އިޤްތިޞާދު އާރާސްތުކޮށް ރައްޔިތުންނަށް ފާގަތިކަން ހޯދައިދޭނަން: ރައީސް
ޤައުމު ވެއްޓިފައި އޮތް އިޤްތިޞާދީ ފުން އަނދަވަޅުން ސަލާމަތްކޮށް، ދިވެހި ކޮންމެ ރައްޔިތަކަށް އުފާ ފާގަތި ދިރިއުޅުމެއް ކަށަވަރުކޮށްދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެއްވައިފިއެވެ.
ޕީއެންސީގެ ޖަގަހަ ޖަލްސާއެއްގައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނުގެ ސަރުކާރުން އިސްކަންދެނީ ޑިމޮކްރެޓިކް ހަމަތަކުގެ މަތިން ޤައުމީ ވިސްނުމެއްގައި ކަންކަން ކުރިއަށް ގެންދިއުމަށް ކަމަށާއި، ވޭތުވެދިޔަ ދެ އަހަރާއި ބައިގެ ތެރޭގައި ސިޔާސީ ހަމަޖެހުން ޤާއިމްކުރުމަށްފަހު މިހާރު އެންމެ ބޮޑު އިސްކަމެއް ދެނީ އިޤްތިޞާދީ ހަމަޖެހުން ހޯދުމަށް ކަމަށެވެ.
އިދިކޮޅު ފަރާތްތަކުން ވެރިކަން ދޫކޮށްލިއިރު އިޤްތިޞާދު އޮތީ ވަރަށް ބޮޑަށް ހީނަރުވެފައިކަން ފާހަގަކުރައްވަމުން ރައީސް ވިދާޅުވީ، ސަރުކާރުން މިހާރު ތަންފީޒުކުރަމުންދާ ވަށާޖެހޭ އިޤްތިޞާދީ ސިޔާސަތުގެ ދަށުން ބޮޑެތި ދަރަނިތައް ދައްކައި ޚަލާޞްކުރަމުންދާ ކަމަށެވެ. އެގޮތުން ފާއިތުވި 40 އެއްހާ ދުވަހުގެ ތެރޭގައި 974 މިލިއަން ޑޮލަރުގެ ދަރަނި ދައްކާފައިވާ ކަމަށާއި، މި މަސައްކަތުގެ ސަބަބުން ކޮންމެ ރައްޔިތެއްގެ ބޮލުގައި އެޅިފައި އޮތް ދަރަނީގެ ބުރަ ވަނީ ނިސްބަތުން ކުޑަވެ، އަންނަން އޮތް ޖީލުތަކަށް އަމާން އައްސޭރިއަކަށް ޤައުމު ގެންދެވޭނެ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު އިތުރަށް ވިދާޅުވި ގޮތުގައި ސަރުކާރުގެ އެންމެ މުހިންމު މަޤްޞަދަކީ ރައްޔިތުންގެ އާންމު ދިރިއުޅުމުގެ ފެންވަރު މަތިކޮށް، ކޮންމެ އާއިލާއަކަށް ލިބޭ އާމްދަނީ އިތުރުކުރުމާއެކު އަސާސީ ބޯހިޔާވަހިކަން ކަށަވަރުކޮށްދިނުމެވެ.
މިކުރާ ރޭވުންތެރި މަސައްކަތުގެ ނަތީޖާއަކަށް ވާނީ ދިވެހި ރައްޔިތުން އެދޭފަދަ ފާގަތި، ތަނަވަސް ދުވަސްތަކެއް ޤައުމަށް އައުން ކަމަށާއި، އިޤްތިޞާދު ކޮޅަށް ޖެހުމަށް ކުރަމުންދާ މަސައްކަތަކީ "ދިވެހިންގެ ރާއްޖެ" މެނިފެސްޓޯގައި ހިމެނޭ އެންމެ މުހިންމު ވަޢުދުކަން އެމަނިކުފާނު ފާހަގަކުރެއްވިއެވެ.
Ads by MACL
