ބުދަ، 18 ނޮވެމްބަރު 2026
ޚަބަރު

ވޯލްޑް ކަޕް 2026: ރޮނާލްޑޯ ބެންޗުގައި ނުބަހައްޓާނަން، އަހަރެން މީ މޮޔައެއް ނޫން: ޕޯޗުގަލް ކޯޗު

ވޯލްޑް ކަޕް 2026: ރޮނާލްޑޯ ބެންޗުގައި ނުބަހައްޓާނަން، އަހަރެން މީ މޮޔައެއް ނޫން: ޕޯޗުގަލް ކޯޗު

މިމަހުގެ 11 ވަނަ ދުވަހު އެމެރިކާ، ކެނެޑާ އަދި މެކްސިކޯގައި ފަށާ ދުނިޔޭގެ އެންމެ ބޮޑު ފުޓުބޯޅަ މުބާރާތް ކަމަށްވާ ފީފާ ވޯލްޑް ކަޕަށް ތައްޔާރުވަމުން އަންނައިރު، ޕޯޗުގަލްގެ ކޯޗު ރޮބާޓޯ މާޓިނޭޒް ވަނީ އެޓީމުގެ ތަރި ކްރިސްޓިއާނޯ ރޮނާލްޑޯއާ މެދު އޭނާ ގެންގުޅޭ ވިސްނުން ހާމަކޮށްފައެވެ. މިފަހަރުގެ މުބާރާތް ކާމިޔާބު ކުރާނެ ކަމަށް އެންމެ ބޮޑަށް ބެލެވޭ ޓީމުތަކުގެ ލިސްޓުގައި ޕޯޗުގަލް ހިމެނޭއިރު، ގިނަ ބައެއްގެ ސަމާލުކަން ހުއްޓިފައިވަނީ ރޮނާލްޑޯ ފުރަތަމަ އެގާރައިން ފެންނާނެތޯ ކުރެވޭ ސުވާލަށެވެ.



ނިމިދިޔަ 2022 ވަނަ އަހަރުގެ ވޯލްޑް ކަޕަކީ ރޮނާލްޑޯއަށް ވަރަށް ހިތްދަތި ތަޖުރިބާތަކެއް ކުރަންޖެހުނު މުބާރާތެކެވެ. އެ މުބާރާތުގެ ގިނަ މެޗުތަކެއްގައި އޭނާއަށް ޖެހުނީ ބެންޗުގައި އިންނާށެވެ. ޕޯޗުގަލް މުބާރާތުން ކެޓީ ކުއާޓާ ފައިނަލުގައި މޮރޮކޯ އަތުން ބަލިވެގެންނެވެ. ގިނަ ބަޔަކު ގަބޫލުކުރާ ގޮތުގައި އެ މެޗުން ޕޯޗުގަލް ބަލިވީ ރޮނާލްޑޯ ބެންޗުގައި ބެހެއްޓުމުގެ ސަބަބުންނެވެ. އެ މައްސަލަ ބޮޑުވެ، އޭރުގެ ކޯޗު ފެނާންޑޯ ސަންޓޯސް ވަނީ މަގާމުން ވަކިކޮށްފައެވެ.

ނަމަވެސް މިފަހަރުގެ މުބާރާތަށް ތައްޔާރުވަމުން އަންނައިރު، މިހާރުގެ ކޯޗު ރޮބާޓޯ މާޓިނޭޒް ވަނީ ސަޕޯޓަރުންނަށް ޔަގީންކަން ދީފައެވެ. މާޓިނޭޒް ބުނީ ރޮނާލްޑޯއަކީ ޕޯޗުގަލް ޓީމުގެ ވަރަށް މުހިންމު ކުޅުންތެރިއެއް ކަމަށާއި، އޭނާ ބެންޗުގައި ބެހެއްޓުމުގެ ވިސްނުމެއް ނެތް ކަމަށެވެ.

"އަހަރެން ރޮނާލްޑޯ ބެންޗުގައި ނުބަހައްޓާނަން، އަހަރެން މީ މޮޔައެއް ނޫން،" މިކަމާ ގުޅޭގޮތުން ވާހަކަ ދައްކަމުން މާޓިނޭޒް ބުންޏެވެ.

އޭނާ އިތުރަށް ބުނިގޮތުގައި އެފަދަ މޮޔަ ނިންމުމެއް އޭނާގެ ފަރާތުން ފެނިގެން ނުދާނެއެވެ.

މިފަހަރުގެ ވޯލްޑް ކަޕަކީ ރޮނާލްޑޯގެ ކެރިއަރުގައި ކުޅޭނެ އެންމެ ފަހު ވޯލްޑް ކަޕަށް ވުން އެކަށީގެންވާތީ، ޕޯޗުގަލްގެ ސަޕޯޓަރުން ތިބީ އޭނާގެ ފަރާތުން މޮޅު ކުޅުމެއް ފެންނާނެ ކަމުގެ އުންމީދުގައެވެ. ކޯޗުގެ މި ޔަގީންކަމާއެކު ޓީމުގެ ރޫހު ވަނީ އިތުރަށް ވަރުގަދަވެފައެވެ.