ބަލިމީހާގެ ހާލަތަށް ބަލައި ރާއްޖެއިން ލިބޭ ފަރުވާތަކަށްވެސް އާސަންދައިގެ ދަށުން ބޭރަށް ފޮނުވަން ނިންމައިފި
ރާއްޖެއިން ލިބެން ހުންނަ ސިއްހީ ފަރުވާތައް ހޯދުމުގައި ބަލިމީހުންނަށް ކުރިމަތިވާ ގޮތްނޭނގޭ އުނދަގޫތަކަށާއި އެމީހުންގެ ހާލަތަށް ރިއާޔަތްކޮށް، އާސަންދަ އެހީގެ ދަށުން ރާއްޖެއިން ބޭރަށް ފޮނުވޭ ގޮތަށް އާސަންދަ ސްކީމް ހިންގުމުގެ ގަވާއިދަށް ބޮޑެތި ލުއިތަކެއްދީ، އެ ބަދަލުތައް އިއްޔެ އާންމުކޮށްފިއެވެ.
މީގެކުރިން އަމަލުކުރަމުން އައި އުސޫލުތައް އޮންނަ ގޮތުން އާސަންދައިގެ އެހީގައި ބޭރަށް ފޮނުވަނީ ހަމައެކަނި ރާއްޖެއިން އެއްގޮތަކަށްވެސް ލިބެން ނެތް ފަރުވާތައް ހޯދުމަށް އެކަނި ކަމަށް ވިޔަސް، ސަރުކާރުގެ މި ނިންމުމާއެކު އާންމުންނަށް ބޭސްފަރުވާގެ ކަންކަމުގައި ބޮޑެތި ފަސޭހަތަކެއް ލިބިގެންދާނެއެވެ.
އާސަންދަ ގަވާއިދަށް އަލަށް ގެނައި މި އިސްލާހުގެ ދަށުން، ރާއްޖެއިން ލިބޭ ފަރުވާއެއް ނަމަވެސް ބޭރަށް ފޮނުވުމުގައި ބަލީގެ ބާވަތާއި، ބަލިމީހާގެ މިހާރުގެ ހާލަތާއި، ރާއްޖޭގައި އެ ފަރުވާ ހޯދުމުގައި ހުރި ހުރަސްތަކުގެ އިތުރުން ބަލިމީހާގެ ވަށައިގެންވާ އިޖުތިމާއީ އަދި ސިއްހީ އެހެނިހެން ކަންކަމަށްވެސް ފުންކޮށް ރިއާޔަތްކުރާނެއެވެ.
މީގެ އިތުރުން، އަތޮޅުތެރޭގެ ރަށްރަށުން މާލެ އައިސް، މާލެއިން ބޭރަށް ފަރުވާއަށް ގޮސް އެނބުރި އަންނަ މީހުންނަށް ދެވޭނެ އިތުރު ފަރުވާއެއް ނެތް ކަމަށް ހާއްސަ ޑޮކްޓަރުން ލަފާދީފި ނަމަ، އެމީހަކު އެނބުރި އަމިއްލަ ރަށަށް ދިއުމާ ހަމައަށް ހިނގާނެ ހުރިހާ ޚަރަދެއްވެސް ދެން ބަލަހައްޓާނީ އާސަންދައިގެ ދަށުންނެވެ.
ހަމައެއާއެކު، މީގެ ކުރިން އެންސްޕާގެ ވަކި ބަޖެޓެއްގެ ދަށުން ހަމަޖައްސަމުން އައި ނުކުޅެދުންތެރިކަން ހުންނަ މީހުންނަށް ބޭނުންވާ ޚާއްސަ އާލާތްތައް ކަމަށްވާ ހިއަރިން އެއިޑާއި ވީލްޗެއާ ފަދަ ތަކެތި، އާސަންދައިން ޚަރަދު ނުލިބޭ ތަކެތީގެ ލިސްޓުން އުނިކޮށް، މިހާރު ވަނީ ސީދާ އާސަންދަ ސްކީމުގެ ތެރެއަށް ހިމަނާފައެވެ.
މި ބަދަލުތަކުގެ ސަބަބުން، މީގެކުރިން ބޭސްފަރުވާގެ މާލީ އެހީ ހޯދުމަށް އެންސްޕާ މެދުވެރިކޮށް އާންމުން ކުރަންޖެހޭ ދިގު އިންތިޒާރާއި، ޚިދުމަތް ލަސްވުމުގެ ސަބަބުން ކުރިމަތިވި ޝަކުވާތަކަށް އަވަސް ހައްލެއް ލިބި، ބަލިމީހުންނަށް މާ ފަސޭހައިން ފަރުވާގެ ކަންކަން ކުރިއަށް ގެންދެވޭނެ މަގު ތަނަވަސްވެގެންދާނެއެވެ.
Ads by MACL
