ހޮރްމޫޒް ކަނޑުއޮޅީގެ ސަލާމަތާ ބެހޭ ގަރާރުގައި ރާއްޖެއިން ބައިވެރިވެއްޖެ
ހޮރްމޫޒް ކަނޑުއޮޅީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އަރަބި ބައެއް ގައުމުތަކުން އދ. ގެ ސަލާމަތީ މަޖިލީހަށް ހުށަހަޅާފައިވާ ގަރާރު ދިވެހިރާއްޖެއިން ކޯ-ސްޕޮންސާ ކޮށްފިއެވެ.
ބަހުރައިން، ކުވައިތު، ޤަތަރު، ސައޫދީ އަރަބިއްޔާ، ޔުނައިޓެޑް އަރަބް އެމިރޭޓްސް (ޔޫއޭއީ) އަދި ޖޯޑަން ގުޅިގެން ހުށަހެޅި މި ގަރާރަކީ ކަނޑުދަތުރުފަތުރުގެ މިނިވަންކަމާއި ބައިނަލްއަގުވާމީ ވިޔަފާރީގެ ނިޒާމު ހިމާޔަތްކުރުމަށް ބާރުއަޅާ ގަރާރެކެވެ.
މި ގަރާރުގައި ރާއްޖެއިން ބައިވެރިވި ނަމަވެސް، އދ. ގެ ކަނޑުގެ ގާނޫނާ ބެހޭ މުއާހަދާގެ ދަށުން ދިވެހިރާއްޖެ ފަދަ ޖަޒީރާ ގައުމުތަކަށް ލިބިދޭ ޚާއްސަ ހައްގުތަކާއި އިހްތިސާސްތަކަށް އެއްވެސް އުނިކަމެއް ނާންނާނެ ކަމުގެ ޔަގީންކަން ފޮރިން މިނިސްޓްރީން ވަނީ ދީފައެވެ.
ފޮރިން މިނިސްޓްރީން ހާމަކުރި ގޮތުގައި ރާއްޖެއިން މި ނިންމުން ނިންމާފައިވަނީ، މި ގަރާރުގެ ސަބަބުން ރާއްޖޭގެ ގައުމީ މަސްލަހަތަށް ނުވަތަ ކަނޑުގެ ސަރަހައްދީ އިހްތިސާސަށް އަސަރުކޮށްފާނެ ފަދަ އެއްވެސް މާނަކުރުމަކުން އިސްތިސްނާވާ ގޮތުގެ މަތިންނެވެ.
ގަލްފު ސަރަހައްދުގެ މަސްރަހު އިތުރަށް ގޯސްވިޔަނުދީ ހިފެހެއްޓުމަށާއި، ބައިނަލްއަގުވާމީ މުދާ އުފުލާ ނިޒާމުތަކަށް ކުރިމަތިވަމުންދާ ހުރަސްތައް ނައްތާލުމަށް އިސްކަންދިނުމަށް ދިވެހި ސަރުކާރުން އަބަދުވެސް ވަކާލާތު ކުރެއެވެ.
Ads by MACL
