މިފްކޯގެ "ފަސްމީރު" އުފެއްދުންތައް ލަންކާގެ ބާޒާރަށް
ރާއްޖޭގެ މަސްވެރިކަމުގެ އުފެއްދުންތައް ބައިނަލްއަޤުވާމީ ބާޒާރުގައި ފުޅާކުރުމަށް ސަރުކާރުން ހިފާފައިވާ އަމާޒަށް ވާސިލްވުމަށްޓަކައި، މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ކޯޕަރޭޝަން (މިފްކޯ) ގެ އުފެއްދުންތައް ސްރީލަންކާގައި ރަސްމީކޮށް ތަޢާރަފްކޮށްފިއެވެ.
ސްރީލަންކާގައި ބޭއްވި މި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
މި ރަސްމިއްޔާތުގައި މިފްކޯގެ މަސްދަޅާއި، ވަޅޯމަހާއި، ރިހާކުރުގެ އިތުރުން މުގުރިމަސް ހިމެނޭހެން "ފަސްމީރު" ބްރޭންޑްގެ އެކި ބާވަތްތައް ލަންކާގެ މާކެޓަށް ނެރެދެއްވީ ފިޝަރީޒް މިނިސްޓަރު އަޙްމަދު ޝިޔާމެވެ. މި ހަރަކާތަކީ ދިވެހި މަސްވެރިކަމުގެ އުފެއްދުންތަކުން ލިބޭ ނަފާ އިތުރުކޮށް، ބޭރުގެ ކަސްޓަމަރުންގެ މެދުގައި ދިވެހި އުފެއްދުންތަކަށް އޮތް އިތުބާރު ބޮޑުކުރުމަށް ކުރިއަށްގެންދިޔަ މުހިންމު ފިޔަވަޅެކެވެ.
ލަންކާގެ ކަމާބެހޭ ވަޒީރުންނާއި ވިޔަފާރިވެރިން ބައިވެރިވެވަޑައިގެންނެވި މި ހަފްލާއަކީ، މިދިޔަ އަހަރު ތަޢާރަފްކުރި "ފްރޮމް މޯލްޑިވްސް" ޤައުމީ ބްރޭންޑްގެ ދަށުން ދިވެހި އުފެއްދުންތައް ދުނިޔޭގެ ކުރިމައްޗަށް ނެރުމަށް ކުރަމުންދާ މަސައްކަތުގެ ތެރެއިން އައި ކުރިއެރުމެކެވެ.
މީގެ ސަބަބުން ރާއްޖޭގެ އުފެއްދުންތެރިންނަށް ބައިނަލްއަޤުވާމީ މައިދާނުގައި ވާދަވެރިކަމާއެކު ފައިތިލަ ސާބިތުކުރުމަށް އިތުރު ދޮރުތަކެއް ހުޅުވިގެންދާނެއެވެ.
Ads by MACL
