ހައްޖާޖީން އެނބުރި އަންނާތީ އެއާޕޯޓަށް ދިއުމުގައި ބަސް ބޭނުންކުރަން އެމްއޭސީއެލްއިން އިލްތިމާސްކޮށްފި
މިއަހަރުގެ ހައްޖުގެ މާތް އަޅުކަން ފުރިހަމަކުރުމަށްފަހު ދިވެހި ހައްޖުވެރިން އެނބުރި ރާއްޖެ އަންނަން ފަށާތީ، ވެލާނާ އިންޓަނޭޝަނަލް އެއާޕޯޓުގެ ޓްރެފިކް ބާރުބޮޑުވާނެތީ އެއާޕޯޓަށް ދަތުރުކުރުމުގައި އާންމު ބަހުގެ ޚިދުމަތް ބޭނުންކުރުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު އިލްތިމާސްކޮށްފިއެވެ.
އެމްއޭސީއެލްއިން ހާމަކޮށްފައިވާ ގޮތުގައި، ހައްޖާޖީން ގޮވައިގެން ރާއްޖެ އަންނަ ފުރަތަމަ ފްލައިޓް އަންނަ ހުކުރު ދުވަހު ޖެއްސުމަށް ވަނީ ހަމަޖެހިފައެވެ. މީގެ އިތުރުން ކުރިއަށް އޮތް އާދިއްތަ، ހޯމަ އަދި އަންގާރަ ދުވަހު ވެސް ހައްޖުވެރިން ގޮވައިގެން އިތުރު ފްލައިޓްތައް ރާއްޖެ އައުމަށް ވަނީ ތާވަލުކުރެވިފައެވެ.
ގިނަ އަދަދެއްގެ ހައްޖުވެރިންނާއި، އެ ފަރާތްތަކަށް މަރުހަބާ ކިއުމަށް ޒިޔާރަތްކުރާ އާއިލާތަކުގެ ސަބަބުން މި ދުވަސްވަރު އެއާޕޯޓުގެ ސަރަހައްދު އާދަޔާ ހިލާފަށް ކުދިބޮޑުވެ، ޓްރެފިކް ވަރަށް ބޮޑަށް ތޮއްޖެހޭނެ ކަމަށް އެ ކުންފުނިން ލަފާކުރެއެވެ.
އެއާޕޯޓުގެ ޓްރެފިކް އިތުރުވުމުގެ ސަބަބުން އަމިއްލަ ވެހިކަލްތަކުގައިދާ ފަރާތްތަކަށް ޕާކިންގް ހޯދުމުގައި ބޮޑެތި ދަތިތަކަކާ ކުރިމަތިވެދާނެ ކަމަށް އެމްއޭސީއެލްއިން ފާހަގަކުރެއެވެ. އެހެންކަމުން، އެއާޕޯޓަށް ދާ ފަރާތްތަކުންނާއި ދަތުރުވެރިން މިކަމަށް ޚާއްސަ ސަމާލުކަމެއް ދެއްވުމަށާއި، ވެހިކަލްތައް ތޮއްޖެހުން ކުޑަކުރުމުގެ ގޮތުން ވީހާވެސް ބޮޑަށް ބަހުގެ ޚިދުމަތް ބޭނުންކުރުމަށް އެ ކުންފުނިން ވަނީ ބާރުއަޅާފައެވެ.
Ads by MACL
