ބުދަ، 18 ނޮވެމްބަރު 2026
ޚަބަރު

މާލެ ސަރަހައްދުން ގޯއްޗާއި ފްލެޓަށް އެދުމުގެ މުއްދަތު މާދަމާ ހަމަވަނީ

މާލެ ސަރަހައްދުން ގޯއްޗާއި ފްލެޓަށް އެދުމުގެ މުއްދަތު މާދަމާ ހަމަވަނީ

ސަރުކާރުގެ "ބޯހިޔާވަހިކަން އެންމެނަށް" ސިޔާސަތުގެ ދަށުން ގްރޭޓާ މާލެ ސަރަހައްދާއި ރަސްމާލެ ހިމެނޭހެން ދޫކުރުމަށް ހަމަޖެހިފައިވާ ގޯއްޗާއި ފްލެޓަށް ފޯމު ހުށަހެޅުމަށް ދީފައިވާ މުއްދަތު މާދަމާ ރޭ 11:59 އަށް ހަމަވާނެއެވެ.

މިއަހަރުގެ މާރިޗު މަހުން ފެށިގެން ހުޅުވާލާފައިވާ މި ފުރުސަތުގެ މުއްދަތު އެކި ފަހަރުމަތިން އިތުރުކުރުމަށްފަހު، އެންމެ ފަހުން މިނިސްޓްރީން ނިންމާފައިވަނީ ޖޫން 15 އަކީ ފޯމު ބަލައިގަންނާނެ އެންމެ ފަހު ދުވަސް ކަމަށެވެ.

މި މަޝްރޫއުގެ ދަށުން މާލެ ސަރަހައްދުން 15,000 ގޯއްޗާއި 7,900 ފްލެޓް ދޫކުރުމަށް ވަނީ ކަނޑައަޅާފައެވެ. މީގެ ތެރޭގައި ހިމެނެނީ މާލޭގެ ރަށްވެހިންނަށް ހާއްސަ 4,000 ފްލެޓާއި، މާލޭގައި ދިރިއުޅޭ އެހެން ރަށްރަށުގެ މީހުންނަށް ދޫކުރާ 1,500 ފްލެޓްގެ އިތުރުން ހާއްސަ އިސްކަންދޭ ކެޓަގަރީތަކަށް ކަނޑައަޅާފައިވާ 2,400 ފްލެޓެވެ.

ބޯހިޔާވަހިކަމުގެ މި ބުރުގައި ސަރުކާރުން ވަނީ ޝަރުތުތަކަށް ބޮޑެތި ލުއިތަކެއް ދީފައެވެ. އެގޮތުން މާލެއަށް ރަށްވެހިކަން ބަދަލުކުރިތާ ގިނަ ދުވަސްނުވި ނަމަވެސް، މެދުނުކެނޑި މާލޭގައި ދިރިއުޅޭތާ 15 އަހަރުވެފައިވާ ފަރާތްތަކަށްވެސް މިހާރު ކުރިމަތިލެވޭނެއެވެ. މީގެ އިތުރުން، ކުރީގެ ސްކީމްތަކުން ގޯތި ލިބިފައިވާ މީހުންނަށްވެސް އެ ގޯތި ދޫކޮށްލުމަށްފަހު ފްލެޓަށް އެދުމުގެ ފުރުސަތު ވަނީ ހުޅުވާލާފައެވެ. އަދި ޖޮއިންޓްކޮށް ގޯތި ލިބިފައިވާ ފަރާތްތަކުން އެންމެން އެއްކޮށް ގޯތި ދޫކޮށްލާނަމަ، ވަކިވަކިން ގޯއްޗަށް ނުވަތަ ފްލެޓަށް ހުށަހެޅުމުގެ އިހްތިޔާރު ލިބިގެންދެއެވެ.

ނުކުޅެދުންތެރިކަން ހުންނަ ފަރާތްތަކަށް ހާއްސަކޮށްގެން 100 ފްލެޓް ކަނޑައަޅާފައިވާއިރު، އެ ފަރާތްތަކަށްވެސް ގިނަ ލުއިތަކެއް ވަނީ ފަހިކޮށްދީފައެވެ. އެގޮތުން ނުކުޅެދުންތެރިކަން ހުންނަ މީހާގެ ބަދަލުގައި ބެލެނިވެރިންނަށް ފޯމު ހުށަހެޅޭ ގޮތަށް ހަމަޖައްސައި، މާލޭގައި ދިރިއުޅުނު މުއްދަތު ގުނުމުގައިވެސް ވަނީ ލުއިތަކެއް ދީފައެވެ. ބެލެނިވެރިން ފޯމު ހުށަހަޅާއިރު އެކަން ސާބިތުކޮށްދޭ ލިޔުން ހުށަހަޅަން ނުޖެހޭނެ ކަމަށް ގެދޮރުވެރިކަމާ ބެހޭ ވުޒާރާއިން ބުނެއެވެ.

ސަރުކާރުގެ މައިގަނޑު އަމާޒަކީ މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ ބޮޑު މައްސަލައަށް ދާއިމީ ހައްލެއް ހޯދައިދިނުމެވެ. މިގޮތުން މިހާރު ފަށާފައިވާ ބޯހިޔާވަހިކަމުގެ މަޝްރޫއުތައް 2028 ވަނަ އަހަރުގެ ނިޔަލަށް އެއްކޮށް ނިންމައި ރައްޔިތުންނަށް ހަވާލުކުރުމަށް ދަނީ މަސައްކަތް ކުރަމުންނެވެ.