުމެއް އަރާނެ ފަދަ ހަރުކަށި އިންޒާރެކެވެ.

މީގެ އިތުރުން، އީރާނުން ތެޔޮ ގަތުން ކުރިއަށްގެންދާ އިންޑިއާއަށް ވެސް ޓްރަމްޕް ވަނީ އިންޒާރު ދެއްވާފައެވެ. އޭނާ ވިދާޅުވީ އިންޑިއާއިން އެތެރެކުރާ މުދަލުން 200 އިންސައްތައިގެ ޓެރިފް ނަގާނެ ކަމަށެވެ. މިއީ ބައިނަލްއަގުވާމީ ވިޔަފާރީގެ މަސްރަހުގައި އުފެދިފައިވާ ނުތަނަވަސްކަން އިތުރުވެގެންދާނެ ކަމެއް ކަމަށް ބެލެވެއެވެ.

ނަމަވެސް، އީރާނާއެކު އެއްގަމު މަގުން ދަތުރުފަތުރުގެ މަގުތައް ހުޅުވާލި ޕާކިސްތާނާ މެދު ޓްރަމްޕް ގެންގުޅުއްވީ ތަފާތު ރޫހެކެވެ. ޓްރަމްޕް ވިދާޅުވީ ޕާކިސްތާނުގެ ކަންކަން ވަރަށް ގާތުން ބައްލަވަމުން ގެންދަވާ ކަމަށާއި، އެ ގައުމުގެ ފީލްޑް މާޝަލް އަދި ބޮޑުވަޒީރަށް ވަރަށް ބޮޑަށް އިހުތިރާމް ކުރައްވާ ކަމަށެވެ.

ޓްރަމްޕްގެ މި އިންޒާރާއި އެކު ކުރިއަށް އޮތް ތަނުގައި އެމެރިކާގެ ޚާރިޖީ ސިޔާސަތަށް އަތުވެދާނެ ބަދަލުތަކާއި، ބައިނަލްއަގުވާމީ ގުޅުންތަކަށް ކުރާނެ އަސަރުތަކާ މެދު ސިޔާސީ ދާއިރާގެ މާހިރުން ދަނީ ބަހުސްކުރަމުންނެވެ.