ބުދަ، 18 ނޮވެމްބަރު 2026
ޚަބަރު

އާސަންދަ އާއިއެކު ދިވެހީން: ރާއްޖެއިން ބޭރުން ބޭސްފަރުވާއަށް، ލިމިޓެއްނެތް ތިޖޫރީ!

އެއާޕޯޓުން ބަޔަކު ފުރާމަންޒަރު: ޖީލު އޭއައި އެޑިޓަރ
އެއާޕޯޓުން ބަޔަކު ފުރާމަންޒަރު: ޖީލު އޭއައި އެޑިޓަރ

ދިވެހިރާއްޖޭގެ ގައުމީ ސިއްހީ އިންޝުއަރެންސް ނިޒާމު، "އާސަންދަ" އަކީ ދިވެހި ކޮންމެ ރައްޔިތަކަށްމެ ލިބިފައިވާ ވަރަށް ބޮޑު ނިއުމަތެކެވެ.

ދައުލަތުގެ ބަޖެޓުން ބޮޑު ހޭދައެއް ކުރަމުންދާ މި ނިޒާމުގެ ސަބަބުން، އާންމު ރައްޔިތުންނަށް ބޭސްފަރުވާގެ ބުރަ އުފުލަންޖެހުމުން ސަލާމަތްވެ، އެތައް ބަޔަކަށް އުފާވެރިކަން ގެނެސްދީފައިވެއެވެ.

ނަމަވެސް، މި ނިޒާމުގެ ތެރެއިން ރާއްޖެއިން ބޭރަށް ކުރާ ބޮޑެތި ހޭދަތަކާ މެދު ފުންކޮށް ވިސްނާލުން މުހިންމެވެ. ފެންނަމުންދަނީ ލިމިޓެއްނެތި ބެލުމެއްނެތި ސިއްހީ ފަރުވާއަށް ބޭރުގެ ހޮސްޕިޓަލްތައް މުއްސަނދި ވަމުންދާ ތަނެވެ. މިއީ އަމިއްލަ ތަޖުރިބާއެކެވެ.

ރާއްޖެއިން ބޭރުގެ ހޮސްޕިޓަލްތަކުން ބޭސްފަރުވާ ހޯދުމުގައި އާސަންދައިގެ އެހީތެރިކަން ލިބުމަކީ ބޮޑު ތަސައްލީއެކެވެ. ނަމަވެސް، ބޭރުގެ ބައެއް ހޮސްޕިޓަލްތަކުގައި ހޭދަކުރި ދުވަސްތަކުގައި ފެނިގެންދިޔަ ބައެއް މަންޒަރުތަކަކީ ކަންބޮޑުވާންޖެހޭ ކަންކަމެވެ.

ބައެއް ތަޖުރިބާތަކަށް ބަލާއިރު، ރާއްޖެއިން ބޭރުގެ ބައެއް ހޮސްޕިޓަލްތަކުން އާސަންދަ ލިބޭ މީހަކު ފެނުމާއެކު، އެއީ އާދައިގެ ބަލިމީހެއްގެ ބަދަލުގައި "ބޮޑު ކަސްޓަމަރެއްގެ" ގޮތުގައި ބަލަން ފަށައެވެ.

ބައެއް ފަހަރު ކޮންމެހެން ކުރަން ނުޖެހޭ އެތައް ޓެސްޓުތަކެއް ހެދުމަށް މަޖުބޫރުކުރުވައެވެ. ބަލިމީހާގެ ހާލަތަށްވުރެ ބޮޑަށް، އެމީހާގެ އަތުގައި އޮތް އާސަންދަ ކާޑުން "ދަމައިގަނެވޭނެ" އެންމެ ގިނަ ފައިސާއަކަށް އެ ފަރާތްތަކުން ސަމާލުކަން ދޭކަން ފާހަގަކުރެވެއެވެ.

ފާހަގަކުރެވުނު އެންމެ ބޮޑު އެއް ކަމަކީ، އެއްވެސް ލިމިޓެއް ނެތި ބޭސްފަރުވާގެ ޚިދުމަތްތައް ދެމުންދާއިރު، ބައެއް ބޭރުގެ ހޮސްޕިޓަލްތަކުން އާސަންދަ ނިޒާމުގެ ނާޖާއިޒު ފައިދާ ނަގަމުންދާ ކަމެވެ.

ބޭނުންނުވާ އެތައް ޓެސްޓުތަކެއް ހެދުމާއި، ކޮންމެހެން ބޭނުން ނޫން ނަމަވެސް ހޮސްޕިޓަލުގައި އެޑްމިޓްކޮށްގެން ބޭއްވުން ފަދަ ކަންކަން ހިމެނެއެވެ. މިއީ ދިވެހި ދައުލަތުގެ ފައިސާ ނަހަމަ ގޮތުގައި ހޭދަވެގެންދާ ކަމެކެވެ.

ހޮސްޕިޓަލްތަކުން ގެންގުޅޭ އަނެއް އުކުޅަކީ ބޭސްފަރުވާއަށް ދާ މުއްދަތު ދިގުދަންމާލުމެވެ.

ކުޑަކުޑަ ކަމަކަށް ދާ މީހާވެސް ހަފުތާތަކެއް ވަންދެން ހޮސްޕިޓަލުގައި މަޑުކުރުވައި، އެކި ބަހަނާތަކުގައި އެކި ޑޮކްޓަރުންނަށް ދެއްކުމަށް މަޖުބޫރުކުރެއެވެ. މި ހުރިހާ ކަމެއްގެ ބިލު އުފުލަނީ ދިވެހި ދައުލަތުންނެވެ. މިކަމުގެ ސަބަބުން، ހަގީގަތުގައި އެހީއަށް ބޭނުންވެފައި ތިބޭ އެތައް ބަޔަކަށް ލިބެންޖެހޭ ފުރުސަތުތައް ހަނިވެ، ދައުލަތުގެ ބަޖެޓަށް ނުކަތާވަރުގެ ބުރައަކަށް މިކަން ވަނީ ވެފައެވެ.

އާސަންދައަކީ އަހަރެމެންގެ ހައްގަކަށް ވާއިރު، އެ ހައްގުގެ ބޭނުން ހެޔޮގޮތުގައި ހިފުމަކީވެސް އަހަރެމެންގެ ޒިންމާއެކެވެ. ބޭރުގެ ހޮސްޕިޓަލްތަކުން ދިވެހި ދައުލަތުގެ ފައިސާ ނަހަމަ ގޮތުގައި އަތުލުމަށް ޖަހާ މަގުތައް ބަންދުކުރަން ޖެހެއެވެ. ނޫންނަމަ، މިއަދު އަހަރެމެން މި ބޭނުންކުރާ "ތިޖޫރީ" ހުސްވެ، މުސްތަގުބަލުގައި ބޭސްފަރުވާއަށް ސަލާންޖަހަން ޖެހުނު މާޒީ އަނބުރާ އިއާދަވުމަކީ ދުރުގައި އޮތް ކަމެއް ނޫނެވެ.

އާސަންދައަކީ ދިވެހި ރައްޔިތުންގެ ފުރާނައާ ގުޅިފައިވާ، ދިވެހިންނަށް ލިބުނު ބޮޑު އުފަލެކެވެ. ނަމަވެސް މި ނިޒާމު ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، ބޭރުގެ ހޮސްޕިޓަލްތަކުން ނަގާ ނާޖާއިޒު ފައިދާތައް ހުއްޓުވަންޖެހެއެވެ.

ބޭކާރު ހަރަދުތައް ކުޑަކޮށް، ނިޒާމު އިތުރަށް ހަރުދަނާކުރުމަކީ ދައުލަތުގެ މާލީ ހާލަތު ރަނގަޅުކުރުމަށާއި، ރައްޔިތުންނަށް ދެވޭ ޚިދުމަތުގެ ފެންވަރު މަތިކުރުމަށް ކޮންމެހެން ކުރަންޖެހިފައިވާ ކަމެކެވެ. އަމިއްލަ ތަޖުރިބާއިން ބަލާއިރު، މި ނިޒާމު އިސްލާހުކުރުމަކީ މިއަދު ގައުމީ ފެންވަރެއްގައި ކުރަންޖެހިފައިވާ މުހިންމު މަސައްކަތެކެވެ.