މިފަހަރުގެ ވޯލްޑް ކަޕް ކާމިޔާބުކުރާނެ ކަމަށް ބެލެވޭ ޓީމުތަކުގެ ލިސްޓުގެ އެންމެ ކުރީގައި އާޖެންޓީނާ!
މި މަހުގެ 11 ގައި ފަށާ ފީފާ ވޯލްޑް ކަޕަށް ތައްޔާރުވަމުންދާއިރު، ދުނިޔޭގެ އެކި ފުޓްބޯޅަ އެނަލިސްޓުންނާއި ލަފާކުރާ މޮޑެލްތަކުން ދައްކާގޮތުގައި، މި މުބާރާތް ކާމިޔާބުކުރުމުގެ އެންމެ ފުރުސަތު ބޮޑު އެއް ގައުމަކީ މިހާރުގެ ޗެމްޕިއަން އާޖެންޓީނާއެވެ.
2022 ވަނަ އަހަރު ގަތަރުގައި ބޭއްވި ވޯލްޑް ކަޕްގެ ތަށި އުފުލާލި އާޖެންޓީނާއިން މިފަހަރުގެ މުބާރާތާ ކުރިމަތިލަނީ ތަށި ދިފާއުކުރުމުގެ ބޮޑު އުންމީދަކާއިއެކުގައެވެ. ސްޕެއިން، ފްރާންސް، އިންގްލެންޑް އަދި ބްރެޒިލް ފަދަ ބާރުގަދަ ޓީމުތަކުގެ ވާދަވެރިކަން ބޮޑުވި ނަމަވެސް، ތަފާސްހިސާބުތަކުން ދައްކާގޮތުގައި އާޖެންޓީނާއަކީ އަދިވެސް އެންމެ ވަރުގަދަ އެއް ޓީމެވެ.
ފުޓްބޯޅަ އެނަލިޓިކްސް ކުންފުނިތަކުން ހެދި ސިމިއުލޭޝަން މޮޑެލްތަކުން ދައްކާގޮތުގައި އާޖެންޓީނާ ހިމެނެނީ މުބާރާތް ކާމިޔާބުކުރުމުގެ އެންމެ ފުރުސަތު ބޮޑު ޓީމުތަކުގެ ތެރޭގައެވެ. ބައެއް ލަފާކުރުންތަކުގައި ސްޕެއިންއަށް ކުޑަ ކުރިއެރުމެއް ލިބިފައިވީ ނަމަވެސް، އާޖެންޓީނާ އޮތީ ތަށީގެ ރޭހުގެ އެއްވަގާއިއެވެ.
Ads by BMLއާޖެންޓީނާއަށް މިފަދަ ބޮޑު އިތުބާރެއް ލިބެމުންދާ މައިގަނޑު ސަބަބަކީ ކޯޗު ލިއޮނަލް ސްކަލޯނީގެ އިރުޝާދުގެ ދަށުން އެ ޓީމުން ދަމަހައްޓަމުންދާ އެއްގޮތް ކުޅުމުގެ ސަބަބުންނެވެ.
2021 ވަނަ އަހަރުގެ ކޮޕާ އެމެރިކާ އަދި 2022 ވަނަ އަހަރުގެ ވޯލްޑް ކަޕް ކާމިޔާބުކުރި ފަހުންވެސް އެ ޓީމުގެ ފެންވަރު ވަނީ އެއް ލެވެލްއެއްގައި ހިފެހެއްޓިފައެވެ.
މީގެ އިތުރުން، ކެޕްޓަން ލިއޮނަލް މެސީގެ ހުރި ތަޖުރިބާއާއި ލީޑަޝިޕަކީ ޓީމަށް ލިބޭ ވަރަށް ބޮޑު ހިތްވަރެކެވެ. މިއީ މެސީގެ ފަހު ވޯލްޑް ކަޕަށް ވުން އެކަށީގެންވާއިރު، އޭނާގެ ހުނަރުވެރިކަމަށް ގިނަ ބަޔަކު އަދިވެސް އިތުބާރު ކުރެއެވެ.
ނަމަވެސް، ފުޓްބޯޅަ މާހިރުން ފާހަގަކުރާ ގޮތުގައި ވޯލްޑް ކަޕަކީ ކުރިއާލާ ލަފާކުރަން އުނދަގޫ މުބާރާތެކެވެ. ކުޅުންތެރިންނަށް ދިމާވާ އަނިޔާތަކާއި، އެވަގުތުގެ ފޯމުގެ ސަބަބުން ކޮންމެ ވަގުތަކުވެސް ނަތީޖާ ބަދަލުވެގެން ހިނގައިދާނެއެވެ. އެހެންނަމަވެސް، މިހާރުގެ ހުރިހާ ސާވޭތަކާއި ބެޓިން އޮޑްސްތަކުން ދައްކަނީ 2026 ގެ ތަށި ދިފާއުކުރުމުގެ ފުރުސަތު އާޖެންޓީނާއަށް ބޮޑު ކަމަށެވެ.
Ads by MACL
