ރާއްޖެއާއި ލަންކާގެ 60 އަހަރުވީ ގުޅުން ރަމްޒުކޮށްދޭ ހަނދާނީ ގަހެއް ކޮލަމްބޯގައި އިންދަވައިފި
ދިވެހިރާއްޖެއާއި ސްރީލަންކާއާ ދެމެދު އޮތް ޒަމާންވީ ސިޔާސީ ގުޅުމަށް 60 އަހަރު ފުރުން ފާހަގަކުރުމުގެ ގޮތުން، ދެ ޤައުމުގެ ބަދަހި އެކުވެރިކަން ރަމްޒުކޮށްދޭ ޚާއްޞަ ގަހެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންދަވައިފިއެވެ.
ކޮލަމްބޯގެ ވިހާރަ މަހާ ދޭވީ ޕާކުގައި ބޭއްވި މި ރަސްމިއްޔާތުގައި ރައީސް މުޢިއްޒުގެ އަރިހުގައި ސްރީލަންކާގެ ރައީސް އަނޫރާ ކުމާރާ ޑިސަނާޔަކެ ބައިވެރިވެވަޑައިގެން، އެމަނިކުފާނަށް ވަނީ ހޫނު މަރުޙަބާއެއް ދަންނަވާފައެވެ.
މި ރަސްމިއްޔާތުގައި ދެ ޤައުމުގެ އިސްވެރިން އިންދަވާފައިވަނީ ސްރީލަންކާއަށް އެކަނި ޚާއްޞަ، އަދި ނެތިދިއުމުގެ ބިރު ހީވެފައިވާ "ހޯސްފީލްޑިއާ އިރީއޫގެޑީ" (Horsfieldia iryaghedhi) ނަމަކަށް ކިޔާ ގަހެކެވެ. މި ހަރަކާތަކީ ހަމައެކަނި ރަމްޒީ ކަމެއް ނޫން ކަމަށާއި، މިއީ ތިމާވެށީގެ ދެމެހެއްޓެނިވިކަމަށާއި އަންނަން އޮތް ޖީލުތަކުގެ ލާބައަށްޓަކައި ދެ ޤައުމުން ގުޅިގެން ކުރާ މަސައްކަތްތައް ދައްކުވައިދޭ ކަމެއް ކަމަށް ރައީސް އޮފީހުން ވިދާޅުވިއެވެ.
ރައީސުލްޖުމްހޫރިއްޔާ ސްރީލަންކާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން ކުރިއަށްދިޔަ މި ހަރަކާތަކީ، 26 ޖުލައި 1965 ގައި ދެ ޤައުމުގެ ދެމެދުގައި ސިޔާސީ ގުޅުން ޤާއިމުކުރި ފަހުން އޮތް ގާތްކަން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެކެވެ. ދެ ޤައުމުގެ މެދުގައި އޮތް އިހްތިރާމާއި ރައްޔިތުންގެ މެދުގައި އޮތް ގާތް ގުޅުމަކީ މި 60 އަހަރުގެ ތެރޭގައި އެކުވެރިކަން ދެމިއޮތް މައިގަނޑު އަސާސެވެ.
މި ދަތުރުފުޅަކީ ދެ ޤައުމަށް ފައިދާހުރި ދާއިރާތަކުން ގުޅުން ބަދަހިކުރުމަށް ކުރިއަށްގެންދާ މަތީ ފަންތީގެ ދަތުރުފުޅެކެވެ.
Ads by MACL
