ޑައިވަރުން ގެއްލުނު ހާދިސާއާއި ގުޅިގެން އެކަމުގައި ޝާމިލުވި ސަފާރީގެ ލައިސަންސް ސަސްޕެންޑް ކޮށްފި
ވ. އަތޮޅު ކައިރިއަށް ޑައިވިންގއަށް ގޮސް އުޅުނު ބަޔަކު ގެއްލުނު ހިތާމަވެރި ހާދިސާއާ ގުޅިގެން، އެކަމުގައި ހިމެނޭ "އެމް.ވީ ޑިއުކް އޮފް ޔޯކް" ސަފާރީގެ އޮޕަރޭޓިންގ ލައިސަންސް ފަތުރުވެރިކަމާ ބެހޭ ވުޒާރާއިން ވަކި މުއްދަތެއް ނެތް ގޮތަށް ހިފަހައްޓައިފިއެވެ.
މިދިޔަ ބުރާސްފަތި ދުވަހު ހިނގި މި ހާދިސާގެ ސީރިއަސްކަމަށް ބަލައި، މިނިސްޓްރީން މި ފިޔަވަޅު އެޅީ އެކަން ހިނގާދިޔަ ގޮތް އިތުރަށް ތަޙުޤީޤު ކުރުމުގެ ބޭނުމުގައެވެ.
މި ހާދިސާ ކުރިމަތިވީ އެ އުޅަނދުގައި ދަތުރުކުރި އިޓަލީގެ ހަތަރު ފަތުރުވެރިއަކަށާއި އެމީހުން ގޮވައިގެން ދިޔަ ޑައިވިންގ އިންސްޓްރަކްޓަރަށެވެ. މީގެ ތެރެއިން ޑައިވިންގ އިންސްޓްރަކްޓަރު ނިޔާވެފައި ވަނިކޮށް ކަނޑުގެ އަޑިން ފެނިފައިވީ ނަމަވެސް، ގެއްލުނު ހަތަރު ފަތުރުވެރިން ހޯދުމުގެ މަސައްކަތް ކަމާބެހޭ އިދާރާތަކުން އަދިވެސް ދަނީ ހުއްޓުމެއްނެތި ކުރަމުންނެވެ.
މި ދަތި އަދި ހިތާމަވެރި ދަނޑިވަޅުގައި ފަތުރުވެރިކަމާ ބެހޭ ވުޒާރާއިން ވަނީ ގެއްލުނު ފަރާތްތަކުގެ އާއިލާތަކަށް އިޚްލާޞްތެރި ހަމްދަރުދީ ފޮނުވާފައެވެ. އަދި ކަނޑުމަތީގެ މި ބޮޑު އޮޕަރޭޝަނުގައި މެދުކެނޑުމެއްނެތި ހަރަކާތްތެރިވަމުންދާ ސަލާމަތީ ބާރުތަކާއި އެހެނިހެން ފަރާތްތަކުން ކުރަމުންދާ ބުރަ މަސައްކަތް އެ މިނިސްޓްރީން ޝުކުރުވެރިކަމާއެކު ބަލައިގެންފައިވެއެވެ.
ރާއްޖެއަކީ ދުނިޔޭގެ ފެންވަރުގައި ރައްކާތެރި މަންޒިލެއްގެ ގޮތުގައި ދެމެހެއްޓުމަކީ ފަތުރުވެރިކަމުގެ ސިނާޢަތުގައި މަސައްކަތްކުރާ ހުރިހާ ފަރާތްތަކެއްގެ ބޮލުގައި އެޅިފައިވާ ޒިންމާއެއްކަން ހަނދާންކޮށްދެމުން، ކަނޑައެޅިފައިވާ ގަވާއިދުތަކަށް ފުރިހަމައަށް ބޯލެނބުމަށް މިނިސްޓްރީން ވަނީ އިލްތިމާސްކޮށްފައެވެ. އަދި ފަތުރުވެރިންގެ ސަލާމަތާއި ރައްކާތެރިކަމުގެ މިންގަނޑުތައް ހިފެހެއްޓުމަށްޓަކައި އަޅަންޖެހޭ ކޮންމެ ފިޔަވަޅެއްމެ ފަސްޖެހުމެއްނެތި އަޅަމުންދާނެ ކަމުގެ ޔަގީންކަންވެސް އެ ވުޒާރާއިން ވަނީ ދީފައެވެ.
Ads by MACL
