މީކާއީލް ނަޝީދަށް: ރޫޅާލި ޕާޓީ އަލުން ރާވާލާނަން
އެމްޑީޕީ "ރޫޅާލާނެ" ކަމަށް ވިދާޅުވެ ކުރީގެ ރައީސް މުހައްމަދު ނަޝީދު ކުރިން ދެއްކެވި ވާހަކަފުޅުތަކަށް އިޝާރާތްކޮށް އެމްޑީޕީގެ ޗެއާޕާސަންގެ މަގާމަށް ވާދަކުރައްވާ މީކާއިލް ނަސީމް ރޭ ހޫނު ރައްދެއް ދެއްވައިފިއެވެ.
މީކާއިލް ވިދާޅުވީ އޭނާ މި އިންތިހާބަށް ނުކުމެ ހުރީ ޕާޓީން ބޭރުވަމުންދާ "ލީކުތައް" ނައްތާލައި، އާންމު މެންބަރުންގެ ބައިވެރިވުމާ އެކު އެމްޑީޕީ ބޮޑުކޮށް އަލުން ރާވާލަދިނުމަށް ކަމަށެވެ.
ކެމްޕޭން ޖަލްސާގައި ވާހަކަދައްކަވަމުން މީކާއިލް ވަނީ ރައީސް ނަޝީދުގެ ސިޔާސީ އަމަލުފުޅުތަކަށް ވަރަށް ބޮޑަށް ފާޑުވިދާޅުވެ، ޗެއާޕާސަންގެ މަގާމަކީ 2028 ގެ ރިޔާސީ އިންތިހާބަށް ނުވަތަ އެ ނޫން ވެސް ބޮޑު މަގާމަކަށް ދިއުމަށް ބޭނުންކުރާ "ހަރުފަތެއް" ނޫން ކަމަށް ވިދާޅުވެފަ އެވެ. މީކާއިލް ފާހަގަކުރެއްވި ގޮތުގައި އޭނާ ބޭނުންވަނީ ގައުމީ މަޖިލީހުން އައްޔަންކުރާ ވަގުތީ ޗެއާޕާސަނެއްގެ މަގާމުގެ ބަދަލުގައި، 16 އަހަރު ވަންދެން މަސައްކަތް ކުރި އާންމު މެންބަރުންގެ ސީދާ ވޯޓުން އިންތިހާބު ކާމިޔާބު ކުރައްވާށެވެ.
ޕާޓީގެ މަސްލަހަތާ ގުޅޭގޮތުން ވާހަކަދައްކަވަމުން މީކާއިލް ވިދާޅުވީ، އޭނާއަކީ ދެރަވާ ކޮންމެ ފަހަރަކު މެންބަރުންގެ ޖަޒުބާތާ ކުޅެ ދޮގު ހަދާނެ މީހެއް ނޫން ކަމަށާއި، އަދި ޕާޓީގެ އެތެރޭގެ އިންތިހާބުތަކުގެ މައްސަލަ ކޯޓަށް ވައްދައިގެން މަސްލަހަތު ނަގާލާނެ މީހެއް ވެސް ނޫން ކަމަށެވެ. ވަކިން ހާއްސަކޮށް، ކުރީގެ ޗެއާޕާސަން ފައްޔާޒު އިސްމާއިލްއަކީ 39،000 މެންބަރުން ކަނޑާލި މީހާ ކަމަށް ބުނުމަށް ފަހު، އަނެއް ދުވަހު އޭނާ ވެރިކަމަށް ގެންނަން ވާހަކަ ދެއްކުމަކީ ގަބޫލުކުރެވޭނެ އުސޫލެއް ނޫން ކަމަށް ވެސް މީކާއިލް ވިދާޅުވި އެވެ.
އެމްޑީޕީގެ ރައީސްކަމުގައި ހުންނަވައި ޕާޓީން ވަކިވެވަޑައިގެން 'ދަ ޑިމޮކްރެޓްސް' އުފެއްދެވި ނަޝީދު، އަލުން އެމްޑީޕީއާ ގުޅިވަޑައިގަތުމަށްފަހު މިހާރު މަސައްކަތް ކުރައްވަނީ ފައްޔާޒު އިސްމާއިލްއާ އެކު އެއް ފެކްޝަނެއްގަ އެވެ. ނަމަވެސް މީކާއިލް ރޭ ތަކުރާރުކޮށް ވިދާޅުވީ، ޕާޓީ ރޫޅާލުމުގެ ވާހަކަ ދެއްކެވި ބޭފުޅުންނަށް ފުރުސަތު ނުދީ، އޭނާ ނުކުމެ ހުރީ ޕާޓީގެ ލީކުތައް ފޫބައްދައި އެމްޑީޕީ ބަދަހިކޮށް އަލުން އަތުރާލަން ކަމަށެވެ.
Ads by MACL
