ނާޒިމް ވަކިކުރުމުގެ ބަހުސް އެއް ގަޑިއިރަށް ސުންގަޑި ކަނޑައަޅައި، ޖަވާބުދާރީވާން 10 މިނެޓް ދޭން ފާސްކޮށްފި
ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް އެ މަގާމުން ވަކިކުރުމަށް ހުށަހަޅާފައިވާ މައްސަލައިގެ ޖަލްސާ ކުރިއަށް ގެންދާނީ ޖުމްލަ އެއް ގަޑިއިރުގެ ވަގުތަކަށް ކަމަށް މަޖިލީހުގެ އާންމު ކޮމިޓީން މިއަދު ނިންމައިފި އެވެ.
މިގޮތަށް ފާސްކުރީ ކޮމިޓީގެ ބައްދަލުވުމުގައި ބައިވެރިވެވަޑައިގަތް ފަސް މެންބަރުންގެ އިއްތިފާގުންނެވެ.
ހޮޅުދޫ ދާއިރާގެ މެންބަރު އަބްދުއްސައްތާރު ހުށަހަޅުއްވައި، ދުވާފަރު ދާއިރާގެ މެންބަރު މުހައްމަދު އަލީ ތާއީދު ކުރެއްވި މި ހުށަހެޅުމުގައިވާ ގޮތުން:
-
ޖަވާބުދާރީވުމުގެ ވަގުތު: މަގާމުން ވަކިކުރާ މައްސަލާގައި މަޖިލީހަށް ޖަވާބުދާރީވުމަށް ނާޒިމަށް ލިބިވަޑައިގަންނަވާނީ 10 މިނެޓެވެ.
-
ބަހުސްގެ ވަގުތު: މެންބަރުން ބަހުސް ކުރެއްވުމަށް 50 މިނެޓް ހަމަޖައްސާފައިވާއިރު، ކޮންމެ މެންބަރަކަށް ވާހަކަދެއްކެވުމަށް ލިބިވަޑައިގަންނަވާނީ ތިން މިނެޓެވެ.
ނާޒިމް ވަކިކުރަން ހުށަހެޅި ސަބަބުތައް
ސަރުކާރު ހިންގާ ޕީއެންސީގެ ޕާލަމެންޓްރީ ގްރޫޕުން ބޭއްވި ބައްދަލުވުމަކަށް ފަހު، ނާޒިމް ވަކިކުރުމުގެ ގަރާރު މަޖިލީހަށް ހުށަހެޅީ އެ ޕާޓީގެ 73 މެންބަރުންގެ ސޮޔާ އެކުގަ އެވެ. އެ ގަރާރުގައި ނާޒިމާ މެދު ބޮޑެތި ތުހުމަތުތަކެއް ކޮށްފައިވެ އެވެ. އޭގެ ތެރޭގައި:
-
މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ނެގުން.
-
މަޖިލީހުގެ މަސްލަހަތު ނަގާލަން ހިތްވަރުދީ، ޒިންމާތަކުން ބަރީއަވުން.
-
މަސްއޫލިއްޔަތު އަދާކުރުމުގައި ވަކިފަރާތަކަށް ޖެހި، މެންބަރުންގެ ހައްގުތަކާއި އިމްތިޔާޒުތައް ހިމާޔަތްކުރުމުގައި އިހުމާލުވުން.
"ނާޒިމްގެ އަމަލުތައް ހުރި ގޮތުން، މެންބަރުންނާ މަތިކޮށްފައިވާ ވާޖިބުތައް އަދާކުރުމުގައި ނައިބު ރައީސް ހުރަހަކަށް ވެފައިވޭ." ގަރާރުގައި ބުނެފައިވެ އެވެ.
މަޖިލީހުގެ ގަވާއިދާއި މެންބަރުންގެ އަދަދު
މަޖިލީހުގެ ގަވާއިދު ބުނާގޮތުން ނައިބު ރައީސް ވަކިކުރަން ހުށަހެޅޭނީ މަދުވެގެން 24 މެންބަރުންގެ (މަޖިލީހުގެ ހަތަރުބައިކުޅަ އެއްބައި) ސޮޔާއެކުގަ އެވެ. ނަމަވެސް މަގާމުން ވަކިކުރެވޭނީ ޖަލްސާއަށް ހާޒިރުވެ ވޯޓުގައި ބައިވެރިވާ މެންބަރުންގެ އަޣުލަބިއްޔަތުންނެވެ.
މިހާރު ހިނގަމުންދާ 93 މެންބަރުންގެ މަޖިލީހުގައި ޕީއެންސީގެ 76 މެންބަރުން ތިއްބަވަ އެވެ. މީގެ ކުރިން 17 ވަނަ މަޖިލީހުގެ ނައިބު ރައީސްކަން ވެސް ކުރެއްވި އަހުމަދު ނާޒިމް މި ފަހަރު އެ މަގާމަށް ހޮވިވަޑައިގަތީ 80 މެންބަރުންގެ ބޮޑު އަޣުލަބިއްޔަތަކުންނެވެ. އޭނާއާ ވާދަކުރެއްވި އެމްޑީޕީގެ މަރަދޫ ދާއިރާގެ މެންބަރު އަހުމަދު ދީދީއަށް ލިބިވަޑައިގަތީ 12 ވޯޓެވެ.
Ads by MACL
