ކަރަންޓު ކެނޑި ކަމަދޫގެ ޢީދު ފޯރިއަށް ބުރޫއަރައިފި
ބ. ކަމަދޫގައި ފޯރިއާއެކު ސަގާފީ ޢީދު ކުޅިވަރުތައް ކުރިއަށްދަނިކޮށް، މިއަދު ހަވީރުން ފެށިގެން މުޅި ރަށުން ކަރަންޓުގެ ޚިދުމަތް މެދުކެނޑި، ރައްޔިތުންނާއި ޢީދަށް ގޮސްތިބި މެހެމާނުންނަށް ބޮޑެތި ދަތިތަކަކާ ކުރިމަތިލާން ޖެހިއްޖެއެވެ.
މިއަދު ހަވީރު 16:30 ހާއިރުން ފެށިގެން އެ ރަށުން ކަރަންޓު ކެނޑިފައިވަނީ ކަރަންޓު ދިނުމަށް ބޭނުންކުރާ މައި ކޭބަލަކަށް ދިމާވި މައްސަލައަކާ ގުޅިގެން ކަމަށް ކަމަދޫ ކައުންސިލްގެ ރައީސް ހަސަން ޒަރީރު ވަނީ ވިދާޅުވެފައެވެ.
ކަރަންޓު ކެނޑުނުތާ ތިން ގަޑިއިރަށްވުރެ ގިނައިރު ވެފައިވާއިރު، މި މައްސަލަ އަވަހަށް ހައްލުކުރުމަށްޓަކައި ފެނަކަ ކޯޕަރޭޝަނާއި ރަށު ކައުންސިލް ގުޅިގެން މިހާރު ދަނީ ޚާއްޞަ މަސައްކަތްތަކެއް ކުރަމުންނެވެ. އެގޮތުން ހަލާކުވި ކޭބަލް ބަދަލުކުރުމަށްޓަކައި ކައިރީގައި އޮތް ރިސޯޓަކުން އައު ކޭބަލެއް ހޯދުމުގެ މަސައްކަތް ކުރަމުންދާ ކަމަށް އެ ރަށުން މަޢުލޫމާތު ދީފައިވެއެވެ.
ގާތްގަނޑަކަށް 500 އެއްހާ މީހުންގެ އާބާދީއެއް އޮންނަ ކަމަދޫއަކީ ކޮންމެ އަހަރަކުވެސް ވަރަށް ކުލަގަދަކޮށް ޢީދު ފާހަގަކުރާ ރަށަކަށްވާއިރު، މި އަހަރުގެ ޢީދަށްވެސް ފަސް ދުވަހުގެ މުއްދަތަށް ސަގާފީ ހަރަކާތްތަކާއި މިއުޒިކް ޝޯތައް ބޭއްވުމަށް އޮތީ ރާވައިފައެވެ. ނަމަވެސް ދިމާވި މި ކަރަންޓުގެ މައްސަލައާ ގުޅިގެން މިރޭ ބޭއްވުމަށް ތައްޔާރުވި ހަރަކާތްތަކަށް ވަނީ ހުރަސްތަކެއް ކުރިމަތިވެފައެވެ.
Ads by MACL
