ބުދަ، 18 ނޮވެމްބަރު 2026
ޚަބަރު

ދިފާޢީ ގުޅުން ބަދަހިކުރުމާއި ގުޅޭގޮތުން އޮސްޓްރޭލިއާ ސަފީރާއި ދިފާޢީ ވަޒީރު މަޝްވަރާކުރައްވައިފި

ދިފާޢީ ވަޒީރު ހަސަން ރަޝީދާއި އޮސްޓްރޭލިއާ ސަފީރު ޑޭވިޑް ޖެސަޕް ބައްދަލުކުރެއްވުން / ފޮޓޯ: ދިފާޢީ ވުޒާރާ
ދިފާޢީ ވަޒީރު ހަސަން ރަޝީދާއި އޮސްޓްރޭލިއާ ސަފީރު ޑޭވިޑް ޖެސަޕް ބައްދަލުކުރެއްވުން / ފޮޓޯ: ދިފާޢީ ވުޒާރާ

ރާއްޖޭގެ ދިފާޢީ ދާއިރާގެ އިންސާނީ ވަސީލަތްތައް ބިނާކުރުމަށާއި، ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމަށް ކުރެވެމުންދާ މަސައްކަތްތަކާ ގުޅޭގޮތުން އޮސްޓްރޭލިއާއާއި ދިވެހިރާއްޖެއާ ދެމެދު މުހިންމު މަޝްވަރާތަކެއް ބާއްވައިފިއެވެ.

މި މަޝްވަރާތައް ކުރިއަށް ގެންގޮސްފައިވަނީ އޮސްޓްރޭލިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖެސަޕް، ދިފާޢީ އަދި ވަޠަނީ ޚިދުމަތާ ބެހޭ ވަޒީރު ޙަސަން ރަޝީދުގެ އަރިހަށް ކުރެއްވި އިޙްތިރާމުގެ ޒިޔާރަތުގައެވެ.

މި ބައްދަލުވުމުގައި ދެ ޤައުމުގެ މަސްލަހަތު ހިމެނޭ ދިފާޢީ އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން ފުޅާ ދާއިރާއެއްގައި ވާހަކަދެކެވުނެވެ. ދިފާޢީ ވުޒާރާއިން މަޢުލޫމާތު ދެއްވި ގޮތުގައި، މި މަޝްވަރާތަކުގައި އެންމެ ބޮޑު އިސްކަމެއް ދީފައިވަނީ ކަނޑުގެ ސަރަހައްދު ހިމާޔަތްކުރުމަށާއި، ދިފާޢީ ދާއިރާގެ މުވައްޒަފުންގެ ތަމްރީނާއި ހުނަރު އިތުރުކުރުމުގެ އިތުރުން ސަރަހައްދީ ހަމަޖެހުން ދެމެހެއްޓުމަށެވެ.

ދިފާޢީ ވަޒީރު ޙަސަން ރަޝީދު ވަނީ ރާއްޖޭގެ ދިފާޢީ ނިޒާމު ހަރުދަނާކުރުމަށް އޮސްޓްރޭލިއާ ސަރުކާރުން ދެމުންދާ މެދުކެނޑުމެއް ނެތް އެހީތެރިކަމަށް ޝުކުރު އަދާކުރައްވާފައެވެ. އަދި ދެ ޤައުމުގެ ދެމެދުގައި އޮތް ގާތް ގުޅުން އިތުރަށް ވަރުގަދަކުރުމަކީ، ސަރަހައްދީ ސަލާމަތާ ގުޅުންހުރި ގޮންޖެހުންތަކަށް ފުރިހަމައަށް އިޖާބަދިނުމަށް ކޮންމެހެން މުހިންމު ކަމެއްކަން ވަޒީރު ފާހަގަކުރެއްވިއެވެ.

އޮސްޓްރޭލިއާއަކީ ދިވެހިރާއްޖޭގެ ދިފާޢީ ކަންކަމުގައި ދިގު މުއްދަތަކަށް އެހީތެރިކަން ފޯރުކޮށްދެމުން އަންނަ ބައިވެރިއެކެވެ. އެގޮތުން، ދާދިފަހުން އޮސްޓްރޭލިއާ ސަރުކާރުން ދިވެހި ސިފައިންނަށް ހަދިޔާކުރި "ގާޑިއަން ކްލާސް" ޕެޓްރޯލް ބޯޓަކީ، ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ޤާބިލުކަން އިތުރުކުރުމަށް ސަރުކާރުން ކުރަމުންދާ މަސައްކަތުގެ ދަށުން ލިބުނު މުހިންމު ވަސީލަތެއްކަން ސަރުކާރުން ފާހަގަކުރެއެވެ.