ބުދަ، 18 ނޮވެމްބަރު 2026
ޚަބަރު

ތިން ވޯލްޑް ކަޕް ދިމާކުރި ކްލެމެންޓް: ވޯލްޑް ކަޕްގެ ކުއާޓާ ފައިނަލުން އާޖެންޓީނާ ކަޓާނީ ޕޯޗުގަލްއަތުން ބަލިވެގެން

ތިން ވޯލްޑް ކަޕް ދިމާކުރި ކްލެމެންޓް: ވޯލްޑް ކަޕްގެ ކުއާޓާ ފައިނަލުން އާޖެންޓީނާ ކަޓާނީ ޕޯޗުގަލްއަތުން ބަލިވެގެން

ދުނިޔޭގެ އެންމެ ފަހުން ބޭއްވުނު ތިން ވޯލްޑް ކަޕްގެ ޗެމްޕިއަނުން ކަމަށްވާ ޖަރުމަނު، ފްރާންސް އަދި އާޖެންޓީނާ، މުބާރާތުގެ ކުރިން ދިމާކޮށް މުޅި ދުނިޔެ ސިއްސުވާލި ޖަރުމަނުގެ އިގްތިސާދީ މާހިރު އަދި ސްޓްރެޓެޖިސްޓް ޔޯސިމް ކްލެމެންޓް، 2026 ވަނަ އަހަރުގެ ވޯލްޑް ކަޕާ ބެހޭ އާ ތަފްސީލުތަކެއް ހާމަކޮށްފިއެވެ.

އޭނާގެ ހާއްސަ ހިސާބު ފޯމިއުލާއިން ބަލައި އަންދާޒާކުރާ ގޮތުގައި، އެންމެ ފަހުގެ ޗެމްޕިއަން ލިއޮނެލް މެސީގެ އާޖެންޓީނާ މިފަހަރު މުބާރާތުން ވަކިވާން ޖެހޭނީ ކުއާޓާ ފައިނަލުގައި ކްރިސްޓިއާނޯ ރޮނާލްޑޯގެ ޕޯޗުގަލް އަތުން ބަލިވެގެންނެވެ.

ޖަރުމަނުގެ ހިސާބު އިލްމުވެރިއެއް ކަމަށްވާ ކްލެމެންޓް ވަނީ އިގްތިސާދީ މޮޑެލްތަކާއި ހިސާބުތަކުގެ މައްޗަށް ބިނާކޮށް ޑިޖިޓަލް މޮޑެލްއެއް ތައްޔާރުކޮށްފައެވެ. މި މޮޑެލްއިން ދައްކާ ގޮތުގައި ކުރިއަށް އޮތް ވޯލްޑް ކަޕްގައި ބޮޑެތި ސިއްސުންތަކެއް ފެނިގެންދާނެއެވެ. އޭގެ ތެރޭގައި ދުނިޔޭގެ ފުޓްބޯޅައިގެ ގަދަބާރެއް ކަމަށްވާ ބްރެޒިލް، ގަދަ 16 ގެ ބުރުގައި ޖަޕާން އަތުން ބަލިވެ މުބާރާތުން ވަކިވާނެ ކަމަށް އޭނާގެ ހިސާބުތަކުން ދައްކައެވެ.

މި މޮޑެލްގެ ނަތީޖާތަކަށް ބަލާއިރު، މުބާރާތުގެ ސެމީ ފައިނަލުން ޖާގަ ހޯދާނީ މުޅިންވެސް ޔޫރަޕްގެ ގައުމުތަކެވެ. އެއީ ޕޯޗުގަލް، އިންގްލެންޑް، ނެދަލެންޑްސް އަދި ސްޕެއިން އެވެ. މިއީ ދެކުނު އެމެރިކާގެ ބާރުތައް ކަމަށްވާ އާޖެންޓީނާ އާއި ބްރެޒިލްއަށް މުބާރާތުގެ ފަހު މަރުހަލާތަކަށް ނުދެވޭނެ ކަމަށް ބުނާ ބުނުމެކެވެ.

ކްލެމެންޓްގެ އަންދާޒާގައިވާ ގޮތުން މިފަހަރުގެ ވޯލްޑް ކަޕްގެ ފައިނަލްގައި ބައްދަލުކުރާނީ ނެދަލެންޑްސް އާއި ޕޯޗުގަލްއެވެ. މިއީ މީގެ ކުރިންވެސް އޭނާ ދައްކާފައިވާ ފަދަ ސައްހަ އަންދާޒާއަކަށް ވެއްޖެނަމަ، ފުޓްބޯޅައިގެ ތާރީހުގައި އަނެއްކާވެސް އާ ޗެމްޕިއަނަކު ފެނުމުގެ ފުރުސަތު ބޮޑެވެ.

ޔޯސިމް ކްލެމެންޓަކީ މީގެ ކުރިން ބޭއްވުނު ތިން ވޯލްޑް ކަޕްގެ ޗެމްޕިއަނުން ދިމާކޮށްފައިވާ މީހަކަށް ވާތީ، ފުޓްބޯޅަ ދުނިޔޭގައި އޭނާގެ މި އަންދާޒާތަކަށް ބޮޑު ސަމާލުކަމެއް ވަނީ ހުއްޓިފައެވެ. ނަމަވެސް މިއީ ހަމައެކަނި ހިސާބުތަކެއްގެ މައްޗަށް ބިނާކޮށްފައިވާ އަންދާޒާއެއް ކަމަށްވާއިރު، ދަނޑުމަތީގެ ނަތީޖާ ތަފާތުވުމަކީ އެކަށީގެންވާ ކަމެކެވެ.