ޒަކާތު ފަންޑުން ދޭ 40 ސްކޮލަޝިޕްގެ ފުރުސަތު ހުޅުވާލައިފި
ރާއްޖޭގެ ޒަކާތު ފަންޑުން ދޭ ސްކޮލަޝިޕްގެ ޖުމްލަ 40 ފުރުސަތަކަށް ކުރިމަތިލުމުގެ ފުރުސަތު މޯލްޑިވްސް ޒަކާތު ހައުސް އިން މިއަދު ހުޅުވާލައިފިއެވެ. މި ފުރުސަތުތަކަކީ ރާއްޖެއާއި ރާއްޖޭން ބޭރުން މަތީ ތައުލީމު ހާސިލުކުރަން ބޭނުންވާ ދިވެހި ދަރިވަރުންނަށް ހާއްސަކޮށްގެން ހުޅުވާލާފައިވާ ފުރުސަތުތަކެކެވެ.
ސްކޮލަޝިޕްގެ ދާއިރާތަކާއި ޔުނިވާސިޓީތައް
މި ސްކޮލަޝިޕް ޕްރޮގުރާމްގެ ދަށުން އިސްލާމީ އެކި ދާއިރާތަކުން މާސްޓާސް (ލެވެލް 9) އަދި ޕީއެޗްޑީ (ލެވެލް 10) އަށް ކިޔެވުމުގެ ފުރުސަތު ލިބޭނެއެވެ. އޭގެ ތެރޭގައި އިސްލާމީ ޝަރީއާ، ގުރުއާނާ ބެހޭ އިލްމު، އިސްލާމީ ތައުލީމު، އިސްލާމީ ނޫސްވެރިކަން، އަދި އިސްލާމީ ލީޑާޝިޕް އެންޑް މެނޭޖްމަންޓް ފަދަ ދާއިރާތައް ހިމެނެއެވެ.
ރާއްޖޭގައި ކިޔަވާ ދަރިވަރުންނަށް އިސްލާމިކް ޔުނިވާސިޓީ، ގައުމީ ޔުނިވާސިޓީ، ވިލާ ކޮލެޖް، އެވިޑް ކޮލެޖް އަދި ޒިކުރާ ކޮލެޖުން ކިޔެވުމުގެ ފުރުސަތު އޮންނާނެއެވެ. ރާއްޖޭން ބޭރުގެ ފުރުސަތުތައް ހުޅުވާލާފައިވަނީ މިސްރުގެ އަލް އަޒުހަރު ޔުނިވާސިޓީ، މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީ، އަދި ބުރުނާއީ އާއި ޕާކިސްތާނުގެ މަޝްހޫރު ޔުނިވާސިޓީތަކުންނެވެ.
ފުރުސަތުތައް ބެހިފައިވާ ގޮތް
މި ފުރުސަތުގެ ދަށުން ޖުމްލަ 30 ސްކޮލަޝިޕް ދޫކުރުމަށް ހަމަޖެހިފައިވާއިރު، އޭގެ ތެރެއިން 10 ފުރުސަތު ރާއްޖޭގައި ކިޔެވުމަށް އަދި 20 ފުރުސަތު ރާއްޖެއިން ބޭރުގައި ކިޔެވުމަށް ވަނީ ކަނޑައަޅާފައެވެ. މީގެ އިތުރުން، ސައުދީ އަރަބިއްޔާ އާއި މިސްރުގައި ކިޔަވާ ދަރިވަރުންނަށް ސްޓައިޕެންޑް ލިބޭ 5 ފުރުސަތާއި، އަންހެން ޑޮކްޓަރުން ތަމްރީނުކުރުމަށް ދޭ 5 ހާއްސަ ސްކޮލަޝިޕް ހިމެނެއެވެ.
ޝަރުތުތަކާއި އެޕްލިކޭޝަން ހުށަހެޅުން
ސްކޮލަޝިޕަށް ކުރިމަތިލާ ފަރާތްތަކަކީ އުމުރުން 18 އަހަރު ފުރިފައިވާ، މާލީ އެހީތެރިކަމަށް ބޭނުންވެފައިވާ ދިވެހިންނަށް ވާންޖެހެއެވެ. އަދި އެހެން މުއައްސަސާއަކުން މާލީ އެހީތެރިކަން ލިބެމުންދާ ފަރާތަކަށް ވެގެން ނުވާނެއެވެ. އެޕްލިކޭޝަން ހުށަހަޅާއިރު އެކަޑަމިކް ޓްރާންސްކްރިޕްޓްތަކާއި ބޭނުންވާ ހުރިހާ ލިޔެކިޔުންތަކެއް ހުށަހަޅަންޖެހެއެވެ.
އެޕްލިކޭޝަން ހުށަހެޅުމުގެ ސުންގަޑިއަކީ އަންނަ ޖުލައި މަހުގެ 16 ވަނަ ދުވަހުގެ މެންދުރު ފަހު 2:00 އެވެ. އެޕްލިކޭޝަންތައް ފޮނުވަން ޖެހެނީ [email protected] އީ-މެއިލް މެދުވެރިކޮށެވެ. ދަރިވަރުން ހޮވުމުގެ މަސައްކަތް ކުރާނީ ޒަކާތު ފަންޑުން އެކުލަވާލާފައިވާ ހާއްސަ ކޮމިޓީއަކުންނެވެ.
Ads by BML
Ads by MACL
