ތޮއްޑޫއަށް ދަތުރުކުރި ލޯންޗެއް އަޑިއަށްދަނިކޮށް 25 މީހުން ސަލާމަތްކޮށްފި
މާލެއިން ފުރައިގެން އއ. ތޮއްޑޫއަށް ދަތުރުކުރި "ރިލެކްސް އައިޝާ" ނަމަކަށް ކިޔާ ލޯންޗެއް ދިޔަވެ، އަޑިއަށްދަނިކޮށް އޭގެއިން ދަތުރުކުރި 25 މީހުން ފުލުހުންގެ އެހީތެރިކަމާއެކު ސަލާމަތްކޮށްފިއެވެ.
ކަނޑުމަތީގެ މި ނުރައްކާތެރި ހާދިސާ ހިނގާފައިވަނީ މިއަދު ހަވީރު 17:30 ހާއިރު ކަމަށް ދިވެހި ފުލުހުންގެ ޚިދުމަތުން މަޢުލޫމާތު ދެއެވެ.
މެރިން ޕޮލިސްއިން ބުނި ގޮތުގައި ލޯންޗު ދިޔަވަމުންދާ ކަމުގެ ރިޕޯޓު ލިބުމާއެކު، ފުލުހުންގެ އުޅަނދެއް ވަނީ ވަގުތުން އެ ސަރަހައްދަށް ގޮސް އެހީތެރިކަން ފޯރުކޮށްދީފައެވެ. އަދި ލޯންޗުގައި ތިބި ހުރިހާ އެންމެން ރައްކާތެރިކަމާއެކު ފުލުހުންގެ އުޅަނދަށް ނަގައި، މިހާރު ވަނީ މާލެ ގެނެސްފައެވެ.
މިދުވަސްވަރަކީ މުޅި ރާއްޖެއަށްވެސް މޫސުން ގޯސް، ކަނޑުގަދަ ދުވަސްވަރަކަށް ވުމުން، ކަނޑުދަތުރުފަތުރު ކުރާ ފަރާތްތަކުން މޫސުމަށް ޚާއްޞަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ. އެގޮތުން ދަތުރަށް ފުރުމުގެ ކުރިން މޫސުމުގެ އެންމެ ފަހުގެ މަޢުލޫމާތު ހޯދުމަށާއި، އުޅަނދުތަކުގެ ސަލާމަތީ ކަންކަން ފުރިހަމައަށް ހުރިތޯ ޗެކްކުރުމަށް ފުލުހުންނާއި ކަމާބެހޭ ފަރާތްތަކުން އިރުޝާދު ދެއެވެ.
Ads by MACL
