ބުދަ، 18 ނޮވެމްބަރު 2026
ޚަބަރު

ދިވެހި ހުރިހާ ހާޖީން އަރަފާތު ބިމަށް: ހޮސްޕިޓަލްގައި އޮތް ހާޖީއަށްވެސް ދަނީ އެހީތެރިކަން ދެމުން

ދިވެހި ހުރިހާ ހާޖީން އަރަފާތު ބިމަށް: ހޮސްޕިޓަލްގައި އޮތް ހާޖީއަށްވެސް ދަނީ އެހީތެރިކަން ދެމުން

މިއަހަރުގެ ބަރަކާތްތެރި ހައްޖުގެ އަޅުކަން ފުރިހަމަކުރުމަށް ސައުދީ އަރަބިއްޔާއަށް ދިޔަ ދިވެހި ހުރިހާ ހައްޖުވެރިންވެސް، ހައްޖުގެ އެންމެ މުހިއްމު ރުކުން ކަމަށްވާ "އަރަފާތް ދުވަސް" ފާހަގަކުރުމަށް އަރަފާތު ބިމަށް ޖަމާވެއްޖެއެވެ. މީގެ ތެރޭގައި ބަލިވެގެން މިނާގެ ހޮސްޕިޓަލެއްގައި އެޑްމިޓްކޮށްފައި އޮތް ހާޖީވެސް ހިމެނެއެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ފަތިހު މައުލޫމާތު ދެއްވަމުން ވިދާޅުވީ، ހޮސްޕިޓަލުގައި ފަރުވާ ދެމުންދިޔަ އެ ހާޖީއަށް ހައްޖު ކޯޕަރޭޝަނުގެ ޓީމުން ހާއްސަ އެހީތެރިކަމެއް ފޯރުކޮށްދެމުންދާ ކަމަށެވެ. އަދި ހުރިހާ ދިވެހި ހައްޖުވެރިންގެ ހާލުވެސް އާންމުގޮތެއްގައި ރަނގަޅު ކަމަށް މިނިސްޓަރު ފާހަގަކުރެއްވިއެވެ.

މިއަހަރު ރާއްޖޭން ޖުމްލަ 1،019 މީހުން ހައްޖުގެ އަޅުކަމުގައި ބައިވެރިވެއެވެ. މި ހުރިހާ ހައްޖުވެރިން އަރަފާތަށް ދިއުމުގެ ދަތުރު ފަށާފައިވަނީ ސައުދީ ގަޑިން ރޭ އިރާކޮޅު 9:00 ޖެހިއިރުއެވެ. ދުނިޔޭގެ އެކި ކަންކޮޅުތަކުން އައިސްފައިވާ ގާތްގަނޑަކަށް ދެ މިލިއަން މުސްލިމުންނާއެކު ދިވެހި ހާޖީން މިއަދު އަރަފާތުގައި ވަގުތު ހޭދަކުރުމަށްފަހު، މިރޭގެ ވަގުތެއްގައި މުޒްދަލިފާއަށް ދަތުރުކުރާނެއެވެ.

ހައްޖު ކޯޕަރޭޝަނުން ބުނި ގޮތުގައި ދިވެހި ހާޖީން ސައުދީގައި ޖުމްލަ 22 ދުވަސް ހޭދަކުރާނެއެވެ. އަދި ހައްޖުގެ ހުރިހާ އަޅުކަމެއް ނިންމުމަށްފަހު ދިވެހިން އެނބުރި ރާއްޖެ އަންނަން ފަށާނީ އަންނަ ޖުލައި މަހުގެ 5 ވަނަ ދުވަހުން ފެށިގެންނެވެ.